10 ¹ Iwesemy tahe òhòrati rubu, aderòna hyna ixidi ribinanymyhỹre wesele, iyrybyle tasỹ iny itxỹte mahãdureny-ò, iny bedeery nihikỹ iratyre ròhònyke. ² Mobo bedeerymy ratximyhỹre, kia heka òbitimy inatyhymy aõ riwinymyhỹre, ka iny itxỹte mahãdu tahe aõ òbitimy inatyhymy aõ ibinamy riwinymyhỹre. ³ Ibutumy iny mahãdu rierymyhỹrenyre, tii itxỹtemy ratximyhỹremy; kia iny mahãdu rieryõmy rỹimyhỹre, kia tahe iinytyhy ta ihoõmy rierymyhỹrenyre. ⁴ Txibo awedureny nihikỹ adee reburekre-wana, kiauritre aõmysỹdỹỹ-ribi òlòmy ixitòedỹỹõmykre ¹ ; aõ inatyhymy reòsamyhỹre, aõwaxina iny tuu reàlàke, txibo kai ywimy atximyhỹte-ribi ixawiõkre-wana. ⁵ Diarỹ heka ka hãwaki aõnaõnabinabinamy rabire, kia heka hãwa wedu mahãdule tuu rarybere: ⁶ Tii boho iny itxỹte mahãdule aõmysỹdỹỹ nihikỹ rarie-ò risỹnyrenyre, kia iny òbitityhy ² rỹimyhỹre ixihewo-ò ririrenyre. ⁷ Diarỹ iny mahãdu deòdumy rỹimyhỹrenyremy rabire ararutureki ³ ririranyrenyrerimy, Iòlò tahe atimy ⁴ rariamyhỹ, iwese iny deòdu ririranymyhỹrenyre wesele. ⁸ Mobo hãluu riamyhỹre, kia heka taile resekre; mobo heto uhuari ritximyhỹre, ⁵ kia heka ⁶ hemylaladòmy reakre. ⁹ Mobo mana ritamyhỹre, kia heka tiile rihãlubudỹỹnykre ; mobo hee ritxuamyhỹre, kia heka tiile riwotõmynykre. ^{7 10} Txibo kai woma txuree bihukre-wana, kai sõetyhymy maõmysỹdỹỹnykre. Kia heka bedeerytyhymy bexiywiywinykre komy biuhekrekoki. ¹¹ Kia heka aõki adee awiõhyyre, txibo kai hemylalarywo-ò ⁸ bitybònymy birikre-wana. ¹² Mobo bedeery nihikỹmy ratximyhỹre heka rybewowydyna ixiki rimymyhỹre, ka iny itxỹte mahãdu tarybereny òbitikile rexihurenykre. ¹³ Tii heka komy aõnaõnabina tarybe riòrarunymyhỹre, kia tahe aõnaõna binabina itxỹte tarybe rihumyhỹre. ¹⁴ Iny itxỹte mahãdu heka tiu rybe-ribi ixawirenyõhyymyhỹrenyre. Iny-õ heka rieryõhyymyhỹre aõbo biurasòmy rutỹỹnykre, kia timy iny-õ turybeõna aõhebo rutỹỹnyrenykre iruburenysỹtybymy. ¹⁵ Hãbu itxỹte sohojityhyle, kia tahetorytxi reaõhyymyhỹre, kia urile resemyhỹre sõemy raõmysỹdỹỹnymyhỹreki. ¹⁶ Hãwa nihikỹ heka ibinamy ramyhỹre, kia hãwa dinodu iny witxira raykyrybe rityhynymyhỹreki, kia ta aõwedu ninihikỹ mahãdu iòrarudile risinymyhỹrenyre. ¹⁷ Ka hãwa nihikỹ awimy ramyhỹre, kia mobo hãwa nihikỹ dinodu tarybe sohojile riuhemyhỹre, kia aõwedu ninihikỹ mahãdureny tahe ixidi aõmysỹdỹỹ rierymyhỹrenyre, kia òbitimy riroximyhỹrenyre, kia sõemy aõko monamy riõmyhỹrenyre. ¹⁸ Txibo kai iny deywese aheto ratyti riywinykremy temyte, kia aheto akesedile sõemy rỹxikre, kia aheto tahe rariowykre. ¹⁹ Ixena heka iny riwiòhenanymyhỹre aõ iny-ribi tõhõti rusakremy, vinho tahe iny riwiòhenanymyhỹre iny rabedesakremy; ka nieru ihoõki tahe tiu aõ inyki ijõdiuõtyhy aõkyre riòre-õ. ²⁰ Kiauritre hãwa nihikỹ dinodumy aõmy turybeõmykre araykyki, kia hãbu iaõdimy ityhymy rỹimyhỹremy turybeõmykre aherinawoki, kia dori nawii-õ tuu ikoreny relyyke aõmybo tarybetamy.