¹ Paulu, ma Jizu Kistu sama pa ê sa wha apostulu ku sa vontê Dêsu ku Sosteni naamo non. ² Ra ngesa Dêsu ny korintu, ane ma Jizu K istu bila santu, ma a sama ane pa ane sa santu. Non turu sisika ma turu ma a sama ny nomi Sun non Jizu Kistu ny turu nga, Sun ane ku ri non. ³ Ma gasa ku pazi ku sa ku sê kiba Dêsu Tata non ku ri Sun Jizu Kiztu. ⁴ Nga ra gasa semple ra Dêsu um ra sê punda gasa Dêsu ma Jizu Kistu ra sê. ⁵ Ê zi sê liku ku turu, lumba sô ku turukua ma sê ta. ⁶ Asye mora sesemunha Kistu ma a bi ta mora vere katxi sê ⁷ Ku mora ma ê na ka fata sê né whã porê supitu ma sê ka whara ku vonté ra kua ma sê ka bi ta ri Sun non Jizu Kistu. ⁸ Êlê turu ka ra sê fôsa ra infin, pa a na tô viza sê ria Sun non Jizu Kistu. ⁹ Dêsu sa buaru ma ê sama sê pa sê sa kota Ná Rê Jizu Kistu Sun non. ¹⁰ Ayé nga loga sê ná amon ku nomi Sun non Jizu Kistu, pa sê vevia kota otô sô ma sê na pô patxi wha. Nga loga sê pa sê ka sa zuntaru ku whã pensamentu ra whã kua é mé. ¹¹ Punda ê ta klalu ra un, ná amon un ma ngê kay Kloy fa ma katxi sê té divizon ku otô. ¹² Na ka mêsê pa whã whã sê ka fa: Un sa ri Paulu. ô un s ri Apolu, ô un sa ri Sefa ô un sa ri Kistu. ¹³ Kistu sa patxiru! Paulu sô ba kusú ra sê! Sê sa butizaru ny nomi Paulu! ¹⁴ Nga pindji Dêsu ma na butiza né whã sê wha Krispu ku Gaiu sô. ¹⁵ Pa né whã nkênu na fa ma an sô butizé ku nomi un wha. ¹⁶ Un butiza kay Stéfana. Alen ri yé na ta si un butiza whã otô wha. ¹⁷ Punda Kistu na manda un pa un butiza wha, mazi pa un plega vangelhu. Né ku lumba ma omé ta wha, pa kusú Kistu na nula wha. ¹⁸ Punda lekaru kusú sa siriga ra ané ku sê ka pendê. Mazi katxi ané ma Dêsu ska sava, sa porê Dêsu. ¹⁹ Punda ê sa sisikaru: Nga loké ku kua ma ané nkênu ku ka ra ma ané ta kua foga wha ta sô nga tapaia supetu ané ku sina ané. ²⁰ Ngê ta kua ô! Ngê ta lê ô! Ané ku ka pufia ra kua mundu é ô! Dêsu na bila seberô mundu é maloko a! ²¹ Bê ma mundu, ku kua ma ané ta, na ta Dêsu, ka pova Dêsu ku plegason malokô, ku ka sava ané ku kêlê. ²² Punda ané zurê ka pindji milagi sô glegu ka ngolo ta kua. ²³ Mazi non ka plega Kistu ku muê ni kusu sô malokô ra zurê ku zintxi. ²⁴ Mazi ra ané ma Dêsu sama, tantu zurê kuma gêgu, non ka plega Kistu porê ku kua ma Dêsu ta. ²⁵ Punda malokô Dêsu sa masi sêbêrô rkê ané omé sô fakêza Dêsu sa masi demaru rokê omé. ²⁶ Ka pia ané ná amon sê ma a sama. Na masi motxi sê tá ta kua mora kustumu omé, né masi motxi sê tá ku porê, né masi motxi sê nasê buaru wha. ²⁷ Mazi Dêsu koyê kua tapayaru mundu ri zi nkênu ku ta kua tê vegonha, sô koyê ku sá flaku mundu ri zi ku sa fotxi vegonha. ²⁸ Dêsu koyê ku sa soségaru ku dispezaru mundu, tô koyê kua ma a ka bê mora né whã kua, pa a lokê ku turu kua ma a ka fa ku valê. ²⁹ Ê zi kua é pa né whã ngê na tê mora gaba whê Rê wha. ³⁰ Mazi sê ku Kistu Jizu punda kua ma Dêsu zi. Ê bila kua ma Dêsu ta ra non, zustisa, santifikason ku redenson. ³¹ Punda kua é kua ma a sisika ka fa: Nkênu si ku ka ra goya ka ra goya ra Sun.