¹ Mengka, ake mengoleh malaikat turun deri serga mengunda kunci jurang maut ngan sebuah rantoi godong de tangonnye. ² Enye menangkop nago iye, si ulor tuha, nyo adolah setan ngan beles, ngan mengobotnye selamo seribu tahun, ³ Melemparkonye ke delom jurang maut, menukupnye, ngan menyegelnye enggakkonyo enye hopi bakal menyosotko bengeso-bengeso lage, ampoi seribu tahun iye beaher. Lah iye, enye bakal delapasko untok setegal. ⁴ Mengka, ake mengoleh takhta-takhta ngan de pucuknye duduk urang-urang nyo de bori kuaso untok menghakemi. Ake mengoleh jiwo urang-urang nyo de pancung kepalonye ulehnyo kesaksion Yesus ngan ulehnyo firman Allah, ngan mike nyo hopi menyembah binatong iye atau patungnye ngan hopi menerimo tando binatong iye podo dahi atau tangon mike. Mike hidop belek ngan memerentah serompok Kristus selamo seribu tahun. ⁵ Cuma hambuk, urang-urang te'elek nyo loinnye hopi hidop lage sebolum maso seribu tahun iye beaher. Nielah kebangketon nyo pertamo. ⁶ Deberkati ngan kuduslah urang-urang nyo memperuleh bageon delom kebangketon* pertamo iye. Terhadop urang-urang nie, kemation kedua hopi bekuaso, hambuk mike bakal menjedi imam-imam Allah ngan Kristus, ngan bakal memerentah serompok Enye selamo seribu tahun. ⁷ Lah maso seribu tahun beakher, Beles bakal de lapasko deri penjaronye. ⁸ Enye bakal pogi untok menyosotko bengeso-bengeso podo keempat penjuru behumi, Gog ngan Magog, ngan mengumpulko mike untok beperang. Jumlah mike upa bungen de lout. ⁹ Mike noek ke dataran behumi ngan mengepung perkemahon urang-urang kudus ngan kota nyo terkaseh. Cuma, api turun deri langet ngan menghangusko mike. ¹⁰ Mengka, Beles nyo lah menyosotko mike de lemparko ke delom louton api ngan belerang, de sanelah binatong ngan nabi pelesu iye jugo de lemparko. Mike bakal de sikso tangah hari ngan malom selamo-lamonye. ¹¹ Lah iye, ake mengoleh takhta puteh nyo godong ngan Enye nyo duduk de pucuknye, nyo deri hadopon-Nye behumi ngan langet sayau ngan hopi de tomuko lage tempat bage mike. ¹² Ngan, ake mengoleh urang-urang te'elek, godong ngan kecik, togok d hadopon takhta iye. Mengka, de bukalah kitab-kitab, yaitu kitab kehidupon, ngan urang-urang te'elek iye de hakemi bedasarko ape nyo tetules delom kitab-kitab iye, sesuai perbuaton mike. ¹³ Lout menyerahko urang-urang te'elek nyo ado de delomnye, maut ngan Hades jugo menyerahko urang-urang te'elek nyo ado de delomnye ngan mike de hakemi, maseng-masenhg menurut perbuatonnye. ¹⁴ Mengka, maut ngan Hades de lemparko ke delom louton api. Nielah kemation nyo kedua-- louton api. ¹⁵ Apebila seseurang namonye hopi tetules delom kitab kehidupon, enye bakal de lemparko ke delom louton api iye.