¹ Irahudi tahe Deuxu ixyby Jonasi-ò rarybere myy: ² “Makre Ninive hãwahãkỹ-ò, kia tahe tai hãwadu mahãdureny-ò biteòarinybenykre, rarytxyna aõhỹỹmydỹỹna iòludurenymy kanakremy, iwese diarỹ adee rarybere wesemy.” ³ Kia tahe Jonasi rityhynymy rare Ninive hãwahãkỹ-ò. Ninive heka kia iny inataõ txumy bede rieke iny ibutumy iwerura-di rariakeki. ⁴ Kia komy ralore rahudi hãwa-ò, kia Deuxu rybe-di ijohona riòrarunymy idi rohonymyhỹ, kia hãwaki hãwadu mahãdu aõhỹỹmy rutỹỹnyrenyre. Jonasi iny mahãdureny-ò rirajuamyhỹ tamy rotyrenyreu: “40 txumy bede rimykreu Ninive hãwa rexihukre.” ⁵ Iny mahãdureny Jonasi rybe rityhynyrenyre, kia tahe renareherenykremy rexiywinyrenyre. Ibutumy iny mahãdu, kia Iòlò, kia iny iaõkõmy rỹimyhỹrenyre dorile ỹnyde sau tyby-di rexityynyrenyre , tyy iyxemy rỹimyhỹre-di, kia heka aõmau iny riuhemyhỹre bederyry nihikỹ rỹimyhỹreu. ⁶ Kiemy dori Ninive Iòlò roholareu Jonasi rarybemyhỹu, kia tarynana-ribi resere, kia tatyytyhy riwiurònyre, ỹnyde sau tyytyby-di, kia tahe brybytyrele runyre. ⁷ Iòlò taijoi mahãdureny-wana myy rybe riwahinyrenyre ibutumy hãwa-ki hãwadu mahãdureny-ò: Ino-õ, iròdu iròdu dorile riroxike aõkõre, kia bemy tule riõke aõkõre. ⁸ Ibutumy ỹnyde sau tyby tyy-di rekexihetynyrenykre, kia tahe rikirajuarenykre Deuxukoki, kia tary binahãkỹ, tadebure riixawidỹỹnykremy. ⁹ Kawese-ki mobo tahe rieryke txibo Deuxu inyboho riwahinyrenyke ixyby rakatxirenykemy, kia aõhe-wana ikyaratyhymy inoõna inyhudurenymy. ¹⁰ Kia Deuxu tuu robireu, ixiweribi-ò ririre tuu riwinykremy ratximyhỹ-ribi, kia tabededỹỹnana riixawidỹỹnyre, Ninive hãwa-ki hãwadu mahãdu hudumy rexiywinyre-ribi, kia tahe tuu riwinyõre.