¹ Iòlò Nabuodonosoru tuu rarybere relekremy mana rỹsỹhỹkỹ ritxoo, kia 27 metro-my irarie, inataõ metro-my iwebese, kia tuu rarybere Durá bedeki rỹikremy Babilonia hãwaki. ² Irahudita rarybere ibutumy Hãwãwedu wedu, hãwãsõmo sõmo wedu, nieru-di aõmysỹdỹỹdu mahãdu, dohodỹỹdu mahãdu deereny kia deereny ibutumy wedu wedu mahãdu ydòidenykremy mana rỹsỹ ritxoo relera-ò itxeremy. ³ Ibutumy tii boho dòidenyde kia làmamy ritàmanyrenyre mana rỹsỹhỹkỹ koki. ⁴ Kiata turybedu iòrarudỹỹdu rarybere katxiterehekỹmy: — Ibutumy iny mahãdu hãwãhãwa, iwitxira mahãdu, irybereny witxira mahãdu! ⁵ Kia boholabenykreu wiu wodỹỹna-ò, ajuròna wodỹỹ-ò, kia wodỹỹna òtaòta-ò, ibutumy atiòhumy bejujubenykre kiata berinanybenykre mana rỹsỹhỹkỹ ritxoo-my kia iòlò Nabuodonosoru relekremy rarybere. ⁶ Mobo tatiòhumy reseõkre kia mana rỹrỹhỹkỹ ritxoo-my rerinanyõkre kia idi dehu rỹikre iutyhyle ijyrena loosona-ò. ⁷ Kawesemy wiuna wiu wodỹỹna-ò, ajuròna wodỹỹ-ò, kia wodỹỹna òtaòta-ò, sitara wodỹỹna rawodỹỹnyreu, kia ibutumy iny mahãdu tai rỹimyhỹreny tatiòhumy reserenyre kia mana rỹsỹhỹkỹmy rerinanyrenyre. ⁸ Kawese bedeu biu-di aõmysỹdỹỹdu mahãdurenyõ tai irutaõmy rahãrenyre judeu boho-my raryberenykremy. ⁹ Tii boho raryberenyre iòlò Nabuodonosoru dee: — Kia iòlò ikiemy ratximyhỹre! ¹⁰ -Kai arybe tewahinyte myỹ: “Kia wiu wodỹỹna-ò roholarenykreu, wiu wodỹỹna-ò, ajuròna wodỹỹ-ò, kia wodỹỹna òtaòta-ò, sitara ibutumy tatiòhumy reserenykremy kia mana rỹsỹhỹkỹ RITXOO-MY RARINANYRENYKREMY. ¹¹ mobo kaa rybe rityhynyõkre idi dehu rỹikre ijàrena loosona-ò”. ¹² kai heka tesỹnytenyte judeu mahãdurenyõ Babilonia aõmysỹdỹỹdureny wedurenymy. kaa judeu mahãdu Sadrai, Mesai kia Abede-neko aratyhynyrenyõhyyre, rityhynyrenyõhyyrenyreri aỹnyxiwe my kia rerinanyrenyõhyyrenyreri mana rỹsỹhỹkỹ ritxoo-my kai relekremy tuu tarybete. ¹³ kamy roholareu nabuodonosoro reburere kia rarariowyre Sadrai dee Mesai dee kia abede-nego dee. tii boho radyrenyre tikibo iòlò ratximyhỹ-ò, ¹⁴ kia tii tamyreny rarybere: — Inatyhy weriki kai boho waỹnyxiwe tetyhynyõhyytenyte kia terinanyõhyytenyte mana rỹsỹhỹkỹ ritxoo diarỹ relekremy tuu rarybere? ¹⁵ -Kiahe awire, ka tahe kai boho texiywinymy toite wiu wodỹỹna-ò, ajuròna wodỹỹ-ò, kia wodỹỹna òtaòta-ò, sitara. atiòhumy besebenykremy kia berinanybenykremy mana rỹsỹhỹkỹ-my, kia wiuna wodỹỹna rawodỹỹnykreu? Tuu biwinybenyõkreki kai boho adireny dehu rerỹikre iutyhyle ijàrena loosona-ò. Tiwesena ỹnyxiwebo tahe arahedỹỹnyrenykre? ¹⁶ Sadrai, Mesai kia Abede-Nego kawesemy rirawyònyrenyre: — Iòlò, diarỹ boho arexiijerenyke aõkõre. ¹⁷ Kia txibo waDeuxureny, tuu rerinanymyhỹrenyre tamywikeki, tii riwahedỹỹnyrenykre ijàrena loosona-ribi, kia arurutere-ribi riwahedỹỹnyrenykre Iòlò. ¹⁸ Kia waDeuxureny riwahedỹỹnyrenyõkre hãrele, kai bede bierykre diarỹ boho arityhynyrenyõkre aỹnyxiwe kia arerinanyrenyõkre mana rỹsỹhỹkỹ ritxoo-my, kai relekremy tuu tarybete. ¹⁹ Kawesemy roholareu, Nabuodonosoro inihikỹmy iky reare inataõ jyre mahãdu dee, kia urile reburemy ratxònyhỹkỹre, kia rarybere ixyby debòinatxi sõemy ratoteekremy ijàrena dena. ²⁰ Irahudi rarybere tasodadureny iruruteretyhy ritaarenykremy Sadrai, Mesai kia Abede-Nego kia idireny dehu rỹikremy ijàrena loosona-ò. ²¹ Jyre mahãdu inataõ, ibutumy tatyyreny-di rexityynyrenymy tayhyitxenareny-di kia tatyyreny òtaòta-di, rataataarenyre kia idi dehureny rỹire ijàrena loosona-ò. ²² Iòlò rybe heka ratyhydỹỹre, ijàrena looso tahe itòteetyhymy roimyhỹ; iurenana heka heòty rade sodadu mahãdu rirubunyrenyre kia rehurenyre jyre mahãdu inataõ-di iro-ò. ²³ Kiata rataataarenymy Sadrai, Mesai kia Abede-Nego ijàrena loosoro-ò rejujurenyre. ²⁴ Isitere-ribile Nabucodonosor rexilàmadỹỹnymy, kia sõemy ruberumy rỹỹraxire tadohodỹỹdureny mahãdureny-ò: — Inataõ aõkõ aõbo hãbu mahãdu retaataarenymy inyboho ijàrena loosona-ò idi rehurenyre? — Kohe, tuu— Tii boho rirawyònyrenyre. ²⁵ –Timybo tahe diarỹ inaubiòwamy hãbu sõemy rabireri rariarenymy ijàrena loosoroki? — iòlò rỹỹraxire. — Tii boho rariarenyreri kua woki, aõhỹỹmy rutỹỹnyrenymy aõkõ. Inaubiòwa hãbu aõhe-wana ãju rare. ²⁶ Taita iòlò rehemynyre ijàrena loosona ijo bire-ò kia ryryre: — Sadrai, Mesai kia Abede-Nego, Deuxu Rariehekỹ deòdu, bòdòhònydenyke ka-ò bòdòike! Iny inataõ ijàrena loosona-ribi dòhònydenyde, ²⁷ kia ibutumy wedu ninihikỹ mahãdureny ityyreny-ò ritehemynyrenyre kia robirenyre heòty aõhỹỹmy risỹnyrenyõhyylerenyre. Heòty rade iradetireny riwosinyõhyyrenyre, ityyreny roomy aõkõ idi ratximyhỹreny, kia tii boho wàdà silỹny-di aõkõ ratximyhỹreny. ²⁸ Iòlò ryryre: — Kia Sadrai Deuxu, Mesai kia Abede-Nego tuu rỹihyymy rarekre! Tii tatyytyby ãju diteònymy rihedỹỹnyrenyre tadeòdureny, kia tii boho rityhynymyhỹrenyre. Tii boho warybe wahidỹỹnana-ò reòbyrenyõhyyrenyre; kia iribiòtumy, rubu-ò rexiwahinyrenyre kia tatiòhurenymy reserenyke-ribi kia ỹnyxiwemy rarerinanyrenyke-ribi kia heka iỹnyxiwereny aõkõ rare. ²⁹ Iurenana warybe rewahinyreri aõtxile inyõ, iwitxira hãwãhãwãludu ibinabinamy rarybekre Sadrai Deuxu-my, Mesai kia Abede-Nego Deuxurenymy, kia rayreryremy rakròkròrenykre kia ihetoreny ibutumy rejujurenykre. Kiemy dori iwitxira Deuxu ihoõre kawesemy rihedỹỹnyrenyke. ³⁰ Taita iòlò Nabuodonosoru jyre mahãdu inataõ risỹnyrenyre iõmysỹdỹỹnareny ixyby ratyhydỹỹrenykremy Babilonia hãwãbedeki.