¹ Ma, antinji di fessa de Passukua, Jizu ta ma dia Rê sa vitxa pê passa de tia bêrê da Tata, mê gôgô ki dirê ki tia-é, Ê gôgô ki ané atê atê. ² Ni Sêia, demóno tia pêru ni kosso de Juda Iskariote, na Simõ ki ngana Jizu. ³ Jizu tia ka ta ma Tata dé turu kua ni Mó-Rê, e ma Êlê bi di Dessu, e Ê tia ka tô berê da Dessu. ⁴ Ê lata dé sêia e txia manto. Antó, Ê tua un-ua toia e bué pê katxi. ⁵ Sô, Ê baga aua pê un-ua baxá, e komessa ka laba opé de ané nkenu-Rê, e ka kuta-rê ki toia mê Ê pê katxi. ⁶ Ê vitxa pétu di Simõ Peru, ki fé: Sun, Bô ka laba opé un! ⁷ Jizu kundji e fé: Kua nga zi, bô na ka té aié-wa, magi sô bô ka bi té. ⁸ Peru fé: Bô nunka ka laba un opé! Jizu kundjé: Se ãn na laba ôua, bô na tê patxi ki Un-Ua. ⁹ Simõ Peru fé: Sun na laba opé un sô-ua, magi mó-un e ntê-un també. ¹⁰ Jizu fé: Nguê landá-za, na pô laba si ê na sa opé wa, e ê sa limpo. Sê sa limpo, magi na turu sê wa. ¹¹ Punda Jizu tia ka ta nguê tia ka ba nga-Né. Punda kué Mê fa: Na turur sê ki sa limpo wa. ¹² Sô ma Jizu lata opé ané, tua mantu, ba meza e puta ané: Sê ndê kua ma Un zi. ¹³ Sê ka sama un Mésse e Sun, e zi buaru, punda Ãn sa. ¹⁴ Si Ãn antó, Sun e Mésse, laba opé sê, sê també tô ka laba ôtô. ¹⁵ Punda Ãn zi mora rê da sê, mora ma sê tó ka zi ma Un zi ki sê. ¹⁶ Véré, véré, Nga fa sê: na nkenu na sa maxi ngai do kê messé-rê, né nguê mandé-wa. ¹⁷ Se sê ta ané kué, búa sa sê si pratiké. ¹⁸ Na sa fa de turu sê wa, punda Ãn ta nguê ma-Un koiê, magi Ãn fa kuê pa Skritura kupli: Nguê tia ka mé mpón Un, lata kanha-re konta Un! ¹⁹ Nga fa sê kuê wó, sô pê bi da, pa óló ê ka dá, sê ka kêlê ma Un sa. ²⁰ Véré, véré, nga fa sê: nguê tua Nguê ma Un manda, ê ka tua Un, e nguê tua Un, tua Nguê ki manda Un. ²¹ Mê fa ané kué, Jizu leva ni suplito, tô fa: véré, véré, Nga fa sê dingui ma un-ua sê ka ba ngana Un. ²² Ané nkenu-Rê pia ôtô, pa ta nguê ma Ê tia ka fa. ²³ Un-ua nkenu Rê, nguê ma Jizu gôgô kuê, ê tia bazaru pê pêtu de Jizu. ²⁴ Simõ Peru zé sinale pindjé: Puté nguê ma Ê sa fa. ²⁵ Antó nkenu-é, bazaru pê pêtu de Jizu, puté: Sun nguê mê sa! ²⁶ Antó Jizu kundjé: Ê sa nguê issi ma Un nga da ndjigui mpó miaru. E mé minha ndjigui mpó, Ê da Juda, ná de Simõ Iskariote. ²⁷ E oló ma ê mén mpó, demóno letxié. Jizu antó fé: kua ma ô tê zi, zé seru. ²⁸ Né un-ua nguê ki tia meza na ta punda kuai Jizu fa kué dé. ²⁹ Mê sa Juda konta de bolsa de lêlú, ôtô ané kunda Jizu mê sê fé: Kopa kua ma nó mêssê da fessa, ô ma êlê toka da kua da poble. ³⁰ Sô ma Juda tua mpó, siê wêlê-wêlê mé e ê tia suku. ³¹ Ma Juda siê, Jizu fa: Aié ná omé foi glorifikado, e Dessu foi glorifikado Né. ³² Dessu glorifika Nêle mé, e sô glorifika Né. ³³ Anzo, Ãn sa ki sê anda txó dia. Sê ka ngolo Un, e ma Un fa Judeu kué: Pa ondji nga bé, sê na ka pô bé wa. Aié Ãn nga fa sê kué també. ³⁴ Un-ua novu ordé nga da sê, ma sê ka gôgô ki ôtô, mora ma Un gôgô ki sê, antó sê també tô gôgô ki õtô. ³⁵ Kué turu nguê ka ta ma sê sa nkenu Un. Se sê gôgô ki ôtô. ³⁶ Simõ Peru fé: Sun, ondji Bô sê ka bé! Jizu kundjé: Lugué ma Ãn sê ka bé bô na ka pô lêlê-Un ja wa, magi sô bô ka lêlê-un. ³⁷ Peru fé: Sun, punda kuai un na pô lêlê Ô wêlê-wêlê! Ãn nga da vira un da Ô. ³⁸ Jizu kundji: Bô ka ra vira ô da un! Véré, véré, nga fa ô ku ma galo na ka kanta atê bô ka zeta Un têssi veze.