( Salam Jak Yudas ) ¹ Jak Yudas, pelayan Yesus Kristus ngan dulur Yakobus, de tujuko ngan urang yang lah de pileh ngan dekasehi Allah Bepa, sereta de peliharo bage Yesus Kristus. ² Kironye belas kaseh damoi sejahtera ngan kaseh melempahi me. ³ Dulur dulur nyo kekaseh, sementaro niye akelah beusaha semampu ke menyampoiko ngan mike hal keselamaton kite segelonye, ake meraso perlu menyampoiko tong niye ngan mike ake nyerayo empoknyo mike bejuang nenihan beiman nyo lah de sampaoiko sekali sampoi selamonye ngan urang - urang kudus. ⁴ Sabab ado urang- urang tetentu lah menyelibu tanpo de sadari, iyelah urang sejak tekelahe lah de tentuko patut de hukom, urang- urang pi beiman menyalohgunako Anugerah Allah kite ngan tujuon memuasko nafsu ngan menulak sikuk- sikuknye penguaso ngan Tuhan kite Yesus Kristus. ⁵ Ake sekedar mengingatko me meskipon kowe lah mengetahuinye seponohnye, behwa Tuhan lah menyelamotko Umat-Nye sejak mengeluorko jak tanoh Mesir ( Zaman nabi Musa ) , tapi akhirnye ado jugo urang yang Tuhan binasoko ulenyo nye pi pecayo. ⁶ Ngan ado jugo meléikat -meléikat nyo pi taat ngan batason- batason kekuasoonnye, meloeinko nyo usir jak asalnye, nyo kobot ngan rantoi delom kurungon paleng saro sampoi ari penghakimon, todo e. ⁷ Demikionlah halnye jugo Sodom ngan Gemora sereta kota-kota desekitarnye, nyo memuasko hidopnye delom doso pezinahon ngan nafsu nyo pi wajar, sehinggo lah harus menanggung api hokumon paling saro supayo de jediko pelajoron. ⁸ Uleh sebab akibat urang-urang zaman iye mengandalko mimpi- mimpinyo ngan mencemarko tubuh ( badan jasmaninye), sereta menulak kekuasoon , ngan mehimak segelo ajoron tong Kuaso e. ⁹ Perelu samo kito ketahui behwa, Mikhael bae yang Tuhan jediko penghulu meleikat de seregae, tekela nye nyo lagi betengkar ngan belis mesalah buntang Musa e, pi berani ngehatoko cacion keenye, seloin anyo ngehatoko, " Kironye Tuhan ne bemarah ngan mike!" ¹⁰ Malahahon urang - urang tukang penyosot iye mencacimaki ngan sok padek dewek mesalah hal tong bolum nyo ketahui, pado hal anyo ngetauinye bedasarko nalurinye, sajo perecis binatong pi be pekeron ngan akal, uleh sabab tong niye lah nye rombongon iye lah peseti depot hukomon jak Tuhan. ¹¹ Celakolah mike! olenyo mike lah mehilu jelon tong pi beik iyelah jelon Kain jeloni niye, ngan ngejar keserakahon upa perangi Bileam sereta pemberontak upa perangi Korah. ¹² Urang macam iye upah ceret delom peseduluron me, hopi ado lagi raso malu ngan pi peduli dengan awok dewek. Urang macam iye upah awan pi pacok ngundah hujan, slalu nak bemusuhon ngan kanti, piado jugo pendirion delom hidupnye, hidupnye teraso piado tujuon ngan aher nye benaso. ¹³ Urang macam niye jugo upa ombak lout nyo ganas, mbuat malu awok dewek, upah benatong liar piado kepatuhon delom hidupnye sereta tujuonye kebenasaon. ¹⁴ Demikionlah halnye jugo ngan sejarah hidup urang yang hidup bonor de mato Tuhan upah misalnye Henokh, keturonon ketujuh jak Adam bernubuat, " Kelek lah mike todo akan hidup delom kepastion delom serega serompok urang -urang kodos-Nye. ¹⁵ sereta menyaksiko penghakimon hidup segelo urang fasik, ngan pindok pecayo ngan Tuhan ne, sehinggo hidupnye ponoh ngan doso . ¹⁶ Urang macam iye piado keyakinon, agom bebuat tong jahat, mehilu hawo nafsunye sereta selalu memekerko kepentingonnyo dewek. ¹⁷ Dolor- dolor nyo kekaseh, mike haros ingot tong lah de kehehato rasol- rasol Tuhan kite Yesus Kristus. ¹⁸ Beroyot iye lah melabehko ngan me, " tando- tando akher zaman ne akan bemunculon urang pehimak pehimak yang pi pecayo dengan Iman, rombongon iye sajo agom dengan caro hidup urang fasik". ¹⁹ Urang macam niye selalu agom dengan permusuhon ngan kanti, sabab hidupnye selalu mehilui hawo nafsu denia bukon Roh . ²⁰ Mangkonye dolor- dolorku yang kekaseh, betobatlah ngan nenihan berdasarko iman me yang paling suci sereta berdoalah delom Roh Kodos. ²¹ peliharolah hidop me delom kaseh Allah sereta rahmat Tuhan kite, Yesus Kristus penuntun hidop kekal. ²² Hiduoplah delom kerendahon hati bage urang yang lagi ragu-ragu, ²³ kabarkolah keselamaton kanti kite nyo bolom pecayo ngan Tuhan empoknyo hidopnye pi benaso de api nerako. hiduoplah delom kaseh dengan songgoh- songgoh sereta jengon lagi hiduop menoroti hawo nafsu denia. ²⁴ Tuhan Allah lah bekuaso menjego i me empok hopi lagi hidop delom doso ngan endok nerimo kite de tahta kemuliaon-Nye dengan bersukacita. ²⁵ Hanyo satu-satunye Allah, Juruselamat kite, melalui Kristus Yesus, Tuhan kite, kemulioon ngan kuaso sepanjong maso: Jak tekelahe, kinie, sampoi selamo-lamonye. Amin.