¹ Kia Deuxu rybe nade Jonasi-ò Amitai riòre wahe myy: ² Bexiywinykre Ninive hãwahãkỹ-ò makremy, Kia tahe irahireny mahinykre, kiemy Dori iaõòtaòtareny wadeehekỹle raòwònyra. ³ Jonasi rexiywinyre, Kia tahe Deuxu-ribi rexiwokremy Társi hãwa-ò; kia tahe Jòpe-ò rare, kia ta Bera Heòty-txi reare Társi-ò rakremy roimyhỹ-ò; kia tanonana riòwynymy tamy runyre Társi hãwa-ò rakremy, Deuxu-ribi irehetyhytyhymy. ⁴ Ka Deuxu tahe bero nihikỹ wetyakile yhy debure nihikỹ-di rimyre, kia tahe yhy debure inihikỹmy reare bero wetyaki, kia Bera Heòty ruaruakremy iòhòtyhylemy roimyhỹre. ⁵ Tai tahe Bera Heòty jura ludu mahãdu sõemy ruberumỹhỹreny, kia iny sohoji sohoji tadeuxureny-ò rahinymyhỹreny, kia aõnaõnahyna Bera Heòtyromy rỹimỹhyre-di bera-ò rehumyhỹreny Bera Heòty rawetarikemy. Jonasi tahe Bera Heòtylòru-ò resemy tai roimyhỹ; kia tahe tai rõrõtyhyhykỹlemy roimyhỹre. ⁶ Bera Heòty wedu rare Jonasi-ò rarybekremy, tamy rarybere: “Aõhewe tatỹỹnyteri?”, kia adeburemy tamy rarybere, “timykiwe kai urile tarõmy taiteri, kawese bedeu? Mynyike aDeuxu-ò marybeke txibo tii inydireny rexiwobrunymy iny rihedỹỹnyrenykemy!” ⁷ Iwana wana tahe Bera Heòty juraludu mahãdu tabedeòrarudỹỹdureny rieryrenykremy rexiywinyrenyre, momybo iDeuxureny radònyrerimy rieryrenykremy, tai dori yhydebure nihikỹ reareri. Jonasi-txi heka rekoarenyke! ⁸ “Aõwe kai tewinyta?”, ritỹỹraxinyrenyre, “tai yhydebure nihikỹ inyhudurenymy risỹnyreri? Mobo tate? Aõbo aaõmysỹdỹỹnare? Tibederibibo tateri? Tibo asure, aõbo aixỹjunare?.” ⁹ Jonasi rirawyònyre: “Diarỹ Judeu rare; Deuxu-my rerinanymyhỹre, Deuxu biuludumy, tii heka suu bero-wana riwinyre.” Tai tahe Jonasi Bera Heòty juraludu mahãdurenyko relyyre Deuxulau rexiwòrerimy. ¹⁰ Kia heka Bera Heòty juraludu mahãdu roholarenyreu werymy rekoarenyre. “Aõherekibo tahe kia wesena tewinyte?” rirajuarenyre. ¹¹ “Aõhebo tahe arasỹnyrenykre yhy debure ixawikremy?” Bero nihikỹ tahe ire raybònymyhỹ. ¹² “Bero nihikỹ-txi wadi behubenyke”, Jonasi rarybere, “kia tahe ixybyle ixawikre. Diarỹ dori rexieryreri waiòraruki yhy debure nihikỹ reareri.” ¹³ Kia wana-wana tahe Bera Heòty jura ludu mahãdu ranarihinyrenyre ibutumy tarurureny-wana, beàti-ò ròròrenykemy, kia tahe ròròrenyõhyyre. Kia heka aõni isira rare yhy debure-wana ijesu! ¹⁴ Tai tahe Deuxu-ò rexitòenyrenyre, Jonasi Deuxu-ò. “Deuxu uritre warubudỹỹrenyõmykre hãbu òraruna òraruki, uritre wamynyrenyõmykre irubudỹỹna-di, kiemy dori diarỹ boho waòrarureny ihoõre, aõherekibo iny debure nihikỹ ityre resera, kai teeryteri.” ¹⁵ Irahu-di tahe Jonasi rimyrenymy idi rehurenyre Bero nihikỹ tya-ò, kiemy dori inihikỹmy yhy rebonymyhỹ, kia tahe yhy debure ruhure! ¹⁶ Bera Heòty juraludu mahãdu ruberurenyre, Deuxu aõhe risỹnyrenykelau. Kia tii boho tuu rerinanyrenyre, kia inatyhymy raryberenymy rewahinyrenyre. ¹⁷ Ka Deuxu tahe tiu aõkõ riwyre tai utura nihikỹ ratximyhỹre-ò Jonasi rirỹsỹkremy. Kia inataõ txumy inataõ rumy Jonasi uturawo-ki bede riere.