¹ Whã omé ma ka sama Lazu ta a duexi. Ê tá ka ta Betanha nga ma Maia ka ta né ku mana rê Mata. ² Yé sa Maia si ku tá buá opé Sun ku fu naná tô kuta-lé ku pena ntê ma na amon rê sa Lázu ku ta ka duêxi. ³ Ane na amon rê manda lekaru ra Jizu, ku ta fa: Sun, nkênu si ma bô ka gogo kuê sêka duetxi. ⁴ Ola Jizu ndê kua é, Ê kundji: Duetxi é na sa pa ê muê wha, mazi ê sa pa Gloia Dessu pa Ná Dessu ka sa glolifikaru katxi rê. ⁵ Jizu ta ka gogô ku Mata, ku mana rê ku Lázu. ⁶ Olá Ê ndê ma Lazu ta ka duetxi, Ê tô ta dôsú ria nga ma Ê ta né. ⁷ Ma kua-é pasa Ê fa melú rê: ban tô ba zureia. ⁸ Ane mêlú Rê fé: Mése, wélewéle ma ane zurê kia ra Ô ku buru, asié mé Bô tô mesê ba nha! ⁹ Jizu kundji: Ria na tê kuine dosú ola á! Si nguê ka nda pomonha ê na ka ra topi wha, punda ê ka bê kandja pomonha. ¹⁰ Sô si ê nda nsuku ê ka ra topi punda ê na tê kandja wha. ¹¹ Jizu fa ane kua é sô, ola Ê fa kua é Ê fa ané: Migu non Lazu sa sóno, mazi Nga ba koré fô sóno. ¹² Ane mêlú Rê fé: Sun, si ê sa sono ê ka bá yogó. ¹³ Jizu ta ka fa dy motxi Lazu, mazi ane ta kunda ma Jizu ta ka fa dy sono kansa. ¹⁴ Sô Jizu fa ane klálu: Lazu sa motxi. ¹⁵ Punda sê, Nga saku gostô dy na sa nha wha pa sê kêlê. Mazi ban ba lêlê. ¹⁶ Sô Tomé ma a ka sa Dídimu, fa otô mêlu: Ban també pa nón muê ku Jizu. ¹⁷ Olá Jizu vitxa, Ê bi ta ma Lazu ta lêtu simintéli tá ku kuana ria. ¹⁸ Betánha ta petu ku Jiruzalé, pêlu menu kuine tanón metlu londji. ¹⁹ Yô zurê ta bi ra Mata ku Maia sintximentu punda ná amon ane. ²⁰ Sô ola Mata bi ta ma Jizu ta ka bi ê ba lêlê, mazi Maia fika kai. ²¹ Sô Mata, fa Jizu: Sun ka tava yngué ná amon un na muê wha. ²² Ayé mé un ta ma kuakuali kua ma bô ka pindji Dessu Ê ka ra ô. ²³ Jizu kundji-é: Ná amon ô ka tô kora. ²⁴ Mata fa: Un ta ma ê ka tô kora ria ma motxi ka tô kora ny utimu ria. ²⁵ Jizu fé: Un sa resuresón tô sa vira, nkênu si ku ka kêlê ny amu ê pô muê ê ka tô kora. ²⁶ Sô nkênu ku ka vevia ku ka kêlê ny aun nuka ê ka muê wha, bô ka kêlê yé! ²⁷ Ê fé: Ê sa seto Sumun nga kêlê ma Bô sa Klistu, Ná Dessu ku toka bi tia. ²⁸ Ma ê fa kua-é ê siê ba sama Maia pataru, fa: Mése sa yngué y ê seka sama ô. ²⁹ Olá Maia ndê kué-é, ê lata séru ba Lêlê. ³⁰ Jizu nasi ta vitxa feguêja-é wha, mazi Ê tá nga ma Mata ba lêlê né. ³¹ Zurê ku ta ka ra ane sintximentu, nota ma Maia lata seru siê ane lêlê kunda ma ê seka ba siminteli ba sua. ³² Sô Maia vitxa nga ma Jizu tá né ola ê Bê ê pê mpuna son opé Rê fa: Si Sun ka tá yngué na amon un na ka muê wha. ³³ Ma Ê sê ka bê ka suá ma zurê ku tá ka lêlê turu, Jizu konvó ni supitu foga wha. Ma Ê ta ku muson koson. ³⁴ Ê fa ane: Andji sê pê! Ane kundji: ³⁵ Sun bi pié. Jizu sua. ³⁶ Sô ane Zurê fa katxi ane pia mora ma Ê ta ka gogô ku Lazu. ³⁷ Otô fa za: Ome-é ku ra segu wê na pô zi pa ome-é na ka muê wha! ³⁸ Sô Jizu konvoru foga wha bé atê siminteli. Ê ta mora whã vuvu buru ku whã buru ma pê boka póto. ³⁹ Jizu fa: txia buru! Mata mana Lazu ku ta muêru fa Jizu: Sun, ê sa potóru za, punda ê muê ku kuana riá. ⁴⁰ Jizu kundji: Na fa ô ma si sê kêlê, sê ka bê Gloia Dessu! ⁴¹ Sô ane txia buru. Jizu pia osé sô fa: Táta-ê obligadu punda Bô ndê Un. ⁴² Un ta ma sémple Bô ka ndê un, mazi punda Yô nkênu ku sa ndjaru bóro Un ma un fa kua-é pa ane kêlê ma Bô manda Un. ⁴³ Sô ola Ê fa kua-é, Jizu nguita ku fosa: Lazu, bi lua! ⁴⁴ Motxi siê ku dosú mon ku opé buaru, ku pólo taparu ku wha panu, Jizu manda ane: duê sô desé bé. ⁴⁵ Sô yô zurê ku bi puta nova Maia bê kua ma Jizu zi, ane kêlê Né, ⁴⁶ Mazi whã dôsu ane ba lêlê fasu mése ba tangué kua ma Jizu ta zi. ⁴⁷ Sô ane sefi nguêza na kulu ku fasu mése zunta ny Sinerdiu sô fa ane: kuai ma non ka zié! Ome sê ka zi yô sinali ku milagli. ⁴⁸ Si non desé asié yô nkênu ka kêlê Né. Sô ane nkênu loma bê tô txia nga non ku nkênu tia non. ⁴⁹ Sô whã ane, ma a ka sama Kaifa ma anu siza ê tá sefi nguêza, ê lumba fa ane: Sê na ta né whã kua wa. ⁵⁰ bô na sê ka ta ma whã ome tê ki muê ra povô dokê pa turu nkênu tia. ⁵¹ Ê na ta fa kua-é ré mé wha, mazi punda ê sa sefi nguêza anu siza, ê fa kua ku ka bi rá ma Jizu ka bi muê ra turu nkênu tia. ⁵² Sô ê na sa da turu nkênu tia sô wha, mazi ra ná Dessu ku sa whãgaru pa Ê zunta ane ny whã povô sô. ⁵³ Sô, na dié ba whê, ané ngolo mora ma ane ka mata Jizu. ⁵⁴ Jizu na tô nda biriru katxi zurê wha, mazi Ê siê ba londji ny whã kiba kuaji whã nga sê newhã kua né, ny whã feguêja ma a ka sama Efrain nga ma Ê fika ki melú Rê. ⁵⁵ Pasukua ta petu, sô yô nkênu nga é ba Jiruzalé pa ane ta puru. ⁵⁶ Sô ane ta ka ngolo Jizu, sô ta ka fa ku otô lêtu nguêza: kua sê ka kunda! Sô Ê na ka bi fesa wha! ⁵⁷ Ane sefi nguêza ku ane fasu tá manda pa, si nkênu ta ngá ma Jizu sa né pa ane fé pa ane ba Tê manha.