(Kesatuon Badan Kristus) ¹ Uleh nyo iye, ake, urang nyo depenjaroko ulehnyo Tuhan, mendorong kowe untuk hidop serunding ngan pantouon nyo lah kowe terimo. ² Ngan segelo kerendahon hati ngan kelombuton, ngan kesabaron, saleng menanggung bobon delom kaseh, ³ beusaholah sekuat tenago untuk memeliharo kesatuon Roh delom ikaton damoi sejahtera. ⁴ Hanyo ado sikuk Roh, samo hal nye tekela kowe de pantou kepado sikuk haropon deri panggelon me, ⁵ Sikuk Tuhan, sikuk Iman, ngan sikuk baptison, ⁶ Sikuk Allah ngan Bepa deri segelo nye, nyo depocok segelonye, melalui segelonye, ngan delom segelo nye. ⁷ Hambok sebeleknye, kepado kite maseng-maseng deboriko anugerah sesuoi ngan ukuron karunia Kristus. ⁸ Iyelah sababnye, debuiko, "Tekalo Enye noek ke tempat tinggi, Enye menangkop urang-urang nyo detahan, ngan memboriko karunia kepodo mendesio". ⁹ Tekalo debuekko, "Nye noik," bukonkah iye berarti Nye jugo lah turun ke bagion bewoh bumi? ¹⁰ Nye, nyo turun, Enye, nyo turon, enye jugolah nyo noek lobeh tinggi deri segelo langet empoknyo Nye memenuhi segelo sesuatu. ¹¹ Nyelah nyo memboriko, beik rasul-rasul, nabi-nabi, pemberita-pemberita Injil, gembala-gembala, moupun pengajor-pengajor, ¹² untok memperlengkapi urang-urang kudus delom pekerjaon pelayanon pembengunon badan Kristus, ¹³ sampoi kite segelo mancapai kesatuon iman ngan pengetahuon akan Anak Allah, yoitu urang rayo, menurut ukuron tingkat pertumbuhon nyo sesuoi ngan keponohon Kristus ¹⁴ Ngan demikion, kite bukon lagi anak-anak nyo deombang-ambingko uleh ombak ngan debewo kekiun kemai uleh berbagai angin pengajaron, uleh tipu daya mendesio, uleh kecalakon deri penipuon nyo licik. ¹⁵ Sebeleknye, mengehatoko kebonoron delom kaseh, kite nak bertumbuh delom segelo hal kepodo Enye, nyo adolah kepalo, yoitu Kristus. ¹⁶ Deri podonye segelo badan tersusun ngan dekobot bersamo-samo menjedi sikok melalui topangon setiap sendi jika maseng-maseng melakukan bagiannye badan nak bertomboh sehingo membengun diri nyo delom kaseh. ¹⁷ Ulenyio iye, ku gerako ngan ku tegasko delom TUhan, jengon lagi kowe hidop upah urang-urang nyo hopi percayo, nyo hidop ngan pekeron nyo sio-sio. ¹⁸ Pengertion nyo menjedi gelap ngan terpisah deri kehidopon Allah ulenyo kebodohan nyo delom diri nyo yoh de sebabko ule kekarason hati. ¹⁹ Perasaon nyo lah menjedi tumpai ngan enye menyerako diri kepodo benatong nafsu untok melakoko segelo caro kecemaron ngan keserakohon. ²⁰ Cuma hambok, bukon ngan caro nio kowe belajor tentang Kristus. ²¹ Seumpamo kowe memang lah mendongor tentang nyo ngan deajor delom Dia, sebagai mone kebonoron nyio ado delom Yesus ²² campok lah mendesio lamo me nyo kowe depot deri caro hidop me nyo lamo, nyo sedang de rosak uleh benatong nafsu nyo menipu. ²³ Pebeheruilah Roh pekeron me. ²⁴ Kanakolah mendesio nyo beheru nyo deciptako delom rupa Allah delom keadelon ngan kekuduson nyo sejati. ²⁵ Uleh karno iye ngan menyamok kepelsuon ngan mintak setiap kowe boek tentang kebonoron tentang sesamo me uleh nyo kite samo-samo angota deri sikok badan. ²⁶ Bemaralah ngan jenon berbuat doso. jengon biarko metoari terbenom delom kemarahon me. ²⁷ Jengon membage kesempaton kepodo setan ²⁸ Urang nyo lah delok, jengon malng lagi lobe beik munye ia begawe berat ngan melakuko gawe nyo beik ngan tangon nyo dewek sehinggo ia memeleki sesuatu untok de bageko kepodo urang nyo membutohko. ²⁹ Jangan biarko pembueko rengai keluor dri mulut me, cuma hanyo pembuekon beik nyo membengun urang nyo membutuhko sehinggo pembuekon me iye membori ko bakat bage me nyo mendongornye. ³⁰ Jengon menduduko Roh Kudus Allah, sabab uleh karna DIa kowe dementeraiko untok hari penobusan. ³¹ Campok lah segelo macam kepaheton, kegeramon, kemarahon, pertikayon, ngan pembekon fitna, jugo segalo kejahaton, jiuko lah iye deri podo me. ³² Bersiap lah ramah sikok ngan nyo loen, memiliki hati nyo lomba saling mengamponi, sebagaimone Allah delom Kristus jugo mengamponi kowe.