¹ Teroslah memeliharo kaseh seduluron ! ² Ingotlah selalu untok membori tumpangon kenempat urang-urang asing ule dengan melakuko hal iye, beberape urang lah menjamu malaikat-malaikat pi mike sadori. ³ Ingotlah urang-urang nyo depenjaro solah-olah kowe depenjaroko serompok mike, ingotlah jugo urang-urang nyo de aniayo sabab kowe pun berado de delom badan. ⁴ Perkawinon arus de junjung dengan ponuh hormat ule segelo urang, ngan jegolah dipan perkawinon empuknyo tetap murni, sabab Allah bakal menghukom urang-urang nyo cabul ngan padong pezina. ⁵ Jouhkolah hidopme deri cinta duit, ngan cukupkolah dirime dengan ape nyo kowe miliki sabab Enye dewek buik: " Ake hopi bakal meninggalkome, ngan hopi bakal perenah mengabaikome." Ulangan 31:6 ⁶ Jedi, kite depot buik dengan ponuh keyakinon : ' Tuhan adolah penolongke, ngan ake hopi bakal takut. Ape nyo depot de lakuko urang terhadopke?"Mazmur 118:7 ⁷ Ingotlah padong pemempenme, mike nyo lah mengajarko firman Tuhan kenempatme. Perhatikolah hasel deri caro hidop mike, ngan contohlah iman mike. ⁸ Yesus Kristus tetap samo, Kamarie, sarinie, ngan sampoi selamo-lamonye. ⁹ Jengonlah kowe de sesatko ule pengajaron nyo bemacam-macam ngan nyo hopi kowe kenal; ule adolah hal nyo beik behwo hati de kuatko ule anugerah, bukon ule aturon tentang makonon nyo hopi membori manfaat bage mike nyo menjalaninye. ¹⁰ Kite mempunyoi altar nyo derinye urang-urang nyo melayoni de kemah suci hopi berhak untok makonon. ¹¹ Ngan, ule badan deri hewan-hewan nyo derohnye de unda ule imam godong ke Runag Mahakudus sebage persembahon penebuson doso de tunu de luor perkemahon, ¹² Mengka Yesus jugo menderito de luor gerbang kota demi mengudusko umat-Nye dengan deroh-Nye dewek. ¹³ Ulenyo iye, marolah kite menomui Yesus de luor perkemahon, ngan memikul kehinaan nyo samo dengan kehinaan nyo lah de pikul-Nye. ¹⁴ Sabab, de behumi nie kite hopi mempunyoi kota nyo bakal ado untok selamo-lamonye, hambuk kite sedang menantiko kota nyo bakal njongok. ¹⁵ Ulenyo iye, melalui Kristus marolah kite torus menorus mempersembahko kurban pujion kenempat Allah, yaitu ucapon bibir nyo memuliako namo-Nye. ¹⁶ Jengonlah kowe lupa berbuat beik ngan membagiko ape nyo kowe miliki ule kurban upa iyelah nyo menyenangko Allah. ¹⁷ Taatlah kenempat padong pemempenme ngan tunduklah kenempat mike ule mikelah nyo menjego jiwome ngan nyo arus membori pertanggung jawabon pucuknye. Dengan demikion, mike bakal melalukonye dengan sukacita, bukon dengan merutuk ule hal iye hopi bakal membori keuntungon kenempatme. ¹⁸ Bedoalah untok kamie ule kamie yakin behwo kami memiliki hati nurani nyo beik, nyo selalu beusaha melakuko segelo hal dengan caro nyo terhormat. ¹⁹ Ake mendesakme untok bedoa dengan lobih besungguh-sungguh lage empuknye ake segera de kembaliko kenempatme. ²⁰ Kinie, Allah sumber damai sejahtra, nyo lah membangketko belek Yesus, Tuhan kite, Sang Gembala Agung pucuk domba-domba-Nye, dengan deroh perjenjion nyo kekal ²¹ Kiranya memperlengkapime delom setiap hal nyo beik untok melakuko kehendak-Nye. Ngan, biarlah Enye bekereja de delom kite untok menyenangko hati-Nye melalui Kristus Yesus, nyo kenempat-Nyelah kemuliaon sampoi selamo-lamonye. Amin. ²² Dulur-dulurke, ake mendorong kowe untok mendongorko kehato nasehatke dengan sabar sabab kehato nasehatke nie lah ketulesko kenempatme dengan singkat. ²³ Ake amat memboritahukome behwo dulur kite, Timotius, sodah de bebasko deri penjaro. Ngan, munya enye segera njongok kenempatke, mengka ake bakal njongok serompok enye saat menomui kowe. ²⁴ Sampoiko salom kamie kenempat padong pemempenme ngan kenempat segelo urang-urang kudus. Dulur-dulur kite deri Italia menyampoiko salom kenempatme. ²⁵ Anugerah Allah menyertai kowe segelo.