¹ Taem Jisas i finis toktok, hemi talem long ol disaepol blong hem se, ² ''Yufala i save afta long tu dei, taem blong mekem lafet blong pasova, ol man we oli stap agensem mi, bae oli putum mi, mi pikinini blong man, bae oli nilim mi long kros.'' ³ Nao ol jif pris mo elda oli kam tugeta blong gat wan miting long haos blong ol hae pris, we nem blong hem Kaeafas. ⁴ Oli kam togeta long sikret mo oli mekem wan plan blong arrestem Jisas, mo kilim hem. ⁵ From oli stap talem, ''Bae yumi no save holem hem, long taem blong bigfala lafet blong pasova, from i no gud bae yumi statem wan bigfala faet. ⁶ Nao Jisas i go long Bethany long haos blong Saemon, man we i gat rabis sik long skin, ⁷ taem hemi stap kakae long tebol, wan woman i kam long hem we i karem wan botel blong alabasta, long botel ia i gat wan senta we praes blong hem i sas tumas, hemi kafsaedem long hed blong Jisas. ⁸ Taem ol disaepol oli luk, oli kros nao oli talem se, ''From wanem woman ia i westem senta ia olsem? ⁹ Hemi sud salem, mo karem mani, mo givim long ol pua man.'' ¹⁰ Be Jisas hemi save tingting blong olgeta nao hemi se, ''From wanem yufala i spolem woman ia? Hemi mekem wan gudfala samting long mi ia. ¹¹ Bae evri taem yufala i stap wetem ol pua man, be bambae mi no save stap oltaem wetem yufala. ¹² Taem hemi kapsaedem senta ia long bodi blong mi, hemi mekem redi blong oli berem mi. ¹³ Tru mi talem long yufala, taem gud nius ia oli prijim long ful wol, bae oli tingbaot woman ia bakeken. ¹⁴ Nao wan long ol twelve disaepol we nem blong hem Judas Iskariot hemi ko long ol jif pris. ¹⁵ Nao hemi talem se, ''Wanem samting bae yufala givim long mi spos mi putum Jisas long han blong yufala?'' Nao oli givim toti pis blong silva long hem. ¹⁶ Long taem ia hemi stap faenem rod nao blong putum Jisas long han blong olgeta. ¹⁷ Nao long fes dei blong kakai bred we i no gat is, ol disaepol oli kam long Jisas, nao oli talem se, ''Wea ples nao yu wantem mifala i preperem, ples blong kakae pasova long hem?'' ¹⁸ Jisas i talem se, ''Yufala i go long taon ia bae yufala i luk wan man, bae yufala talem long hem se, ''Tija i talem se, taem blong i stap kam klosap nao bae mi kakae pasova long haos blong yu.'' ¹⁹ Ol disaepol oli mekem wanem we Jisas i talem long olgeta, nao oli preperem kakae blong pasova. ²⁰ Taem naet i kam, hemi sidaon wetem ol disaepol blong hem. ²¹ Taem oli stap kakae, hemi talem se, ''Tru mi talem long yufala se wan bae letem mi i go long han blong ol enemi.'' ²² Ol man blong hem oli sore tumas, nao wan wan long olgeta oli stap askem hem, ''Masta? Hu ia? Mi?'' ²³ Hemi ansa i se, ''Man we mi tufala i pusum han tugeta long wan dish, hemia nao bae i letem mi long han blong ol enemi. ²⁴ Bae pikinini blong man bae i go, olsem we oli talem. Be sori tumas blong man ia we i letem mi long han blong ol enemi! I moa gud man ia i no bon nomo.'' ²⁵ Nao Judas, man we i letem Jisas long han blong emeni i askem se, "Tija huia, mi?'' Jisas i talem long hem se, "Yu nomo yu talem olsem." ²⁶ Taem oli stap kakae, Jisas i karem bred, i blesem nao hemi brokem, nao i givim long ol disaepol, mo i talem se, ''Tekem, mo kakae hemia bodi blong mi.'' ²⁷ Hemi tekem wan cup mo hemi talem tankyu, nao i givim long olgeta mo i talem se, ''Yufala evri wan i dring long cup ia. ²⁸ From hemia blad blong mi, we i blong promes from bae i ron aot blong tekem aot sin blong fulap man. ²⁹ Be mi talem long yufala, bae mi nomo dring waen ia bakeken kasem dei we bae mi dring long niufala ples wetem yufala long kingdom blong papa blong mi.'' ³⁰ Oli singsing long wan hymn, nao oli aot oli go antap long wan hil, nem blong hem, hil blong tri ia olives. ³¹ Nao Jisas i talem long olgeta, ''Bae yufala evri wan long naet ia, bae biliv blong yufala bae i foldaon from mi. From oli talem long Baebol se, ''Bae mi kilim man blong sipsip nao bae ol sipsip oli go wanwan.'' ³² Afta we mi laef bakeken long ded, bambae mi go fastaem long Galili.'' ³³ Be Pita i talem long hem se, ''Spos evri wan biliv blong olgeta i foldaon from yu, bae mi no save foldaon.'' ³⁴ Jisas i talem long hem, ''Tru mi talem long yu, long naet ia bifo man faol i singaot, bae yu talem se, yu no save mi tri taem.'' ³⁵ Pita i talem long hem, ''Nating spos mi ded wetem yu, bae mi no save, mi no save talem se mi no save yu.'' Evri narafala disaepol oli talem semak toktok. ³⁶ Nao Jisas i go wetem olgeta long karen ia Gretsemeni, nao i talem long ol disaepol blong hem, ''Yufala i sidaon long ples ia, bae mi go long we bambae mi prea.'' ³⁷ Hemi tekem Pita mo tu narafala boe blong Sebedi, nao hemi sori mo i harem nogud. ³⁸ Nao hemi talem long olgeta se,'' Tingting blong mi i hevi tumas, klosap mi ded from. Yufala i wet ia mo yufala i stap wekap wetem mi.'' ³⁹ Hemi go long we smol, hemi nil daon long fes blong hem, nao hemi prea. Hemi se, ''Papa, spos yu save mekem i isi, plis yu tekem aot cup ia long mi. Be yu no mekem olsem we mi wantem, be yu nomo yu wantem.'' ⁴⁰ Hemi kam long ol disaepol hemi luk olgeta oli sta slip nao i talem long Pita, ''Olsem wanem? yufala i no save wekap wetem mi long wan haoa? ⁴¹ Yufala i mas lukaot gud, mo yufala mas prea, from bae wan samting bae i no traem yufala, blong yufala i foldaon. From tingting blong yufala, i strong be bodi blong yufala i slak.'' ⁴² Hemi gobak sekon taem blong bae hemi prea, hemi talem se, ''Papa spos mi mas harem nogud kasem en, plis yu mekem olsem we yu wantem.'' ⁴³ Hemi kambak i luk olgeta oli stap slip, we ae blong olgeta i hevi tumas. ⁴⁴ Nao hemi lego olgeta bakeken, nao i go long we bakeken nao hemi prea namba tri taem, i talem sem toktok. ⁴⁵ Nao Jisas i kam long ol disaepol, nao i talem long olgeta se, ''Yufala stap slip iet, yufala stap spel? Yufala i luk, taem i kam finis blong man ia i letem mi, mi pikinini blong man, mi go long han blong ol enemi. ⁴⁶ Yufala i stanap, yumi go, yufala i luk man we hemi glad blong letem mi long han blong ol enemi, hemi kam klosap nao.'' ⁴⁷ Taem Jisas i stap toktok iet, Judas, wan long ol twelev man i kam. Wetem wan bigfala group blong ol jif pris mo ol elda blong ol man ia, oli kam wetem ol naef, mo ol nalnal blong olgeta. ⁴⁸ Nao man we bae i putum Jisas long han blong ol enemi, i mekem wan saen long olgeta, i talem se, ''Man we mi kisim, hemia nao yufala i mas holem hem.'' ⁴⁹ Nao wantaem nomo hemi hariap i kam long Jisas i talem se, ''Halo Tija!'' nao hemi kisim hem. ⁵⁰ Nao Jisas i talem long hem, ''Fren, yu gohed long samting we yu kam from.'' Nao oli kam holem taet Jisas. ⁵¹ Be, wan long olgeta we oli stap bihaen long Jisas, i pulum aot naef i katem aot sora blong wan wokman blong ol jif pris. ⁵² Nao Jisas i talem long hem se, ''Yu putum bak naef ia i go bak long ples blong hem, man we i faet long naef blong faet, bae i ded long naef blong faet. ⁵³ Yufala i ting se bae mi no save singaot long Papa blong mi blong sendem mao long twelev bigfala grup blong enjel blong givhan long mi? ⁵⁴ Be sipos mi mekem olsem, ol tok long baebol we i talem ol samting bae i kam tru, bae i kam tru olsem wanem?'' ⁵⁵ Long taem ia, Jisas i stap talem long evri man se, ''Yufala i ting se yufala i kam wetem naef mo nalnal blong holem mi olsem wan man blong stil? Evri dei mi sidaon long ol tempol mi stap tij, from wanem yufala i no wantem arrestem mi. ⁵⁶ Evri samting i kam tru from ol toktok blong profet oli talemaot bifo.'' Nao ol disaepol oli ronwe wanwan. ⁵⁷ Olgeta we oli holem Jisas oli tekem hem i go long Kaefas hae pris, long ples ia ol tija blong loa, mo ol elda oli stap tugeta finis. ⁵⁸ Be Pita hemi folem Jisas, be i no go klosap long hem, kasem yad we bigfala haos blong hae pris i stap long hem, hemi go sidaon wetem ol man blong hae pris, blong luk se bae oli mekem wanem long Jisas. ⁵⁹ Nao ol jif pris, mo ol memba blong kansel oli stap lukaot sam kiaman stori blong go agensem Jisas, blong oli save kilim hemi ded. ⁶⁰ Be oli no faenem wan nating, i gat fulap kiaman witnis i kam be nogat nomo. Be afta long hemi i gat tu witnis i kam antap. ⁶¹ Nao tufala man ia i talem se, ''Man ia i talem se, bae hemi save spolem haos blong God ia, mo long namba tri dei bae i save buildimap bakeken.'' ⁶² Nao hae pris i kirap i talem long olgeta se, ''yu nogat wan ansa? olsem wanem long ol poen we oli stap talem agensem yu? ⁶³ Jisas hemi stap kwaet nomo, nao hae pris i talem long hem, ''Hae God i laef i stap we i stap, talem long mifala se yu mesaea, yu pikinini blong God?'' ⁶⁴ Jisas i ansa long hem se, ''Yu nao yu talem olsem, be mi talem long yu se, i stat naoia i go bae yufala i luk pikinini blong man, i sidaon long raet han blong God, we i gat olgeta paoa, mo bae mi sidaon long claod bae mi aot long heven mi kam daon.'' ⁶⁵ Nao hae pris ia i terem klos blong hem i talem se, ''Hemi tok nogud ia! From wanem yumi nidim witnes? Yufala i luk naoia yufala i harem we oli tok nogud long nem blong God. ⁶⁶ Wanem tingting blong yufala?'' Oli talem se, ''Hemi mas ded.'' ⁶⁷ Nao oli spet long fes blong hem, oli faetem hem long fes blong hem mo sam oli slapem hem, ⁶⁸ mo oli talem se, ''Spos yu Kraes, yu talem long mifala se, hu i kilim yu?'' ⁶⁹ Nao Pita i sidaon aotsaed long yad blong kot haos, i gat wan haos gel i kam long hem, i talem se, ''Yu wan we yu stap folem Jisas ia blong Galili.'' ⁷⁰ Be long fes blong olgeta, Pita i talem se, ''Mi no save wanem we yu stap talem.'' ⁷¹ Taem Pita i aot long get, long narafala yad, mo i gat wan narafala haos gel i luk hem, mo gel ia i talem long ol man we oli stap stanap long ples ia se, ''Mi luk man ia i stap bihaen long Jisas man Nazareth.'' ⁷² Be Pita i talem wan strong toktok, i talem se, ''Mi no save man Nazareth ia!'' ⁷³ Nao i no long taem, ol man we oli stap stanap long ples ia oli kam long Pita oli talem se, ''Yu yu wan long olgeta, from fasin blong toktok blong yu, i soemaot se yu wan long olgeta.'' ⁷⁴ Be Pita i tok strong i talem se, ''Mi no save man ia. Sipos mi kiaman, God bambae i panisim mi from.'' Nao stret long taem ia faol i singaot. ⁷⁵ Nao Pita i tingbaot tok ia, we Jisas i talem long hem se, ''Bifo taem faol i no singaot iet, bae yu talem tri taem se yu no save mi.'' Nao hemi go aotsaed, mo hemi krae strong.''