(Saleng Tetolungon) ¹ Hai dolor-dolor, munye ado urang nyo kedepoton melakuko suatu pelanggaron, kowe nyo rohani haros membelekko urang upa iye ngan roh kelombuton. Bejego-jegolah empoknyo kowe dewek jengon milu tegoda. ² Saleng menolunglah delom menanggung bobon empoknyo kowe menaati hukom Kristus. ³ Munye ado urang nyo menganggap dirinye penteng, padohal hopi upanio. ⁴ Marolah setiap urang menguji perbuatonnye dewek. sesodah iye, nye pacok bangga ngoleh keadaonnye dewek ngan bukon ulenyo membendingkonnye ngan urang loin. ⁵ Sabab, setiap urang haros mennaggong bobonnye dewek. ⁶ Siape nyo mendepot pengajaron deri firman Allah haroslah nye membageko segelo hal nyo beik iye ngan urang nyo mengajarnye. ⁷ Jengon tetipu. Allah hopi pacok depermoenko ulenyo urang nak menuoi ape nyo nye tabor. ⁸ Urang nyo menabor deri nafsu kedegingon nak menuoi bebosokon deri kedegingonnye. Cuma hambok, urang nyo menabor deri Roh nak menuoi hidop nyo kekal deri Roh. ⁹ Jengon kite menjedi litak bebuat beik. Munye musimnye sampoi, kite nak menuoi asalkan kite hopi menyerah. ¹⁰ Ulenyo iye, munye kite mendepot kesempaton, marolah kite berbuat beik kepodo segelo urang, khususnye kepodo keluargo delom iman. ¹¹ Kolelahah alangko godongnye huruf-huruf nyo kutoles untokme ngan tangonke dewek. ¹² Mika nyo nak ngengeberko kebeikon deri hal-hal nyo lahiriah nak memaksome untok desunat. Mika melakuko hal iye empoknye hopi desikso demi salib Kristus. ¹³ Mika nyo desunat pon hopi menaati Hukom Taurat, hambok mika endok kou desunat empoknyo mika depot memegahko diri atas sunatme. ¹⁴ Semoga ake hopi pernah memegahko diri kecuali delom salib Tuhan kite, Yesus Kristus. Melalui salib-Nye, denia sodah desalibko untok ake, ngan ake untok denia. ¹⁵ Desunat apo hopi desunat apelah retinye. Nyo penteng adolah menjedi ciptaon beru. ¹⁶ Bage segelo urang nyo menjelonko aturon nie, biarlah damai sejahtera ngan rahmat toron atas mika ngan atas Israel melek Allah. ¹⁷ Akhernyo, jengon ado urang nyo mempersulet ake ulenyo ake ngunda tando-tando Yesus delom badanke. ¹⁸ Dolor-dolor, kironye anugerah Tuhan Yesus Kristus ado besamo ngan rohme. Amin.