1

¹ جی عیسی مسیحِ خادمانِ طرفْ پولس و تیموتائوسْ، به کشیشان و خادمانْ، و همۀ مُقدسینی کی فیلیپی میَأن ایسَد و مسیحِ عیسی مرَه مُتحدد. ² فیض و سلامتی اَمی پئر خدا، و خداوند عیسی مسیحِ طرفِ جَه بر شومَأن.

³ هر وخت شمرَه به یاد اَورم خودمِ خدایَ شُکر کونم. ⁴ و همیشه می هر دوعا میَأن خوشی مرَه شمرِه دوعا کونم. ⁵ چون جی هون روزِ اولی کی انجیلِ پیغامَ بیشتَأوستید تا هَسَه اونِ انتشارِ رِه فعال بوئید. ⁶ من اطمینان دَأرم اونی کی اَ خُرمه کارَ شیمی میَأن شروع بوکوده، تا روزی کی عیسی مسیح وَأگرده خو کارَ به کمال رسَأنه. ⁷ طبیعیه کی من دربارۀ شومَأن اَطو فکر بوکونم، چون شومَأن همیشه می دیلِ دورون جا دَأرید، چی زندانِ دورون بِئسم، چی آزاد بوبوم و بخَأیم انجیلِ جَه دفاع بوکونم و اونِ حقانیتَ اِثبات بوکونم، شومَأن همیشه خدا فیضِ دورون می مرَه شریکید. ⁸ خدا شاهده کی چقدر شیمی دِئِن رِه مُشتاقم، اونم اِشتیاق و مُحبتی مرَه کی خودِ عیسی مسیح می دیلِ دورون بنَه دَأره ⁹ هَنه وَسی شمرِه دوعا کونم کی شیمی مُحبت نسبتِ به دیگران روز به روز ویشترَ بِه، و شیمی فَهم و مَعرفتِ روحانی هم رُشد بوکونه و به حدِ کمال فأرسه. ¹⁰ تا بتَأنید خوب و بدَ تشخیص بدید و بهترینَ انتخاب بوکونید، تا روزی کی عیسی مسیح وَأگرده کاملاً پاک و بی عیب بیبید. ¹¹ و دوعا کونم کی شیمی زندگی پور جی عدالتِ ثمرات بیبه، ثمراتی کی بواسطۀ عیسی مسیح بدس اَیه، و باعث بِه کی خدا جلال پیدا کونه و ستایش بیبه.

پولسِ زنجیران و انجیلِ انتشار

¹² اما ای برأرأن، خَأیم بدَأنید کی چی می سر بأمو و باعث بوبُست کی اِنجیل منتشر بیبه. ¹³ جوری کی همه تَه نِ رِه، و همۀ گاردِ امپراطوری سربازانِ رِه آشکارَه بوسته کی من مسیحِ وَسی زندانیم. ¹⁴ تازه می زندانی بوستَأن باعث بوبُست کی باقی مسیحیان دِ زندانِ جَه نترسد، و می صبر و تَحملْ اوشَأنَ جُرأت بدَه کی خدا کلامَ بدونِ ترس همه جا اِعلام بوکوند ¹⁵ ولی ایسَأد بعضیانم کی حسادتِ جَه شُد مسیحِ رِه موعظه کوند و خَأید می مرَه رقابت بوکوند، ولی بعضیانم جی رویِ اِخلاصْ ¹⁶ و محبتْ اَ کارَ کوند، چون دَأند کی من اِنجیلِ دفاع کودَأنِ وَسی دکفتده دَأرم زندان. ¹⁷ ولی اوشَأنی کی چشم و هم چشمی وَسی بشارت دهد، نه جی روی مُحبت و اِخلاصْ، بلکی خیال کوند تأند اَ کارانِ مرَه می دَرد و رنجَ زندانِ دورون زیادترَه کوند. ¹⁸ ولی چی اَهمیتی دَأره؟ مُهم اَنه کی مسیح موعظه بیبه، چی نیّت دوروست بیبه چی نادوروست، و من هَنه وَسی خوشحالم. بله، بازم شادی کونم، ¹⁹ چون دَأنم کی شیمی دوعایانِ وَسی و عیسی مسیح روحِ اَمرَه، اَ کاران به نفعِ من تومامَ بِه و می نجاتَ باعث بِه. ²⁰ من مُشتاقانه انتظار کشم و اُمید دَأرم کی هیچ چیزِ دورون خجالت زده نوبوم، بلکی همیشه مَأنستَأن شجاعتِ اَمرَه دربارۀ مسیح گب زنم، تا چی زنده بمَأنم چی بیمیرمْ، مسیحْ سربلندی و جلالَ باعث بوبوم. ²¹ چون زندگی، مرِه فرصتی ایسه کی مسیحَ خدمت بوکونم، و مرگم به نفع من تومامَ بِه چون شؤم اونِ ورجَه. ²² ولی اگر می زنده ماندن باعث بیبِه کی عدۀ ویشتری مسیحَ ایمان بأورد، پس واقعاً نَأنم کَ ی تَه یَ انتخاب بوکونم، مَردنَ یا زنده ماندنَ! ²³ اَ دو راهی دورون سخت گرفتارَ بوستم، چره کی نأجِه دَأرم هر چی زودتر بیمیرم و بوشوم مسیحِ ورجَه، چون اَی تَه خیلی بهتره. ²⁴ ولی شیمی وَسی خیلی واجبتره کی زنده بمأنم. ²⁵ یقین دَأرم و دَأنم کی شیمی شادی و رُشدِ ایمانی وَسی مدتی زنده مَأنم و شیمی اَمرَه ایسَم. ²⁶ وختی دوباره بَأیم شیمی ورجَه، مُطمئنم مسیحِ عیسی یَ افتخار کنید کی مرَه سالم بدَأشته دَأره. ²⁷ به هر حال، شیمی جَه خَأیم جوری رفتار بوکونید کی مسیحِ اِنجیلِ شایسته بیبه، تا چی بأیم شیمی ورجَه و شمرَه بیدینم و چی نَأیم، دوس دَأرم وختی شیمی حال و اَحوالِ جَه خبردارَ بؤم، خاطرجمع بوبوم کی طبقِ ایتَه روحْ برقرار و اُستوارید، و ایته بدنِ مَأنستَأن دوش به دوشِ هم انجیلِ ایمانِ رِه تلاش کونید، ²⁸ و هیچ کاری دورون مخالفینِ جَه ترسی نَئرید، کی هنَ اوشَأنِ رِه نشانه ایی ایسه کی هلاکتِ راهَ شوئون درد، و شمرِه نشانه ایی ایسه کی خدا شیمی اَمرَه یه و نجات پیدا کونید. ²⁹ چون اَ افتخار شیمی نصیب بوبُسته کی نه فقط مسیحَ ایمان بأورید، بلکی اونِ وَسی رنج و زَحمتم بیدینید. ³⁰ شومَأن پیشترانِ رِه بیده بید کی من چوطو مسیحِ وَسی مبارزه یَ مشغول بؤم، هَسَه شومَأنم هو مبارزه دورون می مرَه شریکید و هوطویی کی ایشتَأوید من هنوزم هون مبارزه یانَ مشغولم.