¹ Na zi zugameto pa a na zuga se wha. ² punda ku zugamento ma se ka zuga nkenu a ka zuga se mora e me, ku mora ma se ka mindji nkenu a ka mindji se. ³ Ra kuay ma bo ka ngolo txia yku ku sa whe, na amo-o, ma bo na ka ta ndjigi po ku sa plopi whe o wha! ⁴ Ma bo ka fa na amo-o: Dessa un txia iku ku sa whe-o so ma bo plopi sa ku ndjigi po plopi whe-o! ⁵ Fassu! txia ndjigi po ku sa whe-o so bo ka be klalu, pa bo txia kua ku sa whe na amon-otlebessaru. ⁶ Na ra kasso kua buaru wha ne na lukua me buaru ra poko, pa ane na piza ku ope so to bila ra se to me se wha. ⁷ Pindji a ka ra se ngolo, se ka be; bate a ka birie ra se. ⁸ Punda turu nkenu ku ka pindji ka tua; so nkenu ku ka ngolo ka be; Ra issi ku ka bate e ka biri. ⁹ So kuali ome, katxi se ma na pindji-e wha ndjigi mpo e ka re wha burru! ¹⁰ O si na pindji-e kike e ka re wha kiongo! ¹¹ So si se ku sa mafe, ta ra na se kua buaru, kuantu maxi, Tata se ku sa Onse, na ka ra nkenu ku pindjie kua buaru wha! ¹² So turu kua ma se ka messe pa nkenu zi se, se toka zie ra ane tambe; Punda ye so sa ale ku profeta. ¹³ Letxa poto petaru punda pota biriru, ngairu sa mondja ku ka dana-ngue loke, yo nkenu ku se ka la ne. ¹⁴ Mazi petaru sa poto so ku mondja ku mondja petaru ku ka be ku non vira so poko nkenu ku ka be. ¹⁵ Tua kuiraru ku fassu profeta, punda e ka bi ku kabissi ombo mazi vere vere e sa ukue ku fomi. ¹⁶ Punda kua ma e ka zi so se ka te. So a ka koie uva katxi pinha o figu lotxiga! ¹⁷ Mora e me, ma turu po buaru ka ra me buaru, mazi po poreru ka ra me poreru. ¹⁸ Po buaru na sai ku ka ra me poreru ne po poreru ra me buaru wha. ¹⁹ Turu po ku na ka ra me bueru wha a ka kote zuga pe fogo. ²⁰ So ny me re ma a ka te. ²¹ Ne turu nkenu ku ka fa Un: Sumu Sumu,ku ka letxa Goveno Onse, mazi ysi ku ka zi vonte Tata Un ku sa Ose. ²² Yo nkenu ka fa un die Sumu, Sumu, non na plofetiza ny nome Bo wha! Ni nome Bo non na kole ku demono non na zi yo milagli wha! ²³ So nga fa ane biriru: Na ta o wha! Fo kota Un, se ku ka zi pekaru! ²⁴ So turu nkenu ku ka nde lumba Un ku ka kundji ka sa mora ome ku ta kua to zi kai re diba buro. ²⁵ Suba sobe, aua matu tuka, sopua ventu ra pe kai e; mazi e na kie wha, punda e ta lemaru diba buru. ²⁶ Mazi turu nkenu ku ka nde lumba Un ku na ka kundji wha, ka sa mora ome dodo ku zi kai re diba nseke! ²⁷ Suba bi, aua matu tuka, ventu sopua ra pe kai-e so e kie; so baga loke. ²⁸ So e ra ma, ola Jizu loke lumba, ane nkenu ta biri bika ra kua ma E ta ka sina. ²⁹ Punda E ta sina mora nkenu ku ta turu kua e na sa mora fassu xefi wha.