¹ Jengon menegor jenton-jenton nyo lobeh tuha ngan karas, cuma perlakukoh nye upamone bepak, ngan perlakukoh jenton-jenton nyo lobeh muda upamone dolor. ² Perlakukoh betino nyo lobeh tuha upamone indok, ngan betino nyo lobe muda upamone dolor betina ngan ponoh kesucion. ³ Hormatila jendo-jendo nyo bonor-bonor jendo. ⁴ Hambo, munye jendo memeleki anak apo cocong, mike lah pertamo-tamo haros belajor menonjokko bakti kepodo seisi rumanye dewek. Ngan upa iye, mike elah membelos budi kepodo urang tuha mike, sabab hal nielah nyo menyenangkoh Allah. ⁵ Sedangkoh jendo nyo bonor-bonor jendo ngan hidop seurang dewek, nye haros memoteko haraponnye kepodo Allah ngan teros menoekkoh permohonon ngan doa siang ngan malam. ⁶ Cuma, jendo nyo hidop anyo berpoya-poya, iye soda mati walaupon maseh hidop. ⁷ Perentahkolah jugo hal-hal nie kepodo jemaat empoknyo mike hipo becela. ⁸ Cuma hambok, munye seurang hipo ngingonkoh anak keluargonye dewek, khususnye keluargo paroknye, berati nye elah menyangkali imannye ngen nye lobeh borok deripodo urang nyo hopi pecayo. ⁹ Jendo nyo demasokkoh delom daftar anyolah betino nyo beomor paleng kekecikon enom poloh tahun, menjedi bini deri sikok laki, ¹⁰ ngan dekenal ulehnyo perbuaton-perbuaton beiknye, iyelah mengodongkoh anak-anak, membori tumpangon, membasoh kaki urang-urang kudus, menolong urang nyo delom kesoleton, ngan bertekun delom setiap penggawekon nyo beik. ¹¹ Cuma, jendo-jendo nyo lobeh muda jengon demasokkoh ke delom daftar, sabab munye hasrat seksualnye membuat mike jouh deri Kristus, mike akan endok menikah lage. ¹² Hal nie mendatongkoh hokuman ulehnyo mike elah mengingkari jenji pertamo nyo mike buat sebolomnye. ¹³ De sampeng iye, mike mulai terbiaso penyagon-yagon, berkeliling deri siko ruma ke ruma nyo loen. Bukon iye sajo, mike jugo eomongon ngan mencampuri uruson urang loen, mengehatoko hal-hal nyo seharusnye hopi nye kehatoko. ¹⁴ Jedi, ake endok agar jendo-jendo muda kawen lage, melaherkoh anak, ngan ngurus ruma tanggonye empoknye hopi ado kesempaton bage lawon untok mencela mike. ¹⁵ Sabab, berapo urang soda bebalek mengikot Setan. ¹⁶ Munye ado seurang betino pecayo nyo memeleki sanak keluargonyo jendo, biarla mike ngingunkoh jendo-jendo iye sehinggo gereja hopi haros deboboni, ngan gereja pacok menolong jendo-jendo loen nyo bonor-bonor perlu detolong. ¹⁷ Penatua-penatua nyo mengurus jemaat ngan beik layak menerimo penghormaton dua kali lipot, terutamo mike nyo begawe karas delom berkhotbah ngan mengajor. ¹⁸ Sabab, Kitab Suci bekehato, "Jengan memberagus molot lembu nyo sedang menggiling gandum," ngan "Seurang penggawe behak mendepot upahnyo." ¹⁹ Jengon menerimo tuduhon nyo detitekkoh kepodo penatua kecuali dedasarko podo bukti deri dua apo tiga urang saksi. ²⁰ Mike nyo bebuat doso haro ditegor de hadopon segelo urang empoknye nyo loen menjedi takot bebuat doso. ²¹ De hadopon Allah, Yesus Kristus, ngan para malaikta nyo terpileh, ake memperingotkoh kowe ngan bonor-bonor empoknye menuruti petonjok-petonjok nie tanpa berpasongon apo pileh kaseh. ²² Jengon terlalu cepat menumpangkoh tangan atas siapapon apo jengon ikot ambil bagion delom doso urang loen. Jagalah empoknye dirime tetap suci. ²³ Jengon anyo minom air puteh, cuma gunakon sedikit anggur demi perutme ngan badanme sereng saket. ²⁴ Doso deri sebagian urang sangat jelas tekoleh sehingga menuntun mike kepodo pengadilan. Cuma, doso deri sebagian urang loen baru tekoleh kemudion. ²⁵ Demikion jugo ado perbuaton beik nyo jelas tekoleh. Cuma perbuaton beik nyo hopi tekoleh pon, hopi nak teros tekerawo.