¹ Debò inataõ reurò ahãdu-u iinatxi beòra-u iritidỹỹna kia wedu iòlò kia Pérsia wesemy, tahe Deuxu tamy rarybere Zacaria-ò Deuxu-my rybedu-ò Barakia riòre rare tii ludu riòkòre rare. Deuxu heka iruruteretyhyre, diteònyde tamyreny rarybekemy. ² Jiarỹ, Deuxu watxireri tureny sõemy radòwarire kia juu akorenymy riòhònyrenyre mahãdu. ³ Tai tahe, wiji rarybereri adeereny. Bodòòsebenyke bòynydỹỹnybenymy. Wadee, jiarỹ ka adeuxureny rare ruruterehekỹ, adòòsekre adeereny. ⁴ Kia juhuu akorenymy roiremyhỹ wesemy aõkõ tiiboho dori tiu ywimy deuxu rybedu juhunaludu rybe-ò roholarenyõre irybe wihikỹ-ò. Deuxu ruruterehekỹ kaiboho araywinyrenyre ywimyn aõbinabina biribenykemy ixinamy aõbinabinareny. ⁵ Wiji tahe titxibo ratxirenyreri-ò ihetxina mahãdu? Kia aõbohe deuxu rybedutyhy mahãdu irulemy rỹira? ⁶ Kia warybemy rybedu mahãdu yki, jiarỹ rewahinyre warybe riteòwarinyrenyre ihetxina mahãdu kaiboho. Tahe tiiboho roholarenyõre tai heka aõhõkỹ resanyrenyre. Tai tahe tiiboho ixidee rexiraherenyre raryberenyre. Deuxu ruruterehekỹ aõbo biwinyke tuu tetiditemyna biwinykre waòrarureny òraruki. Aõbo riwinyre wadeerenywimy. ⁷ Waa wiò inaubiowa txuu kia sohoji sohoji ahãdu-u, Sebate inire kia iinatxina ahãdu beòra wedu iòlò tyyriti, jiarỹ, Zacaria Deuxu-my rybedu, Barakia riòre wahe ludu riòkòre wahe wadee rehemynyre Deuxu rybe. ⁸ Kia ruu tahe warue ijõdire aretehekremy tahe rabire sohoji ỹju-my awaru sòhòkỹ tyreki. ỹju heka riyrymy tai rare, kia bedeyxe tyaki, ihewoki tasỹ ijõ tule awaru tyreki ratximyhỹ ijõ awaru sõemy isolehekỹmy, ijõ tahe awaru nihikỹhỹmy, ijõ tahe awaru iuralehekỹmy. ⁹ Rỹỹraxire ỹju dee wawana aõbo rarybemyhỹremy. — Wadeuxu, mobo kia rỹireri awarutyreki. Tii rirawyònyre.— Adee ararybekre. ¹⁰ Tahe kia ỹju bedeyxe-ki ratxireri rirawyònyre. — Tiiboho heka ỹju ratxirenyreri Deuxu deòdỹỹna ibutumy hãwãhãwã-di ririranykremy. ¹¹ Tai tahe tiiboho ỹjuboho raryberenyre kia bedeyxe-ki ratxireri-ò. Rexihuranyra ibutumy hãwãhãwã-di rira tahe rabirenyra ibutumy ywimy ratxirenyreri awityhymy. ¹² Deuxu ỹju tahe rarybere: — Deuxu hãbu ruruterehekỹ, … iny umy debo inatxi reurò beòra-my reijare Jerusalẽ-di retehemy tule Juda hãwã-di. Tiwesebo tahe biijekre tawy ruxetòena biwahinyhyy tamy? ¹³ Deuxu rirawyònyre tarybe wihikỹ-di ỹju-ò tii wawana rarybereri tu rarybera bedehyymy. ¹⁴ Kia ỹju wawana rarybemy raremyhỹ diwahinyde tuu ararybekremy iteretyhymy. — Kaa Deuxu ruruterehekỹ rybe wahidỹỹna: Jiarỹ Jerusale sõemy tuutyhyre, wahãwãmy wahe. ¹⁵ Jiarỹ sõemyhe idireny retehewãhãre kia awimy ratximyhỹrenyre-ò. Tahe, tiubo jiarỹ iribireny ibutemy waò ariwykre-u waijoi ribi, sõemy aõhõkỹmy rutỹỹnyrenykre. ¹⁶ Tai heka, sõemy ruxetòena ijõdikre, roosere Jerusalẽ hãwã-ò. Jiarỹ, Deuxu ruruterehekỹmy, adeereny aritidikre kia Deuxu rybena heto tule ahãwãreny ixyby kanatomoradỹỹnykre. ¹⁷ ỹju tule wade rarybera:— Marybeke kia Deuxu rurutererehekỹ rarybere ihãwãreny ixyby ratomorakremy tai sõemy ityhy ròhònykre. Tii heka Jerusalẽ hãwã riwiòhenanykre, kadoosekre ihãwãreny tarasanamy ratxikre. ¹⁸ Kia iwitxira itxerenamy rabire inaubiowa broreni òdimy rabire. ¹⁹ Aõbo tahe kia rare ỹju dee rỹỹraxire? Tii wana widee rarybewãhãre. — Kia iòmy rarybereri? Tii rirawyònyre: — Tii hã~wãhãwã rikewesenanyreri bedebedemy roberarenyre Juda-ki rasỹnymy roiremyhỹ mahãdu, tule Israel mahãdu tule Jerusalẽ mahãdu. ²⁰ Tahe Deuxu wadee riteòsinyre inaubiowa mana aresyterehekỹ. ²¹ Jiarỹ rỹỹraxire: — Aõbo tahe tiiboho riwinyrenykre? Tii rirawyònyre. — Iòreny heka bedebede-my ròbtỹrenyre rikeitxenanyre hãwãhãwã-my Juda-my sỹdu rỹira, tahe inyõ timyhe aõmy rarybeõhyyre tarati biu-ò riijaranyke ihoõre. Wiji tahe kaa mynyna aresyterehekỹ rikewesenanyreri tiiboho kodoidenykremy ibrebudỹỹmy tule iòreny aresyaresy-my kia heka, tiiboho hãwãhãwã-my roberarenyre ritarenyre Juda su-ribi tule roberarenyre iijoireny mahãdu wahe.