12 ¹ Aumydỹdutxi ¹ iny õhõti reake, kai jyremy tatesamy, kia txuu ibinamy kanakrekotyremy, kia tahe wyrabede-ò rehemynykreu tahe kai marybekre: “Aõ heka wade awityhymy ihoõre.” ² Komy idi mohõtinykre, tiu bede-ò behemynykreu, tai tahe kai txuu loosonaki beaker ² , ahãdu taina-wana txuxareny ³ rexihurenyre, ka biuwetyylòra ⁴ tahe rirahuõtyhy ⁵ . ³ Kia tahe axiòrenydi ikiemy texietenyte, kia tahe mamytata benykre, kia atireny inihikỹre, kia tahe atireny urile reyweserenykre. Ka ureny rariòwyrenykre, kia tahe urihimyòle rasiranykre, kai tiu arỹsỹna bidewidewinyõtyhy. Kia arue urile ibinalemy idi betehekre, kia tiu kai aõdi itỹnytyhymy aijereõmy. ⁴ Kai õhõtitamy belekre, kia tiu rymy bewodỹỹwodỹỹ-ò boholaõtyhy. Kai aõhe-wana tiu moena ramoemyhỹre wodỹỹ-ò aijohoõna, kia wiuna rawodỹỹnymyhỹre-ò tule. Kia tahe rudihikỹ myikre, kia nawii roburenykreule. ⁵ Tai tahe kai bede rarielau buberukre, kia mariakrehãrele iòhãrukre. Kia iradereny iuramylemy relekre, kai tahe aõnaõnaki awimy tahãmyhỹte aribi ixawikre. Iny boho heka iny ixielyhynareny konana-ò diriranymy doimyhỹdenyde; kia tiubo tuu rutỹỹnykreu, kia iny mahãdu iny bede riranareny òraruki roburenykre. ⁶ Bede heka rexihukremy roimyhỹre, iwese atesina mana resemyhỹre wesele, kia isana rayròmyhỹreu, iwese butxi rabòhòmyhỹre wesele, tiu be hãluu sana wiwietyatxi rayròmyhỹre wesele. ⁷ Tai tahe umyreny ixybyle su node-ò roosekre tiribibo iny boho doide-ò, ka inytyytybyreny tahe Deuxu-ò roosekre. ⁸ Kia heka bòdỹỹnale rare, myy bedeery rarybere. Kia heka ibutumy bòdỹỹnale heka rare. ⁹ Bedeery nihikỹ heka tabedeery nihikỹ riuhemyhỹre, kia ixyby ixybyle iny mahãdu riixinanymyhỹrenyre aõ rierymyhỹremy. Tii heka ratyyritinyre, kia tahe riywinymy wiwesewesemy rybe ritidire. ¹⁰ Kia heka rybe wimy reàlàmyhỹre riuhemy ritidire, kia ibutumy tyyriti-ò riritinyre, kia heka inatyhymy òbitimy tuu rarybere. ¹¹ Iny bedeery mahãdureny rybe heka iwese wonatidese òwòru-ò rarutàmyhỹre wesemy rỹimyhỹre ralòwiwimy; Kia iwese rubedi ijohodi mahãdu hojurehedi rỹimyhỹre wese budoeni-di rariakremy rỹimyhỹre wesemy. Ka rybe heka Deuxu tuu tarybe riwahinyre, tii sohoji heka rybedi ijohodu nihikỹmy iny-ribireny ratximyhỹre. ¹² Wariòre, aõmamy adeereny ararybekemy watxireri: Tyyriti rirana heka ikiemy raritidỹỹmy rỹirakre; iny sõetyhymy rarytyyritinymyhỹre, kia heka inyrayky urile riteywesedỹỹnymyhỹre. ¹³ Kia ibutumy tuu rarybere, kia heka kaa rare: Deuxulau buberubenyke, kia tahe irybetyhydỹỹna bityhynybenyke kiemy tamy dori iny boho ruamy iny boho raumynyrenyre. ¹⁴ Iny boho heka ibutumy Deuxu dee iximyreny rekelyyrenykre, ibutumy aõbo iny boho riwinyrenyre wasimy, aõ awi aõ ibinamy.