¹ Ra don dy supitu, na amon, na mêsê pa sê ka ta sê wha. ² Sê ta ma ola sê ta pendêru, sê ta ka lêlê fêgula mumu. ³ Sô un mêsê pa sê ta ma né whã nkênu ku fa ku Supitu Dêsu na pô fa: Jizu sa marisuaru. Sô né whã nkênu na ka pô fa. Jizu sa Sun. Si ê na sa ku Supitu Santu wha. ⁴ Ayé tê otô mora don, mazi ku Supitu é mé. ⁵ Sô ê tê otô mora ministeriu mazi Sun é mé. ⁶ Sô otô mora suvisu mazi Dêsu é mé sô ka zi buaru ku turu kua. ⁷ Kara whã ka zi kua ma a ka bê ri supitu ra ben ri turê. ⁸ Sô ra whã a ka ré supitu ri ta kua ma ê ka lumba, sô otô zi kua ku supitu é mé. ⁹ Ra otô afé ku supitu é mé, sô otô ta kula ku supitu é mé, ¹⁰ sô ra otô ku porê, sô ra otô ka fa kua Dêsu, ra otô abirari ri ta supitu, sô otô, yô mora lungua sô ra otô ta kua ma a sêka fa. ¹¹ Mazi supitu é mé ka taba ku turê ka ra mora ma kara whã sô mora ma Ê mêsê. ¹² Punda mora ma ongê sa whã sô tê yô memblu sô turu ané sa memblu ongê é mé, asyé sa mora Kistu. ¹³ Punda ku whã supitu sô, turu non ku whã ongê sô: Ê pô sa zurê, ê pô sa glêgu, ê pô sa pezu, ô livi, sô a zi turu ané ri bêbê whã uniku Supitu. ¹⁴ Punda ongê na sa uniku memblu wha, mazi motxi. ¹⁵ Si opé ka fa: ma na sa mon wha, na sa kiba ongê wha, ané na ka desa ri sa kiba ongê wha. ¹⁶ Sô si oria fa: Punda na sa whê wha na sa kiba ongê wha. ê na ka desa ri sa kiba ongê wha. ¹⁷ Si turu ongê ka sa whê andji ma oria ka sa né! Si turu ongê ka sa oria andji disi ka sa né! ¹⁸ Mazi Dêsu ngolo kara kiba ongê mora ma Ê manda. ¹⁹ Sô si ané ka sa turê memblu é mé andji ongê ka ta né! ²⁰ Punda ê tê yô memblu, mazi whã ongê sô. ²¹ Whê na ka pô fa mon: na pisiza ô wha. Né ntê ra opé: na pisiza sê wha. ²² Masi memblu ongê ku kakô masi faku sa pisizu. ²³ Sô kiba ongê ma non ka kunda ku na sa buaru wha, ê ka valê masi sô kiba ongê non ma a na ka liga wha ka sa masi buaru. ²⁴ Ayé memblu non ku ka musa na pisiza pa a traté ku masi lispetu wha punda ané tê za. Punda Dêsu kontrola turu memblu zuntaru, sô Ê gaba ysi ku sa fata rê. ²⁵ Ê zi kua é mora é pa ané na patxi ku ongê wha, mazi pa ané emblu é ka tlata otô ku whã mora é mé. ²⁶ Sô ola whã memblu ka sufi, turu memblu ka sufi kuê zuntaru. Ô ola a ka ngaba whã memblu turu ané ka sa ku ngoso kuê zuntaru. ²⁷ Punda sê sa kiba ongê Kistu sô kara whã memblu Rê. ²⁸ Sô Dêsu ra ngêza pumbêlu apostulu, segundu pofeta, tisêru mésé, sô ku ka zi milagi, sô mora kula, ané ku ka zura, ané ku ka zi suvisu ngêza sô ané ku tê yô mora lungua. ²⁹ Turu non sa apostulu! turu non sa pofeta! turu non sa mesé! turu non ka zi milagi! ³⁰ Turê tê mora kula! turê ka fa lungua! Turê ka ta lungua! ³¹ ngolo ku vonté masi buaru. Sô nga musa sê whã mondja masi buaru.