¹ Ulehnyo iye, campoklah segelo kebencion, segel tipu dayo, segelo kemunafikon, segelo iri hati, ngan segelo macam fitnah. ² Upa bai nyo beheru laher, hendoklah kowe mengendoko susu rohani nyo jereneh empoknyo kowe betomboh delom keselamatonme, ³ munye kowe sodah bonor-bonor merasoko behwa Tuhan beik. ⁴ Saat kowe detong kepodo Kristus, Betu Hidop nyo detolak uleh mendesio, cuma nyo depileh uleh Allah ngan deanggap sajo berega bage-Nye, ⁵ kowe jugo upa betu-betu hidop, nyo debengun menjedi suatu ruma rohani, imamat nyo kudus untok mempersembahkoh kurban-kurban rohani nyo bekenan kepodo Allah melalui Yesus Kristus. ⁶ Ulehnyo Kitab Suci bekehato, "Kolelah, Ake motekoh sebuah betu de Sion, sebuah betu penjuru nyo tepileh ngan nyo mulia, ngan siape pon pecayo kepodo-Nye hopi nak depermalukoh." ⁷ Jedi, betu iye mulia bage kowe nyo pecayo, cuma bage nyo hopi pecayo, "Betu nyo detolak uleh tukang-tukang bengunon, lah menjedi betu penjuru," ⁸ ngan menjedi, "Seikok betu pantokon, ngan karang nyo mbuat urang titek." ⁹ Hambok, kowe adolah bengeso nyo tepileh, imamat nyo rajani, bengeso nyo kudus, umat kepunyaon Allah dewek empoknyo kowe pacok memberitako kebeikan-kebeikan-Nye, nyo lah memantou kowe keluor deri kekolomon menuju kepodo tarang-Nye nyo ajaib. ¹⁰ "Tekalohe, kowe bukonlah umat Allah, cuma kinie kowe adolah umat Allah. Tekalohe, kowe hopi menerimo belas kasehan, cuma kinie kowe lah menerimo belas kasehan Allah." ¹¹ Dolor-dolor nyo kukasehi, ake endok menasehati kowe sebagoi pendetong ngan urang aseng de dunia nie untok menjauhkoh dirime deri keendokon hawo nafsu duniawi nyo beperang melawon jiwome. ¹² Jegolah tingka lakume nyo beik de antaro urang-urang nyo bolom pecayo empoknyo apobila mike memfitnameh sebagoi pelaku kejahaton, mike pacok ngoleh perbuatonme nyo beik, ngan nak memuliakoh Allah podo hari pelawaton. ¹³ Demi namo Tuhan, tundoklah kepodo setiap lembaga pemerintahon nyo detetapkoh uleh mendesio, beik kepodo rajo sebagoi penguaso tertinggi, ¹⁴ apo kepodo para gubernur nyo deutus uleh rajo untok mehokom para pelaku kejahaton ngan membori pujion kepado urang-urang nyo bebuat beik. ¹⁵ Sabab, upaiyelah kehendok Allah: ngan bebuat beol, kowe membungkam kehopitahuon urang-urang bodoh. ¹⁶ Hidoplah sebagoi urang-urang nyo merdeka, cuma jengon pergunako kemerdekaonme iye sebagoi kedok bage kejahaton. sebeleknya, hidoplah sebagoi hamba-hamba Allah. ¹⁷ Hormatilah segelo urang, kasehilah dolor-dolor seiman, takotlah akan Allah, ngan hormatilah rajo. ¹⁸ Hamba-hamba, tundoklah kepodo tuanme ngan segelo hormat. Bukon anyo kepodo mike nyo beik ngan lemah lombot, cuma jugo kepodo mike nyo hopi adel. ¹⁹ Sabab merupako suatu kaseh karunia, munye demi kesadaronnye nak Allah, seseurang endok betahan delom penderitaon ulehnyo kehopiadelon. ²⁰ Sabab, apokah upame munye ngan taba kowe nerimo pukolon ulehnyo perbuatonme nyo bedoso? Cuma, munye kowe menderita ulehnyo bebuat beik ngan kowe menerimonye ngan tabah , tindakonme iye bekenan de hadopon Allah. ²¹ Sabab, untok iyelah kowe depentou, ulehnyo Kristus jugo lah menderita bage kowe ngan meninggalko teladan bageme empoknyo kowe mehilui tijak-Nye. ²² Ye hopi bebuat doso, ngan tipu dayo hopi ado de molot-Nye. ²³ Tekalo Ye dehima, Ye hopi membelos ngan himaon; tekalo Ye menderita, Ye hopi mengancam, cuma menyerahko diri-Nye kepodo Allah nyo nak mehakemi ngan adel. ²⁴ Ye dewek lah menanggong doso kite podo badan-Nye de kayu salib empoknyo kite mati terhadop doso, ngan hidop untok kebonoron. Uleh luka-luka-Nye, kowe desembuhkoh. ²⁵ Tekalohe, kowe upa domba-domba nyo teros-meneros tesosot, cuma kinie kowe lah belek kepodo Sang Gembala ngan Pelindong jiwamu.