¹ Kemudion, malaekat iye menujokko kepadoke sungoi aek kehidopon, nyo celang upa kristal, mengaler jak takhta Allah ngan Anak Domba ² de tangah-tangah jelon kota iye. De kedua sisi sungoi, tomboh kayu kehidopon nyo menghaselko dua belas jenis buah ngan menghaselko buahnye setiap bulan. Doun-doun kayu iye degunako untok ngubati bengesa-bengesa. ³ Hopi nak ado lagi kotok, hambok takhta Allah ngan Anak Domba nak ado de delom kota iye. Hambo-hambo-Nye nak meNyembah Nye. ⁴ Mike nak ngelek moka-Nye ngan namo-Nye nak tetoles pado koneng mike. ⁵ Malom hopi nak ado lagi singgo mike hopi memerluko cehayo lampu atau matoari ulenyo Tuhan Allah nak menarangi mike, ngan mike nak memerentah selamo-lamonye. ⁶ Malaekat iye buek kepadoke, "Segelo perkataon nie depot depecayo ngan bonor. Tuhan, Allah deri roh padong nabi,* menyoroh malaekat-Nye untok menonjokko kepado hambo-hambo-Nye ape nyo haros segera terjedi. ⁷ Dongorlah, Ake segera njongok! Deberkatilah urang nyo menaati perkataon-perkataon nubuat* kitab nie." ⁸ Ake, Yohanes, nyo lah dongor ngan ngelek segelonye iye. Tekaloh ake dongor ngan ngelek segelonye, ake besojot untok meyembah de kaki malaekat nyo lah menonjokko segelo iye kepadoke. ⁹ Hambok, nye boek kepadoke, "Jengon lakuko iye! Ake adolah hambo samo upa kowe ngan dolor-dolorme, padong nabi, serta upa mike nyo menaati pembuikon-pembuikon delom kitab nie. ¹⁰ Kemudion, malaekat iye buek kepadoke, "Jengon menyegel perkataon-perkataon nubuat delom kitab nie ulenyo waktunye lah parok." ¹¹ Biarko urang nyo benubuat jahat tetap bebuat jahat, urang nyo hopi suci tetap hopi suci, urang nyo bebuat bonor tetap melakuko kebonoron, ngan urang nyo kudus tetap mengudusko dirinye." ¹² "Dongorlah, Ake segera jongok! Ngan, Ake ngundah upah-Ku, untok membelos setiap urang menorot perbuatonnye. ¹³ Ake adolah Alfa ngan Omega , Nyo Pertamo ngan Nyo Teakher, Nyo Awal ngan Nyo Akher. ¹⁴ Deberkatilah mike nyo bessoh jubah mike singgo mike mempunyoi kayu kehidopon iye ngan masok ke kota iye melewati pintu-pintu gerbangnye. ¹⁵ Nyo deluor kota iye adolah anjeng-anjeng, urang nyo melakuko seher, urang-urang pencarot, padong pembunoh, padong penyembah patong, ngan urang-urang nyo agom kepelatohon. ¹⁶ Ake, Yesus, lah menyuruh malaekat-Ke untok besaksi kepadome tentang segelonye nie bage jemaat-jemaat. ( Akelah tunos ngan keturunon Daud*,Sang Bintang Timur nyo benderang." ¹⁷ Roh* ngan penganten betina iye buek, "Marolah!" Biarlah urang nyo ndongor nie buek, "Marolah!" Biarlah urang nyo raus njongok; biarlah urang nyo besedio mengambek aek kehidopon secaro cuma-cuma." ¹⁸ Ake besaksi kepado segelo urang nyo dongor pembuekon nubuat kitab nie: "Munye ado nyo menamboko sesuatu pado perkataon-perkataon nie, Allah nak menamboko kepado nye segelo bencana nyo tetules delom kitab nie. ¹⁹ Ngan, munye ado nyo mengurangi sesuatu deri perkataon-perkataon delom kitab nubuat nie, Allah nak ngambek bageonnye deri kayu kehidopon, deri kota kudus, ngan deri hal-hal nyo tetules delom kitab nie." ²⁰ Enye nyo besaksi mengenai hal-hal nie buek, "Ao, Ake enggakkonyo njongok."Amin*! Njongoklah, Tuhan Yesus! ²¹ Anugerah Tuhan Yesus menyertai kowe segelo.Amin.