¹ Na sa apostulu wha! Sa sa livi wha! Na bê Sun non Jizu wha! Sê na sa suvisu un ny Sun wha! ² Si na sa whã apostulu ra otô wha pelu menu un sa ra sê, punda sê sa plova apostuladu un ny Sun. ³ Yé sa refeza un ra ané ku ka pova un. ⁴ Non na tê dêtu me ku bêbê wha! ⁵ Non na tê dêtu tua whã mengay kenti, mora ma ané apostulu ku ané ná amon Sun ku Sefa ka zi wha! ⁶ Ô ê sa Barnabé ku an sô tê ki taba! ⁷ Nkênu kutxi ku ka sivi mora soré ku kusta rê popi! Nkênu kutxi ku ka kuna whã vinha ku na ka mé mé rê wha! Ô nkênu kutxi ku ka tua konta whã gupu ombô ku na ka bebê letê rê wha! ⁸ Nga fa kua é mora soré omé! Alê na ka ka kua é mora alê turu wha! ⁹ Punda ê sa sisikaru alê Muzé. Na manha boka buê ola ê sê ka dumu ynkuê wha. Ê sa ku buê veré ma Dêsu ka mêsê! ¹⁰ Ê na sêka fa ri non wha! A sisiké ra non punda nkênu ku ka kuna pê son, tê ki kuna ka whara sô ku ka koyê tê ku koyê ka kunfia ri mé kua ma ê koyê. ¹¹ Si non kuna kua Supitu katxi sê, ê ka sa masi koyê kua ma a ka bê ri sê! ¹² Si otô ka tê dêtu é punda sê, non na ka tê masi anda wha! Ê na sa pa no ngolo dêtu é wha, mazi non ka ngêté turê punda ê na sa pa non ka sa whã atlazu ra vangelhu Kistu wha. ¹³ Sê na ta ma nkênu ku ka sivi ngêza, ka tua mé rê ngêza wha! Sô nkênu si ku ka sivi atali ka patxi kua ma ra atali wha! ¹⁴ Di otô mora Sun manda ané ku ka plega vangelhu ku ka vevia ri vangelhu. ¹⁵ Mazi na ngolo ta né whã dêtu é wha, sô na sêka sisika kua é pa ê ka sa ziru ran wha. Posi nga muê rôkê nkênu ka txia un whê é. ¹⁶ Punda si nga plega vangelhu, na tê lazon zi luxu wha punda un tê abigason zi kua é. Sô a ri un si na plega vangelhu wha. ¹⁷ Punda si nga zi kua é bon vonté un, untê whã pagamentu, mazi si ê na sa ri vonté wha, un tê whã kumpimisu ma a kunfia un né. ¹⁸ Antó kuali ku sa pagamentu un! Ma ola nga plega nga pô ra vangelhu sê lêlu, sô antó na ka tê dêtu un ku vangelhu wha. ¹⁹ Punda un pô sa livi turu kua, nga tô bila ná kia turu kua, pa nga poy nganha nkênu masi. ²⁰ Ra zurê un bila mora zurê pa nga nganha zurê. nkênu si ku sa kosi alê bila un mora nkênu kosi alê pa un ganha ané punda alê. ²¹ Ra ané ku sa sê alê , un bila mora sê alê, un pô na ka ta sê alê Dêsu wha sô sa kosi alê Kistu. Un zi kua é pa un ganha ané sê alê. ²² Un bila flaku ra flaku ku vonté nganha flaku. Un bila turu kua ra turu nkênu, pa nga poy, ri turu mora sva whã dôsu. ²³ Nga zi turunkua punda vangelhu, pa nga sa ku bensa rê. ²⁴ Sê na ta ma whã korida turu nkênu ka kôlê, mazi whã sô ka nganha pemi! Antó kôlê pa bô nganha pemi. ²⁵ Whã nkênu ku ka kolê ka tontola turu tempu rê. Ané ka zi kua é pa ê tua whã klôa ku ka rana, mazi non ka kolê pa non nganha whã klôa ku na ka rana wha. ²⁶ Sô na ka kolê sê vonté otô wha, né na ka peza ka txia nkomé atôa wha. ²⁷ Mazi nga peza ku ongê un sô zi mora ná kia pa ola nga plega ra otô, an mé na ka sa sê piara wha.