¹ Weriri bede ratymy rarasinyre. Deuxu rasimy wadee riteòsinyre aõnaõna: weriri roki tahe bederatysò rỹimyhỹ. ² Wadee tahe rỹỹraxire: — Amò aõmybohe tabiteri? — Sõemy bederatysòmy weriri roki! — Myhe rerawyònyre. Tahe wadee rarybere: — Bede heka rexihura Israel mahãdu-ò, rarosonyra heka, bederaty rasònymyhỹre wesemy heka rỹireri. Tiu heka waraky arirahoreõtyhy ixyby tamyreny. ³ Tiu txuuboho tahe wiule rỹike hàre ibru sõemy rỹikre hetohokỹ-di rubu sõemy rỹikre, rubu ityhynaõlemy reakre aõtxile idi dehurỹikre. — Bodoholakre! Jiarỹ iòlò wedu nihikỹ tuu rarybereri. Israel mahãdu rexiòrarure. ⁴ Kaiboho tahe bodolabenykre sõemy iaõkõ mahãdu-di tesinymyhỹtenyte kaa bede-ki. ⁵ Myhe aryberenyre: Ahãdu tỹmyra deysana rexihukeki awityhyke ijoi maixõmo-di rohonykemy! Sàbado (sebòò inatxi txuu) rexihukeki awityhyke! Ixybyle orotxu node-di (trigo) ijoi rohonykeny, iòwynihikỹmy raòwykre, rabòdỹỹrenykre. ⁶ Ijoho rohonykre orotxu nõde binadile tamyreny. Iaõkõ mahãdu tahe tiu hãrele waa sohoji dori tiu riwyõtyhy. Tawyxiery-di tahe ixidi rowynyrenykre. ⁷ Tai tahe, iòlò wedu nihikỹ Israel mahãdu wiuna, rybe tyhymy rarybekre. — Tiu heka wanohõti rusaõtyhy waijoi tuu riwinyreki. ⁸ Iòraru-ki tahe suu ramytatakre, tuu hãwadu mahãdu tahe sõemy rasỹbinakre bederyrymy. Suu heka raòwynykre tasỹ rabedekre Nilo bero wesemy. ⁹ Kia txuu tahe, ariwinykre txutyeule heka txuu ralokre, txulemy taheka bede rurunykre. Jiarỹ iòlò, wedu nihikỹ tuu rarybereri. ¹⁰ Deysana tahe rubunamy arirahorekre; Wiu wesemy heka sỹbina rohonykre. Bedewomy, kaiboho heka tyky sinihikỹdi bexityybenykre bexi raterenybenykre. Hãbu tariòre rubu-di rahinymyhỹre wesemy masỹbinabenykre. Tesehyky tahe rexihukre. ¹¹ Ioholemy tahe rareri rama arijaradỹỹnykre-ò hãwa hãwa butumy. Butumy rama reakre, rỹsỹna rexihura-ki aõkõ, bee, bee rexihura-ki aõkõ. Butumy tahe bedese wesemy Deuxu rybe raijekre. ¹² Tahe rekoakre Rubu aho-ò (Mar Morto) Rubu aho-ò (Mar Mediterrâneo), tasỹ rirahukre iraruwe ribi-di (ibnanawe) ribi-di, Deuxu rybe riijemy, tiu tahe itxi rekõaõtyhy. ¹³ Txiutxuubo tahe, weryrybo ijadòmatyhy bedesemy (rohõtibrekre). ¹⁴ Samaria ritxoo tyhydỹỹdu mahãdu, ijõ mahãdu: — Dã deuxu tyhydỹỹdu” ỹda “Berseba tyhydỹỹdu”. Kia mahãdu heka taixi butumy rahukre tiu ixyby rỹiõtyhy. Jiarỹ, iòlò wedu nihikỹ tuu rarybereri.