¹ Inataõna wyramy Joaki Juda iòlò-my bede idi rỹire, Iòlò Nabuodonosoru Babilônio ludu, Jerusalë hãwamy raòhòterenyre, kia isodadureny riyrawonyrenyre ihãwareny. ² Deuxu Tyhyhykỹ riwahinyre Nabuodonosoru rimykrelemy Jerusalë hãwãkia tule iaõnaõnareny tyhyhykỹreny Deuxu rybe-di ijohona heto-ki rỹimyhỹremy. Nabuodonosoru riwyre kaa aõnaõna Babilonia dee kia tuu rarybere iinỹxiwereny hetowo-ò rỹikremy. ³ Iòlò Nabuodonosoru rarybere Aspenaz dee, heto aõmysỹdỹỹdu wedu kia ritarenykremy israelita mahãdu brejumy dòidenyde kia aõtxi iòlò sỹreny jyre mahãdu kia tule iny ninihikỹ mahãdu sỹreny jyre mahãdu. ⁴ Kia ibutumy tii boho awihyylemy kia aõ taireny ibinanarenyõhyyrenymy; kia ibedeeryrenykre, kia ratohodỹỹrenykre kia ibedeerymy raõmysỹdỹỹnykremy iòlò heto aõmysỹdỹỹnaki. Kiata iwitxira rybe rieryrenykre kia ratyyritinyrenykre babilônio tyyriti-di. ⁵ Iòlò tule tarybe riwahinylere jyre mahãdu txuu iyhyõmy rirỹsỹrenykremy tii rirỹsỹrenyreõtyhyle riõmyhỹrenyreõtyhyle riõrenykremy. Irahudi tahe inataõ wyra rimyreny sỹtybymy, kaa jyre mahãdu taaõmysỹdỹỹreny iòlò aõmysỹdỹỹna heto riòrarunyrenykre taaõmysỹdỹỹreny. ⁶ Kia ikyrenyki ratamy ratximyhỹreny Danieli, Anania, Misael kia Azaria ibutumy Juda iny mahãdureny. ⁷ Aspenaz tamyreny iwitxiramy nii riwahinyre, kaa wahe, Beltezasar, Sadrai, Mesai kia Abede-Nego. ⁸ Danieli ixiki rahãre isuisumy rareõkremy kia rỹsỹna rỹsỹ-ki mona momoki kia iòlò riwahinymy raremyhỹ; iurenana tahe rare Aspenaz-ò ixitòedỹỹmy riwiòhenanykremy tuu riwinykremy timybo rexiywinykremy. ⁹ Deuxu tuu riwinyre Aspenaz awityhymy ratxikremy Danieli dee kia awihyymy tamy ratxikremy. ¹⁰ Kiata Aspenaz ruberumyhỹ iòlò lau iurenana Danieli dee rarybere: Kia iòlò heka wawedu tuu rarybere: — aõbo kai boho birỹsỹbenykremy biõbenykremy. Kia txibo rierykreki kai boho adeõdeõmy awebinadurenymy adireny retehekre kia iwitxira jyre mahãdureny-ribi, taita tii riwarubunykre, kia tahe kai boho waòrarurenydỹỹrenydukre. ¹¹ Tai Danieli rare rybemy ixidireny itxeredu dee sodadu kia Aspenaz-ò rarybere idireny tarukimy ratxirenyre dee Anania, Misael kia Azaria. Danieli rarybere tamy: ¹² — Adee arexitòenykre kai urihixina wadeereny biwinykremy. Debòitue txumy wadeereny rỹsỹna wityhyle biwahinykre kia bee wamonarenymy. ¹³ Debòitue txu ixihudu iòhò-di wadireny betehekre kia jyre mahãdu iòlò rỹsỹna rirỹsỹrenyre mahãdureny-wana. Taita timybo aratxirenykre-ki, kai aõwaxina aõhebo ixideewimy biwasỹnybenykre. ¹⁴ Sodadu idi itxeredureny tamy reobyre kiata debòitue txu-my urihixina tamyreny riwinyre. ¹⁵ Debòitue txu rexihureu inaubiòwa israelita jyre mahãdu idewidewimy kia iruruterenytyhymy ratxirenyre kia jyre mahãdu iòlò rỹsỹna rirỹsỹmyhỹrenyre-ribi. ¹⁶ Taita sodadu idi itxeredureny iribireny rỹsỹna kia mona besò ritarenyre kia riwahinymy raremyhỹ inaubiòwa jyre mahãdu-ò kiata rỹsỹnawityhyle tamyreny riwahinymy raremyhỹ. ¹⁷ Deuxu riwahinyre inaubiòwa jyre mahãdu-ò bedeeryhykỹ sõetyhymy ityyritireny kia babilônio bededỹỹnana, ka Danieli dee tule riwahinylere rasina itxerena riòbitinymy rarekremy. ¹⁸ Inataõ wyra konanamy raixinadỹỹmy ratxirenyre kia iòlò Nabuodonosoru tuu riywinyre, Aspenaz ridyre ibutumy jyre mahãdu iòlò itxerenamy. ¹⁹ Kiata tamyreny rarybere, kia ibutumy inyõ ihoõhyyrenyre mobo raurihirenykemy Danieli-wana, Misael-wana kia Azari-wana. Iurenana iòlò aõmysỹdỹỹna hetowo-ki raõmysỹdỹỹnyrenyre. ²⁰ Kia ibutumy iòlò alỹỹraxi riwinymyhỹre aõtxile aõ ijyy bedeeryhykỹ yda aõnaõna erynana. Kia rierymy idi rekoamyhỹrenyre iny inaubiòwa boho, debòituemy ixyby ibedeeryreny kia ibutumy ibedeeryrenyre jure mahãdureny-ribi kia ibutumy babilonia urerarudu mahãdureny-ribi. ²¹ Kia Danieli ratxire iòlò aõmysỹdỹỹna hetotyhyki kia iòlò ciro riòrarunyre bedeuhukỹle Babilonia riwedunyre.