¹ Israel iny mahãdu heka mona besò rade wesena rare sõemy tỹximy mona besò-ki roimyhỹre (uva). Kia iaõdirenymy ityhymy ratxirenyre, kia ixyby xiwena dena riwinyrenyre; kia iijoireny takò-ò raòwònymy ròirenyre, kia iryreny brebuna ire biutxi lamamy rỹirenyre. ² Tii boho heka Deuxu rityhynyrenyõhyymyhỹrenyre ka tahe wiji tii boho riòwynyrenykre taòrarureny. Deuxu Tyhyhykỹ rikrokrokre ixiwe denareny kiata iryreny brebuna riatyrenykre. ³ Tii boho raryberenykre: “Iòlò inykireny ihoõre kiemy dori Deuxu lau iny boho ruberuõhyymyhỹrenyre. Kia txibo sohoji iòlò inykireny ijõdikeki, aõbo tahe tii inydeereny riwinyke?” ⁴ Tii boho roilemy rarybemyhỹrenyre; ibutumy roihikỹlemy rarybemyhỹrenyre kia rybe riywinymyhỹrenyre kia tahe tuu riwinyrenyõhyymyhỹrenyre. Kia rininimyhỹrenyre òbitihikỹmy kia heka iòhãrutyhy rare òteti hyrehekỹ ruhunymy raumynymyhỹre wesemy bede syraroki. ⁵ Iny mahãdu Samaria-ki rasỹnymyhỹrenyre ruberurenykre kiata rahinyrenykre roburenykre kia broreni riòre mana rỹsỹhỹkỹ Bete-Avem-ki rỹimyhỹre radykreu. Kia ỹnyxiwe òtaòta rybe-di ijohodu mahãdu rawohitxihitxirenykre kaa ityhydỹỹnareny iribireny rawyrenykreki kia ihõrõrenytyhyhykỹ rareki, ⁶ kia heka Assiria-ò rawykre kia iny aõ widee riwahinymyhỹre wesemy iwedureny nihikỹ dee. Israel iny mahãdu raixỹrurenykre dohodỹỹnaheki ratxirenyreki. ⁷ Israel iòlò radykre, kia iwese helòtyra node esetere ridymyhỹre wese. ⁸ Avem hãwalòmy xiwena dena rabrò rỹimyhỹre, tai iny mahãdu tatyhydỹỹnareny my rerinanymyhỹrenyre, kia rexihukre kiata bedeyxe ledelede-di rahetymy roikre. Iny mahãdu raryberenykre hãwalò rariehe deere: “Biwaheybenyke!” kia hãwalò deereny raryberenyre: “Biwawòbenyke!” ⁹ Deuxu Tyhyhykỹ rarybere: — Kia Gibea bedeki òraruna riwinyrenyrehyy, Israel iny mahãdu ixawirenyõhyyrenyre òrarunareny-ribi. Iurenana heka wounana rimyrenykre kaa iny mahãdu binahãkỹreny. ¹⁰ Diarỹ heka tureny aròhòtemy arirarytxynyrenykre. Hãwãhãwa mahãdu rexibutunyrenykre iòludurenymy kia diarỹ arirarytxynykreu iòrarureny òraru sõehekỹ-ki. ¹¹ –Israel heka broreni riòre iinyerymy rỹimyhỹre wese rare, kia maixõmoni tyre lamaluure isityy ritakremy. Òwòru rurawo tòti-ò relidire tii suu arana-di ritusinymy rariakremy. Diarỹ ariuherenykre Juda kia Israel òwòru alòbròna-ki raõmysỹdỹỹnyrenykremy. ¹² Diarỹ tamyreny rarybere: Bede biywinybenyke aworu alòbrònamy, aõwiwihikỹ òbitimy rỹimyhỹre bibrònybenykre kiata bihebenykre aõwiwihikỹ kia inymy derinana tuu riwinykre. Kia dorihe bede rimyre kai boho wadee bedexiòkesedỹỹnyrenykremy, Deuxu Tyhyhykỹ, kia diarỹ biulòra atyrereny aritxiwikre biulòra hedỹỹna wahe.” ¹³ Kia tuu biwinybenykewihikỹ, kai boho aõnaõna binabina tebrònytenyte, kia aõnaõna òbitityhy aõkõ tehetenyte kiata tetòhetenyte roi bederatyhyyle. — Kai boho tetyhynytenyte awounareny ityti heòty kia sõemy asodadureny sõehekỹ, ¹⁴ iurenana heka adeerenyhyy edehemynykre kia arurutereny rexihurenykre. Adeereny rutỹỹnykre iwese rutỹỹnyre wese tiubo Salmã iòlò rawounyre Bete-Arbel òludumy: tii ihãwareny rahurenyre kia ihãwyyreny rahurenyre kia urile ihãwyyreny rikròkròrenyre kia iriòrereny urile rikròkròrenyre. ¹⁵ Kawesemy heka rutỹỹnyrenykre Israel iny mahãdu kia taõbinareny òraru nihikỹ òrarurenyki. Kia txuu edeamy kanakreu, Israel iòlò rurukre.