¹ Ijõ bededỹỹnanasỹ, wedu nihikỹ sõemy Israel mahãdu-ki ibinamy rahare iu Davi awimy aõkõ iu ratximyhỹ. Kiamy Deuxu Davi dee rarybere: —Makre ta ibutumy Israel mahãdu-di mariakre tiwesebo sõe rỹireri bierykremy Judà mahãdu sõe tule bierykre. ² Taita Davi Joabe dee tuu rarybere, sodadu mahãdu wedu-ò, kiamy tamy rarybere: —Makre sodadu mahãdu wana ibutumy Israel mahãdu sỹdi mariakre, ibràra-di makremy ta beà-ò idi manariamy manakre, ixỹ sõe erysymy, aõma dori arierykemyreri tiwesebo iny sõereny inyboho ihỹrenyre. ³ Ta kiamy Joabe wedu rirawyònyre: —Wedu nihikỹ, iny Deuxureny, inihe inyboho risõenyrenykre 100 bede òhòkỹlemy wiji rỹire ratyremy, ka arue tuu kodobikre! Aõmybo tahe tuu tahõtinyteri ka ixỹ sõe erysymy? ⁴ Urile tahe wedu inatyhyhykỹmy Joabe dee rarybere sodadu mahãdu dee tule irybe rityhynyrenykremy; tahe iribi roireny Davi ribi roirenyre Israel mahãdu sõedi rariarenykremy. ⁵ Jordaõ bero kotxi riòhòrerenyre tahe Aroe beà weribiò rexibutunyrenyre, vale hãwã bede-ki Gate bedebedehekỹki. Iribi tasỹ ibràra-ò roirenyre Jazer hãwa-ò. ⁶ Iribi tasỹ ixyby roirenyre Gileade bede-ò ihyyta gade bede òhòkỹle ritehemynyre, heteu mahãdu su-ò. Tasỹ Dã hãwa-ò roirenyre Dã hãwã ribi tasỹ iraru weribiò rekoarenyre, Sidõ bede-ò. ⁷ Iribi tasỹ beà weribiò riberenyrenyre, Txiru hãwa-ò, iuhuari dimy roimyhỹre wahe, iribi tahe ibutumy bedebedemy rekoarenyre heveu mahãdu hãwamy kananeu mahãdu ihyy Berseba hãwã òhòkỹle rexionananyrenyre, Juda su beà weribiò. ⁸ Kawesemy he rariarenyre, nove ahãdu ribi waitue txu sõemy bede rierenyre rahudi, tahe Jerusalẽ-ò ribuarere, bedebedemy ibutuy rariareny rahudi. ⁹ Tahe tiiboho wedu dee riteòsinyrenyre hãbu sõe sodadu-my raõmysỹdỹỹrenyke riòbyny kiamy sõereny: 800.000-my Israel mahãdu-ki tasỹ Juda bedekira 500.000-my. ¹⁰ Ka irahudi, Davi idireny rariare rahudi, ixidee sõemy rexirahere idi ramytxitxire, kiamy tii rarybere: —Wedu nihikỹ Deuxu, òraruna heka ixidee rewinyra ibina hãbu mahãdu sõe-di rariara òraru-ki. Txiòtalàhà ini, waribi bisuhosuhokre aõkerỹbo! Ka rewinyra heka itxỹteitxỹte herbile tuu rewinyra. ^11-12 Tai òraruki ta wedu nihikỹ teòdu Gade dee rarybere, Deuxu rybemy Davi dee rarybemyhỹre dee: —Makre ta kiamy Davi dee marybekre inataõ bededỹỹnanamy tamy ariwahinykre ikyribi ta ijõ ixidee ritakre; tibo ixidee ritakre mynadi xe tamy ariwinykre. Biurasò rudiu tahe tamy rare, Davi rexixamy ratximyhỹ-ò. ¹³ Gade xe rare tamy rybemy, iko relyyre aõmybon Deuxu tamy raryberemy ta ritỹỹraxinyre: —Aõbo he adee awikre? Inataõ wyramy au-ki rama reakre aõbo, da inataõ wyramy aõbo aòludu mahãdu lau brebumy beamy mabekre aõbo da kõmy aõbo inataõ wyramy au-ki banana-di aõhõkỹmy butỹỹnymy mabekre? Wylemyta tuu manarybe wadee Deuxu dee tuu ararybekremy. ¹⁴ Davi rirawyònyre: —Waòrahe rurumy watxireri, kiaremy heka hãbu mahãdu aõhỹkỹhỹkỹmy (riwasnykehe) aõkõre. Kiaremy heka wedu nihikỹ Deuxu le heka ixinamy aõhỹkỹmy (riwasnyrenykre), tiin dori wadeereny iruxetòe ijõdikre! ¹⁵ Tahe wedu nihikỹ banana-di tamyreny rehure Israel mahãdu tyre, rudile ihyy tiobo itxu ritidire-ò rehemynykre uhukỹle reyterenykremy. Ibràra weribiò sỹdu mahãdu tasỹ beà weribiò sỹdu mahãdu-my mahãdu heka tabre rahure 70.000-my heka israelita mahãdu ituerenyre. ¹⁶ Ka wedu nihikỹ ỹju Jerusalẽ hãwã hudumy rakremy ratximyhỹ-ò, ta wedu nihikỹ tawo rirahorere ixyby ixỹ aõhõkỹmy (risnykõkremy) ta rarybere ỹju ròrubudỹỹmy ratximyhỹ dee: —Ixãwike hewaxe! Awitahe! Wedu nihikỹ ỹju aõma bire-ki ihỹmyhỹ tai aõnaõna ty riterymyhỹre-ki Arauna hõrõ jebuseu mahãdu wahe. ¹⁷ Davi tuu robire ỹju ixỹmy raòhòtemyhỹmy taita kiamy Deuxu dee rarybere wedu nihikỹ dee: —Jiarõy sohojile hewa bede òrarureri. Jiarỹ heka reòsara. Aõbo heka ixỹ mahãdu riwinyra? Jiarỹ hãwyy ta wariòreboho wana heka aõhỹkỹhỹkỹmy (biwasnybenyke). ¹⁸ Iu bedeule tahe Gade rare, kiamy Davi dee rarybere: —Makre tai aõnaõna ty raterymyhỹre-ò Arauna hõrõ wahe taita xiwena biwinykre Deuxu dee. ¹⁹ Tahe Davi Deuxu rybemy reòbyre, wedu nihikỹ wahe, taxe rare, tuu Gade tamy rarybere mynamy. ²⁰ Arauna ixirawotxi retehere ta wedu taijoi mahãdu wana tamy rybemy rarerimy robire. Taira tatiowomy resere suò taòmy roire, Davi kotxi. ²¹ — Wedu, aõoherekibo heka kaò tateri? Davi rirawyònyre: —Suõbradỹỹmy rareri tai xiwena ariwinykremy Deuxu dee, wedu nihikỹ-ò, banana ròte ixãwikremy. ²² Taita Arauna kiamy rarybere: —Wedu, ixinamy ixideewimy aõaxina ibutumy bimykre ta Deuxu dee biwahinykre. Kaki ka broreni rỹire biwòsinykremy xiwemy biwahinykremy, ka iaõnaõnareny kalemy rỹire; ka aõnaõna ty idi raterymyhỹre òwòru tasỹ hemy biuhekre. ²³ Arauna ibutumy wedu-ò riwahinyre irahudita kiamy rarybere: —Wedu nihikỹ, aDeuxu, kỹny axiweò reobykre! ²⁴ Urile tahe wedu kialemy rirawyònyre: —Txiòtòetuke, tamy areòbyõkre. Ibutumy ariòwynykre. Jiarỹ wedu nihikõy, waDeuxu dee, iòwykõmy xiwe ariwahinyke ihoõre. Tahe Davi xe suu riõbranyre tai aõnaõna ty raterymyhỹre broreni tule riõbranyre ciquenta prata sõe-di. ²⁵ Taile xiwena riwinyre Deuxu dee, wedu nihikỹ wahe, tahe xiwe tamy riwahinyre riwòsiny wiwiny riwahinyre tule xiwe bede ywina wana. Tahe wedu nihikỹ ixitòedỹỹna dirawyònyde, ta aõwesele banana Israel-ki ralòmyhỹre ixãwire.