अध्याय 11

1 विश्वास जो आशा तेअली गोठीई भोरुसो, आन नेय देखाणाऱ्या गोठी खात्री एहन्डो हाय. 2 विश्वास बाबतीम आमा आगला डायाहा साक्षी देवुलाम आली. 3 विश्वासाकी आनपेहेन होमजाहाय का देवा शब्दाकी दुनिया बोनी म्हणजे ज्या गोठ्या देखात्याहा त्या देखात्या गोठीहीपने वेअयो नाहा 4 विश्वासाकी हाबेलाय काईनासेबी खुब हारो बलीदान देवाल अर्पन केअलो तियाहाकी तो नितीमान हाय एहंन्डो साक्ष देवुलाम आली, काहाका देवाय तिया अर्पना बाबतीम साक्ष देदी, आण तिया खातोर तो मोअय गीयो तेबी आजी बी गोगेहे. 5 हनोखाल मुत्यू अनुभव आवा नाय जोजे आखीन, तियाल विश्वासाहाकी आद्रदोर उसली लेवुलाम आलो आन तो केडालुज कीही सापड्यो नाहा, काहाका तियाल आद्रदोर ऊच्चे उसली लेवुलाम आलो तीयाल आद्रदोर उसली लेवुलाम आलो तियासे पेहला तिया बोद्रदल एहकी साक्षी देवुलाम आली का, तो देवाल पेटे एहंडो काम केअतलो. 6 पेन विश्वासा सिवाय तियाल खुब केअनु अशक्य हाय, काहाका जो तिया पाही आवेहे तियाय विश्वास थोवा जोजे का, तो हाय आन जो तियाल खेरा मोनाहाकी होदेहे यिताल तो प्रतीफल देणारो हाय. 7 विश्वासाहांकी नोहाय पेअला किदीहीज नेय देखाणाऱ्या एहंडी गोठी सुचना मिली तियाप्रमाणे आदराहाकी बिख थोविन आपु कुटबो वाचावा खातोर विश्वासाहाकी उड्यो बोनव्यो आणी तियाहाकी तियाय दुनियाल दोषी ठरव्यों आण विश्वासाहाकी मिलनारो नितीमत्तवा तो वारस बोन्यो. 8 आब्राहामाय विश्वासाहाकी तियाल जो जागो वतन म्हणुन मिलणारो आथो तो केअहन्डो हाय आन तो किही जाणारो आथो तो केअहन्डो हाय आन तो किही जाणारो आथो तो केअहंन्डो हाय आन तो किही जाणारो आथो इ बी तियाल मालुम नाय आथो तेबी तियाय आज्ञा पाली आन निगी गियो 9 विश्वासाहाकी तो प्रतीज्ञा देशाम जेहकी परदेशाम गोवारांहा होच रियो; आन तिज वतना देशाम तिया जोडी वारीस इसहाक आण याकोब ह्याहा आरी डेऱ्याम वस्ती किइन रेतला. 10 काहाका जियाल योजनारो आण बांधणारो देव हाय एहंन्डा नगरा आब्राहाम वाट जोवतोलो. 11 विश्वासाकीज सारा डायी तेबी दिही रेवनु क्षमता मिली काहाका जियाय तियुल आखलो तियाल तियुय विश्वासालायकी मानलो. 12 तियाहाल फोक्तो एकापणेज आन तो बी मोअलाहा होच आथो तेबी तियापणे आकाशामने जोतेहे तारेहाय तियाहा होच, दारीया तोळी जोतोहो रेअको रेहे तियाहा होच मोजता नाय आवे ओतिही संतती बोनवी देदी. 13 इ बाद्रदे विश्वासाम टिकी मोअय गिये तियाहान वचन मिललो नाय आथो पेन तियाहाय दुरनेज विइन खुष वेअये आन तियाहाय मानी लेदो का आपु इ पृथ्वी प पारके आन प्रवासी हाय. 14 काहाका एहडो जो आखेहे तो स्वता देश मिलवा होदेहे इ तो देखवेहे, 15 आन खेरोज ते ज्या देशामने निधी आलले आथे ते ती देशा फाचे विचार केअते ता तिही फाचे फिरी जावनु संधी तियाहान मिलती. 16 पेन आमी ते या सेबी हारी दुनिया म्हणजे होरगा देशा इच्छा केअतेहे हया खातोर तियाहान आपु देवा आखी ला केअता देवाल तियाहा लाज नाहा आवती. तियाल तियाहा खातोर तियाय एक नगर तिया केअयोहो. 17 आब्राहामा परिक्षा वेअली ताहा विश्वासाहाकी इसहाका अर्पन केअलो म्हणजे जियाय वचना स्वीकार केअलो तियाय तिया एकुलतो एक पोयरो अर्पन केरा निगलो. 18 तिया बोद्रदल एहकी आखलो आथो का इसहाकाज वंशाल तुमा पोयरे आखी. 19 तेबी देव मोअलामने बी तियाल उठवा समर्थ हाय एहकी तियाय मानलो आथो तो तियाल तिहीने एहकी न्याकअणी अर्थाकी फाचे मिली गेहलो, 20 इसहाकाय, याकोबाल आण एसावाल आवाणाऱ्या गोठीही बोद्रदल विश्वासाहाकी आशिर्वाद देदो, 21 याकोबाय मोअनु टाइमाप योसेफा बाद्रदा पोयराहान विश्वासाहाकी आशिर्वाद देदो, आन आपु डिनकी टोकाप टेकीन पागे पाड्यो 22 योसेफ जाहा मोअणारो आथो ताहा विश्वासांकी इस्त्राएला संतानाहा निगी जावणु गोठ्या केअया आन सोअताहा आटकाहा बोद्रदल आज्ञा केअयी, 23 विश्वासाहाकी, मोशे जन्मवेअयो ताहा तिया याहकी बाहकाय तियाल तीन मायना दोबावी थोव्यो काहाका पोयरो खुब बाहरी देखाहाय इ तियाहाय वेअयो आन तियाहान राजा हुकूमा नाहा लागी. 24 मोशेय विश्वासाहाकी तो मोडो वेअयो ताहा फारो पोयरो आखावुलासे ना कबुल केअयो 25 तियाल पाप किइन तातपुरतो मिली तिया पेआ देवा लोकाहाआरी दु:ख भोगणु तियाय पसंद केअयो 26 आन ख्रिस्ताखातोर दु:ख भोगंणु इ मिसर देशा भांडारासेबी मोडो धन होमज्यो काहाका तिया डोअवा फल मिलवुनू होवे लागलो आथो 27 विश्वासहाकीन तियाय राजा रोगील नाय बिअता मिसर देश सोडी देदो जेहकी काय नाय देखनारी गोठी तियाल देखाय रियीही तेहकी तो ठाम रिइयो, 28 विश्वासाहाकी तियाय वल्हाडंन आन रोगोत हिपडुनू विधी पाली, तो या खातोर का पेहलो जन्माल आललाल माअणाराय तियाहान आथ नाय लागवा जोजे. 29 विश्वासाहाकीज ते लाल समुद्रमेने एहकी चाली गीये जेहकी हुकाली वाटीपने आन जाहा मिसरी बी तेहकीज केरा गिया ताहा ते बुडी मोअया 30 विश्वासाकीज ते सात दिही यरोहो तिथडा सोमकी फिऱ्या आण पिथळो पोडी गीयो. 31 विश्वासाहाकीज राहाब वेश्या आज्ञा नेय माननाराहा आरी नाश वेअवी काहाका तियुय शांतीहीकी हेराहान सामालीन थोव्यो. 32 आण आमी आजी जास्ती काय आखु? गिदोन बाराक शमशोन आण इप्ताह तेहकीज दावीद शमवेल आण संदेष्टा, याविषयी आय आखा लाग्यो ता माल टाइम नाय पुरे. 33 तियाहाय विश्वासाहांकी राज्ये जिक्यो हारे कामे केअले वचने मिलव्ये सिंहा मुअयें बोंद केअये 34 तियाहाय आगी शक्ती पारवावी तालवारी धारीहीयने वाचाय निग्ये अशक्तपणाम शक्तीपाला वेअया. युध्दाम पराक्रमी वेअया तियाहान बिहीरा सैन्याहान ठोकीन नाहवावी देदे. 35 केत्याहा तेबी थेयीही तीयुहू मोअलाहान फासे जिवावीन मिल्ये. कोतेहेता मार खाय खायन मोअय गिये पेन छुटकारो नाहा माग्यो, काहाका हारा पुनरुत्थाना भागी विहु आखीन. 36 कोताहा ठठ्ठा उडवी आन जाबका मार खाहान बांधाया पाड्यो, आन कैदीम पोडु लाहाकी ओअखाय आला. 37 तियाहान दोगडाहाकी ठोकुलाम आलो तियान करवतीहीकी वाडया, तियाहान पारखुलाम आलो ते तारवारीकी मोअय गिया, ते दुरकेला कोमीकेला तारासाम पोडला वीइन ते मेडाहा आन बोकडाहा चांबडो फांगीन भोटक्या. 38 जग तियाहा लायकी नेय आथो ते जोंगलामने डोगाहामेने गुफामेने आन तोरतिमेने खोडकामने फिरता रिया. 39 विश्वासाहांकीज इयाहा बोद्रदल हारी साक्षी देऊलाम आली तेबी तियाहान प्रतिज्ञा केअली वस्तु नाहा मिली. 40 मिली तो आपुसिवाय पुरो नाय वेरा जोजो काहाका देवा नोजरीम तियासेबी हारी वस्तु आपुकेअता हाय.