¹ Ê dan whã ndjigé pó mora whã bori dy mindji. Ê fa ãn: " Lanta zo mindji ngêza Dêsu, atali y ku ngê ka baza ntê rê. ² Sô na mindji poto lua ngêza wha, punda a ra gintxi êlê. Ane ka dumu posó santu whã kuin kuana sô dosú lua. ³ Ân ka ra dosú seseminha un ku fosa pa profétiza, bixiru saku, pelu whã mili y dosú séntu y kuin sambari ria: ⁴ seseminha é sa dosú olivera ku dosú kandja ku sa ni whê Sun tia. ⁵ Xi whã nkênu mêsê zi ane mali, fogô ka siê ni boka rê, loké ku numigu rê. Ngê xi ku mêsê zi ane mali ka toka muê ni mora ê. ⁶ Ane seseminha tê porê pa fisa onsé pan ê na sobê ni ola me ka sa profetiza. Ane tê porê para mura aua da sangi, zó pa firi tia ku turu paga, kuantu ê mêsê. ⁷ Ola ane loké ku seseminha rê, bêsta ku nda fénu ni lugé fundu bi luta kontê ane. Ane ka ganha sô maté. ⁸ Ongê ane ka fika sendêru ni lua posó ngairu( mora a ka sama é di Sodoma y Jitu), andji Sun ane fô kusifikaru. ⁹ Punda têxi ria y mê, nkênu di kara povô gerason, lungua y ngê tia ka bé pa ongê rê, ane na ka kunxitxi pa tié wha. ¹⁰ Ngê ta ka vévia ni tia ka gôgô punda ane, zi fesa sô ku da ofeta whã ra otô, punda ane dosú pofeta tomentá ngê ki ka vévia ni tia. ¹¹ Zo têxi ria y mê, whã fogô dy vira fô diba di patxi Dêsu lentxa ane, y ane lanta ndja. Mémé sustu kiê liba ane ngê ki ta ka pia kué. ¹² Sô ane ndê whã vogi fotxi, tuka ni onsé, sô fa ane: " Bin gé!" Sô, ane subi ra onsé ni whã omboxi, sô numigu ta ka zongô. ¹³ Ola é, ê zi whã mémé tomentu, sô désimu patxi di posó baga ré. Sambano milé nkênu muê ni tomentu, sô nkênu xi ku vévia fika ku mendu sô mba inté ra Dêsu di onsé. ¹⁴ Segundu " Aflison" laza. Pia! Tisêlu " Aflison" kabi djén ndja. ¹⁵ Sétimu anzu sopa koneta ré sô nguita ku mémé vozi ane lumba ni onsé, ka fa: " Govenu ri mundu xié ê bila Govenu ri Sun non sô di kistu Rê. Ê ka govenana atê atê. ¹⁶ Zó ane kuiné kuana ansion ka sa tasoru ni tonu rê, ni whê Dêsu, ane baza ntê da son, ku polo ane bazaru, sô adora Dêsu, ¹⁷ Ka fa: " No ka Gasa, ra Sun Dêsu, di Turu Porê, Nkênu xi ku tava sô ku sa, punda bô tua mémé porê Ô sô komesa ka govena di turu kua. ¹⁸ Ane povô tia fika ku koso txofi txofi, magi bô bi ku leva Ô. Ola vitxa pan juga ane ngê ku muê sô pa Ô rekompensa ane sêvu Ô, ane pofeta, ane santu sô ku turu nkênu ku lispeta nomi Ô, turu ngê txororo mora ane ku tê porê. Ola vitxa pa Ô baga ku turu ngê ku dana tia". ¹⁹ Zo ngêza Dêsu, ku sa onsé, biri sô arka di aliansa Ô a pié letu ngêza. Ê zi mémia, tomentu, tovara, whã tia bila ku whã mémé suba di fogô.