¹ Paulu, apostulu dy Kistu Jizu punda vonté dy Dêssu, manu nó Timótio, ra ngeza dy Dêssu ku sa ny korintiu y turu santu ny turu regiõ dy Akaia. ² Ky gasa kasa ku sê, y padji dy Dêssu, Tata nó, dy Sun Jizu Kistu. ³ Ku Dêssu ku Tata dy Sun nó Jizu Kistu ka sa lovaru: Ê sa Tata dy misekodia y Dêssu dy turu konsolason. ⁴ Dêssu ka konsola nó ny turu afison, pa nó té mbeté konsola ngê xy ku sa ni afison, no ka konsola otô ku mora konsolason ku Dêssu ka da nó. ⁵ Sô axié mora sofimentu du Kistu sa yô punda kupa nó, axié ta mbé konsolu nó sa yô punda katxi dy Kistu. ⁶ Mazi sy nó sa afligigu, sa pa konsolu sê y savason, y xy no sa konsolaru, sa pa konsolu sê. Konfotu é sa buaru ola sê pa patxi ku paxensa ku sofimentu ê mé sa nó. ⁷ Kunfiansa nó ny sê sa setu, no ta ku axi mora sê patxi sufimentu, ta mbé sê ka patxi konsolu. ⁸ Punda nó mesê, manu, pa sê ka nglimi a serka dy tibulason ku nó tinha ny Asia. Nó tinha xiaru dy yô kega alén dy kua ma nó ka supota, sô ma nón tinha tô pensa dy vivê. ⁹ Sô ma, nó tinha setensa dy motxi ny nó. Sô, ixié sá pa ky nón ná pê kufiansa nó ny nó wha, mazi ny Dêssu, ky kora ngê motxi. ¹⁰ Ê txia nó ny pligu dy motxi, ka txia nó dingi. Nó ka pê kufiansa nó Né, ma ê libeta nó dingi. ¹¹ Ê txia nó nha punda sê zura nó punda lason sê. Anto, yô ngê ka bi ra gasa ra favolô gasiosu ku da nó punda lason yô nguê. ¹² Nó ogulha dy kuê é: seseminha dy kuxensa nó. Sô sa ra lazon limpu y setu, ra patxi Dêssu ka sigui, ny tia, ra sê, na ku sebê dy tia, mazi ra gasa dy Dêssu. ¹³ Na sisika ra sê kuakuali kua ku sê na ka pó lê ô ka poi wha. Nga whara ma sê ndê dy turu setu, ¹⁴ mora ma sê taza ny patxi. Antó ny ria dy Sun nó Jizu, nó sa lazon dy orgulhu sê, axé mora sê ka sa dy nó. ¹⁵ Punda an tava ka kunfia ny kué é, an mesê bê até sê pimelu, pa sê tua benefisio dy dôssú visita. ¹⁶ An tinha mesê vizita sê ola ka ba Masedônha, sô nga ba sisita sê dingi ola an bi na, antó sa bé ku sê a zurê. ¹⁷ Ola an tinha mesê kué, sô ka mendu! Punda, nga planeja kua dy mora ku kua umanu, dy mora nga fa: veré, veré, ô inó, inó, ny tumpu é mé! ¹⁸ Mazi axé mora Dessu sa fieli, nó na ka fa ny tempu é mé, ve´r ô inó. ¹⁹ Sô, ná Dêssu, Jizu Kistu, ngê sy savanó, Timotio y an ka fa katxi sê, na sa veré y ino, mazi sa semple veré. ²⁰ Punda turu pomesa de Dêssu sa veré mé. Anto ta mbé punda Elê nó ka amé, pa goia dy Dêssu. ²¹ Sa Dêssu ngê ku aseta ku sê ny Kistu, ê kumisa nó. ²² Ê pê selu rê ny nó y ny koson nó, y da nó Supitu mora whã penhu. ²³ An tua Dêssu mora seseminha an lazon ra kua ná tava ny Korintu mbê ma popa sê. ²⁴ Na punda nó mesê pia afé sê wha, mazi punda nó ka taba ku sê pa legia sê, sô ra afé, vugu pa sê sa fimi.