¹ Nga lenbua sê ané ná amon, ku Vangelhu ma un manda sê ma sê tua, sô sê ta né. ² Ma vangelhu é ma sê sa savu, djina sê tê buaru lumba ma un plega pelu menu ma sê na kêlê sô wha. ³ Sô ma un ra sê pumbêlu lugé ma an turu tué, ma Kistu muê ra pekaru non mora ma a sisiké. ⁴ Sô ma a Tié sô ê tô kora ri têsi ria mora ma a sisiké.c15v7 ⁵ Sa ê vitxa sê fa sô ané kuini dosu. ⁶ Sô ê tô vitxa masi rokê kinhentu ná amon whã vê ma masi motxi ané ka vevia anda, mazi whã dosú muê sa sa. ⁷ Sô ê tô vitxa Txagu sô masi ngosi ra turu mêlu. ⁸ Sô utimu Ê vitxa un, mora ra whã ná pikina ku nansê antiji tempu. ⁹ Punda un sa masi txoororo ané mêlu, ma na toka pa a sama un mêlu wha punda un pisigi ngêza Dêsu. ¹⁰ Mazi punda amolê Dêsu un sa kua ma un sa, sô amolê rê ku an na fô sê wha. Ra kua é, un taba masi mtxi rô kê turu ané, ê pô na ka sa an wha, mazi amolê Dêsu ku sa ku an. ¹¹ Ê pô ka sa an ô ané, asyé non ka plega sô sê ka kêlê. ¹² Ayé si a ka ba plega ma Kistu sô tô kora motxi, má otô ka pô fa sê ma a na ka tô kora motxi wha! ¹³ Mazi si a na ka tô kora motxi wha ató né Kistu mé na kora motxi wha. ¹⁴ Sô si Kistu na kora motxi wha, antó plegason non na valê wha sô afé sê turu na valê wha. ¹⁵ Sô a ka pia non fasu sesêminha ra Dêsu, punda non sê ka fa kua kontê Dêsu ka fa ma ê kora motxi. ¹⁶ Punda si motxi na kora wha antó Kistu també na kora wha. ¹⁷ Sô si Kistu na kora motxi wha, afé sê na valê wha sô sê sa pekaru sê anda. ¹⁸ Antó, ané ku muê ku Kistu turu na ka tô kora wha. ¹⁹ Si non ka kunfia ku Kistu ku vira é sô, non sa masi mali turu nkênu. ²⁰ Mazi ayé Kistu tô kora katxi motxi, sô sa pumbê mé ané ku muê. ²¹ Punda non bê ma motxi bi ra whã omé, ra whã omé tô kora motxi bi. ²² Punda mora ma turu nkênu ka muê ku Adon asyé mé ma turu nkênu ka vevia ra Kistu. ²³ Mazi kara whã ku vê rê popi: Kistu pumbê mé sô ané ku muê ku Kistu, ola Ê ka bi. ²⁴ Sô ê ka loké, ola Kistu ka trega alê ra Dêsu, Tata, sô ka loké ku turu porê ku turu lênu, ku turu fosa ku porê. ²⁵ Sô Ê ka lena atê, Ê ka pê turu numigu Rê kosi opé Rê. ²⁶ Utimu numigu ma Ê ka loké kuê sa motxi. ²⁷ Punda Ê pê turu kua kosi opé Rê. Mazi ola a ka fa: Ê pê turu kua, ê sa biriru ma yé na sa ku ysi ku sujeté turu kua. ²⁸ Ola turu kua ka sa sujeitu Rê, antó Ná ka sa sujeta Nkênu ku sujeta turu kua pa Dêsu Tata ka pô sa turê ku turu. ²⁹ Ri otô mora, kay ma ané ku butiza ra motxi ka zi! Si motxi na ka tô kora mora é wha ra kuay ma ka butiza ra ané! ³⁰ Sô ra kuay ma non ka sa pigu turu ola! ³¹ Nga vugu ku motxi turu ria, yé sa sétu ma nga fa ku vonté ra sê ma ntê ku Kistu Jizu Sun non. ³² Kauy nga nganha ra vonté omé, un peza ku situ pigu ny Efezu si motxi na ka kora wha! Non ka mé ka bêbê punda mungu non ka muê. ³³ Na ngana wha. Má ramo ka raná kustumu buaru. ³⁴ Bila supetu! vevia buaru! Na zi mali wha. Punda whã sê na ta dy Dêsu wha. Nga fa kuê ra vegonha sê. ³⁵ Mazi nkênu ka fa: Ma motxi ka tô kora. Ku kuali ongê ané ka bi. ³⁶ Sê sa ignoranti foga wha. Kua ma sê ka kuna ka pô muê. ³⁷ Sô kua ma bô ka kuna na sa ongê ma ê ka sa wha mazi whã ná ynkuê ku ka bila tigu ô otô pó. ³⁸ Mazi Dêsu ka ra whã ongê mora ma Ê koyê, kara ynkuê ka ra ongê rê popi. ³⁹ Turu kany na sa kany é mé wha, mazi whã sa kany omé ôtô kany situ otô kany kikê. ⁴⁰ Êtê ongê osé sô ongê tia. Mazi buaru ongê osé sa whã mora sô buaru ongê tia sa otô. ⁴¹ Ê tê buaru solo, otô buaru mbêzi otô buaru têtêmbu punda whã têtêbu ka sa ôtô mora buaru goia. ⁴² Kara motxi sa mora é mé turu: ma a ka kuna ka muê sô ku ka kora na ka tô muê wha. ⁴³ Ma a ka kuna na valê wha mazi ê ka kora buaru. ⁴⁴ Ma a ka kuna flaku ka tô kora ku fôsa. Ma a ka kuna kany kany ka tô kora whã ongê supitu. Si ê tê whã ongê kany, ê tê whã ongê supitu turu. ⁴⁵ Ê sa sisikaru asyé turu: pumbê omé Adon, a zié alima ku vevia. Utimu Adon bila supitu ku ka vevia. ⁴⁶ Ku turu, supitu na bi pumbê wha, mazi kany, sô supitu. ⁴⁷ Pumbê omé sa ri tia ziru ku opó sgundu omé sa ri osé. ⁴⁸ Mora omé ma a zi ku opó sa mora ané ma zi ku opó turu, mora omé osé, sa mora ané ku sa ri osé turu. ⁴⁹ mora ma non ka kega fêgula omé opó, non ka kega fegula omé osé turu. ⁵⁰ Na fa sê kua é, na amon ma kany ku sangi na ka pô lera lênu Dêsu wha né ku ka muê ka lera vivu. ⁵¹ Ya whã sêgêru ma nga fa sê: turu non na ka muê wha, mazi turu non ka mura. ⁵² Non ka mura whã stanti, ku whã biri ku fisa whê ku utimu toki. Punda toki ka sua sô motxi ka tô kora na ka tô muê wha sô non ka mura. ⁵³ Punda ongê si ku ka muê ka tô bisi ku na ka muê wha sô ongê motxi é ka tô bisi ku na ka muê wha. ⁵⁴ Mazi ola ongê si ku ka muê ka bisi ka na ka muê wha, sô ongê si motxi ka tô bisi ku na ka muê, antó ku sa sisikaru ka bi. A tô bi ku motxi ku porê. ⁵⁵ Motxi porê ô ô! Motxi lengê ô ô! ⁵⁶ Lengê motxi sa pekaru, sô porê pekaru sa alê. ⁵⁷ Mazi nga lova Dêsu, ku ka ra non porê punda Sun non Jizu Kistu. ⁵⁸ Sô migu un ná amon un sa plontu sô na tapaya wha. Sémpé ku fosa ny suvisu Sun punda sê ta ma suvisu sê ku Sun na sa sô wha.