¹ Deuxu Ibutumy Tabedeery nihikỹ-di rarybere: — Warybe-di ijohodu mahãdu, diarỹ adeereny rarybereri. ² Txibo warybe wahidỹỹna bitynyõbenykreki kia txibo wamy berinanybenyõrenykreki, tai tahe diarỹ atyrereny ariatykre aõnaõna binabina aratxuhòrenykre ibutumy kai boho aõ temymyhỹtenyte aõmysỹdỹỹbrò-ribi. Kia aratxuhòrenyre kiemy dori kai boho texiywinytenyõte wamy berinanybenykremy. ³ Kia arirarytxynyrenykre ariorereny kia aòsynyrenymy ariòkaòkarenykre iròdu iròdu rỹny xiwenamy tewahinymyhỹtenyte. Kia ihãremy kai boho madybenykre tibedekibo ijỹny adehuna rỹimyhỹre-ò. ⁴ Kawesemy tahe bierybenykre kia diarỹ tuu warybe rewahinyreri kia warybe-di ijohodu mahãdu-wana, Levi rioreriorereny rakròkròõkremy. Diarỹ, Deuxu Ibutumy Tabedeery nihikỹmy tuu rarybereri. ⁵ –Warybe tamyreny rewinyre, diarỹ tamyreny rarybere ariwahinykremy umytuedỹỹna kia bede ywihikỹ. Kia rewinyre aõmybo rarybere, tii boho riwatyhynyrenykremy; kia inatyhymy tii boho riwatyhynyrenyre kia walau ruberurenyre. ⁶ Kia ikiemy rotohodỹỹmy roiremyhỹ òbitihyylemy kia tiu roimy iõnamy rotohodỹỹõhyyrenyre. Kia awihyylemy wawana roirenyremyhỹ, aõ òbitimy riwinymy roiremyhỹ kia sõemy riwiòhenanyrenyre rybinabina riatyrenykremy. ⁷ Warybe-di ijohodu mahãdu heka òbitityhymy wabededỹỹnanamy rotohodỹỹmyhỹrenyke, kia ibutumy tamy rexitòenymyhỹrenyke dohodỹỹnamy tamyre kia rieryrenykremy aõbo òbitiremy, kiemy dori warybe-di ijohodu mahãdu warybe-di ijaradu roirenyre. ⁸ –Ka tahe wiji kai boho , Deuxu rybe-di ijohodu mahãdu, ry òbitina-ribi tahònymy atxitenyteri, kia adohodỹỹnanareny sõemy iny mahãdu òrarunamy riatyrenyre. Kai boho tekròtenyteri rybewi rewinyre Deuxu rybe-di ijohodu mahãdu dee. ⁹ Iurenana diarỹ ariwinykre kia iny mahãdu adi rehukre arahitxinyrenykre, kiemy dori kai boho tiwatyhynyõletenyte, tiu aõmy òbitimy rarybemyhỹreu, kia òbitityhymy aõkõ iny mahãdu-di atximyhỹtenyte. Diarỹ, Deuxu Ibutumy Wabedeerymy, rarybere. ¹⁰ Òbiti kỹny rare ibutumy iny boho tybyreny sohojihyy rare? Iny boho kỹny Deuxu riwinyrenyre? Aõherekibo tahe iny boho inyiny wii ribònymyhỹrenyre, kawesemy ribinabinanymyhỹrenyre rybewihikỹ Deuxu riwinyre iny hỹỹnarenydeereny? ¹¹ Juda iny mahãdu Deuxu dee òbiti aõkõ roire, kia Israel iny mahãdu Jerusalẽ-ki hãwadu mahãdu aõnaõna binabinahãkỹ riwinyrenyre. Juda iny mahãdu rixurixunyrenyre Deuxu Tyhyhykỹ tuu terinanymyhỹtemy?rybena hetomy, kia hãbu mahãdu hãwyymy raydònymyhỹrenyre iwitxira deusi rityhymyhỹrenyre-wanahãkỹle. ¹² Kia Deuxu Tyhyhykỹ riteònyrenykre iny bedereny-ribi iny mahãdu tuu riwinymyhỹrenyre, aõtxile mobo tuu riwinyre, kia xiwena riwahinykrehãrele Deuxu Tyhyhykỹ dee! ¹³ Ixyby ijõdire aõnaõna kai boho tewinymyhỹtenyte: mawesiruràmy kia mahinybenyke bobubenyke, arubereny-di bihetynybenykre Deuxu xiwena dena kiemy dori tii axiwenareny-ò reòbyõhyyreri tamy tewahinymyhỹtenyte. ¹⁴ Kai boho sohoji sohoji tỹỹraximyhỹtenyte: “Aõherekibo?” Kiemy dori Deuxu araeryre ahãwyy dee òbitimy aõkõ atximyhỹtemy, kia hãwyy-wana herimy taite weryrybòu. Tii heka juhu arawyò rare. Ka kai tahe tebinabinanyte tuu biwinykremy tarybete Deuxu ruki kia òbitimy tamy mabekremy. ¹⁵ Inatyhymy kỹny Deuxu sohojihyy iny riwinyre, kia inyde-ribi tyytyby-ribi relere? Aõbo tahe Deuxu tamywireri? Kia iriòrereny ijõdikre Deuxu dee rawahikre. Kiaremyta, bexiebenykre kai bohoõ ibinabina ahãwyyreny-di norenyõmy. ¹⁶ Kiemy dori, Israel Deuxu Ibutumy Tabedeery nihikỹ-di, rarybere: — Diarỹ riwayaranyre hãbu hãwyy-wana wii riatymyhỹrenyre; diarỹ riwayaranyre hãbu kawesemy ibinahỹkỹmy riwinymyhỹre.Kiaremyta bexiemy atximyhỹbeny, kia inyõ dori òbitityhymy ratxiõhyymyhỹre tahãwyy di. ¹⁷ Kai boho sõemy tarybemyhỹtenyte, kia Deuxu Tyhyhykỹ reywesemy ratxireri ibutumy arybereny-ki. Kia ihãremy kai boho tỹỹraximyhỹtenyte: “Timybo tahe Deuxu reteywedỹỹnyrenyra?” Kia myỹ raryberenyreki aõbo: “Deuxu Tyhykỹ rõhõtinymyhỹre kia aõnaõna bina riwinymyhỹrenyre awirenyre, uriki tahe Deuxu tii boho tamyrenywire.” Yda kai boho tỹỹraximyhỹtenyte: “Tikibo Deuxu òbitihikỹ ratxireri?”