¹ Zi mora un, asyé mora ma un sa ri Kistu. ² Ayé nga ngogô ku sê punda sê lembua un ny turu kua sô sê tua turu mora ma un sina sê. ³ Ayé é, un mêsê pa sê ka ta ma Kistu sa ntê turu omé, ma omé sa ntê mengay sô ma Dêsu sa ntê Kistu. ⁴ Kuakuali omé ku ka fa lason ô ka fa kuakuali kua Dêsu ku ntê taparu na ka lispeta untê rê wha. ⁵ Mazi kuakuali mengay ku ka fa lason ô fa kuakuali ua Dêsu ku ntê biriru na ka lispeta ntê rê wha, ê sa mora ma ntê ka sa kokoloru. ⁶ Punda si whã mengay na tapa ntê rê wha, ê tê ki kota pena ntê kutu, si ê sa vegonha ra mengay saku pena ntê kokoloru ma ê ka tapa ntê. ⁷ Punda whã omé na pô tapa ntê rê wha, ê sa fêgula ku goya Dêsu. Mazi mengay sa goya omé. ⁸ Punda a na ka zi omé ku mengay wha mazi mengay ku omé. ⁹ Punda també a na kia omé ra mengay wha, mazi mengay ra omé. ¹⁰ Ra kua é, mengay tê dêtu tê whã meka ri odji ntê rê, punda anzu. ¹¹ Sô, ra Sun, mengay na sa livi omé wha né omé livi mengay wha. ¹² Punda mora ma mengay ka bi ri omé, mora é mé ma omé ka bi ri mengay. Sô turu kua ka bi ri Dêsu. ¹³ Pensé ku sê mé: Ê sa buaru whã mengay fa lason ra Dêsu ku ntê rê biriru! ¹⁴ Nkênu tia ra ané mé na ka sina sê ma, si whã omé tê pena ntê longô, sa whã vegonha ré wha! ¹⁵ Nkênu tia na ka sina sê ma si whã mengay tê pena ntê longô, yé sa ngavi ré wha! Punda pena ntê rê a ré êlê nga véu. ¹⁶ Mazi si nkênu mêsê ngolo demanda ra kua é, non na tê mora é wha, né ngêza Dêsu wha. ¹⁷ Ny kua ma nga sina sê sô na ka gaba sê wha punda ola sê ka zunta, ê na sa pa kua buaru wha, mazi ra piolo. ¹⁸ Asyé, ny pumbê nga, ndê ma ola sê ka zunta ngêza, ê tê kara nkênu mó rê katxi sê, sô nga kêlê kua é. ¹⁹ Punda ê sa bua ma kara nkênu ka sa mó rê katxi sê, ri mora ma nkênu ku sa povaru ka pô sêka bê. ²⁰ Punda ola sê ka zunta, na sa sêia Sun ma sê sêka mé wha. ²¹ Ola sê ka mé, kara whã ka mé mé rê popi antiji pa ôtô zi mé rê. Whã sa ku fomi otô ka sa bebéraru. ²² Sê na tê kay nga mé ku bêbê wha! Sê ka dispéza ngêza Dêsu sô ka baxa ysy ku na tê né whã kua wha! Kuay ma nga pô fa sê! Un toka ngaba sê! Na ka gaba sê ra kua é wha! ²³ Punda kua ma un tua ri Sun sa kua ma nga pasé ra sê, ma Sun Jizu, nsuku ma a pê pezu Ê tua mpó: ²⁴ Sô ola ma Ê ré gasa, Ê patxié sô fa: Yé sa ongê Un ku sa ra sê, zi kua é ka lembua Un. ²⁵ Ri mora é mé, ola sêa, Ê tua kasi sô fa: kasi é sa Liansa Novu ri sangi Un. Zi kua é turu ola ma sê ka bêbê, ka lembua Un. ²⁶ Punda turu vê ma sê ka mé mpó é sô bêbê kasi é, whanga motxi Sun, antê ma Ê ka bi. ²⁷ Sô, nkênu ku mé mpó é ô bêbê ri kasi Sun ri mora mali ka saku kupa ri ongê ku sangi Sun. ²⁸ Ma nkênu ka pia ongê rê pumbê, sô asyé sô ê ka mé mpó é sô bêbê ri kasi é. ²⁹ Punda nkênu ku ka mé ô bêbê sê ta ma ê sa Ongê Sun, ka mé tô bêbê ra zugamentu rê. ³⁰ Punda kua é katxi sê tê yô faku ku duêtxi, sô ê tê whã whã ku muê za. ³¹ Mazi si non ka zuga non mé a na ka zuga non wha. ³² Ola ma Sun ka zuga non sa non sêka tua konsê pa non na sa kondenaru ku mundu wha. ³³ Sô, ané na amon un, ola sê ka zunta pa sê mé, whara otô. ³⁴ Si nkênu sa ku fomi pa ê ka mé fô kay, pa mora ola sê ka zunta na sa pa zugamentu wha. sô ra otô kua ma un siska ra sê, nga sina sê ola nga vitxa.