5

¹ وختی عیسی اون جمعیتَ بیده بوشو کوهی جُر و اویَ بینیشت. اونموقع اونِ شاگردان بأمود اونِ ورجَه ² و اونْ شروع بوکود اوشَأنَ تعلیم دَئَن و بوگوفت: ³ «خوش به حالِ کسانی کی روحِ جه فقیرد، چون آسمانِ ملکوت اوشَأنِ شینه. ⁴ خوش به حالِ ماتم زده یان، چون اوشَأنْ آرام بهد. ⁵ خوش به حالِ فروتنان، چون کی اوشَأنْ زمینِ وارث بهد. ⁶ خوش به حالِ کسانی کی عدالتِ رِه تشنه و ویشتاید، چون اوشَأن سِئرَ بود. ⁷ خوش به حالِ اوشَأنی کی رَحم کوند، چون اوشَأنَ رَحم بِهه. ⁸ خوش به حالِ پاک دیلان، چون اوشَأنْ خدایَ دیند. ⁹ خوش به حال کسانی کی صُلح کوند، چون اوشَأن خدا زأکأن دَخَأده بهد. ¹⁰ خوش به حال کسانی کی عدالتِ وَسی زحمت دیند، چون آسمانِ ملکوت اوشَأنِ شینه. ¹¹ خوش به حال شومَأن، اونموقعی کی مردم می وَسی شمرَه فُحش بدد و اذیت بوکوند، و می وَسی شمرَه اِفترا بزند و بر علیه شومَأن دوروغ بوگوید. ¹² خوشحال بیبید و شادی بوکونید، چون شیمی اَجرْ آسمانِ میَأن عظیمه، بدَأنید کی پیغمبرایِ قبلی یَ، هَطو اذیت بوکودد.

نور و نمک

¹³ شومَأن اَ جهانِ نمکید. اگر نمک فاسد بیبه، چوطو شَه دوباره اونَ نمکی کودَأن؟ دِ هیچ مصرفی نَئره جُز اَنکی فیشَأده بیبه و اونَ پامالَ کوند. ¹⁴ شومَأنْ اَ جهانِ نورید، شهری کی ایتَه تپه رو چَأکوده بیبه یَ نشَه جیگا دَئَن. ¹⁵ و چراغَ روشنَ نوکوند تا پیاله جیر بند، بلکی اونَ چراغدانِ رو نهد تا همۀ کسانی کی خانه دورون ایسَدَ نور بتابانه. ¹⁶ شیمی نورم وَأستی هَطو مردمِ رو بتاوِه تا شیمی اعمالِ دوروستَ، بیدیند، و شیمی پئرِ آسمانی یَ تمجید بوکوند.

عهدِ عتیقِ اعتبار

¹⁷ فکر نوکونید بأموم تا تورات و اَنبیاء نوشته یانَ باطلَ کونم، نأموم باطلَ کونم بلکی بأموم تا تومامَ کونم. ¹⁸ شمرَه گویم یقین بدَأنید تا آسمان و زمین برجاید، هیچموقع ایتَه همزه یا نقطه توراتِ جَه از میَأن نیشه تا همه تَه انجام بیبه. ¹⁹ پس هر کس حتی ایتَه از کوچی ترین اَحکامَ بیشکینه و مردمَ اَطو تعلیم بده، آسمانِ ملکوتِ میَأن کمترین حیساب بِه، ولی هر کی بجا بأوره و دیگرانم تعلیم بده، آسمانِ ملکوتِ دورون پیله کس دخَأده بِه. ²⁰ شمرَه گویم تا بدَأنید، تا شیمی دوروستکاری، فریسیان و یهودِ مُلایانِ دوروستکاری جَه ویشتر نیبه، هیچموقع نتَأنید آسمانِ ملکوتَ بودورون بیشید.

خشم

²¹ بیشتَأوسته اید کی قدیمِ مردمانَ بوگوفته بوبُسته بو؛ "قتل نوکون" و هر کی قتل بوکونه محکوم بِه، ²² ولی من شمرَه گویمْ هر کس هَطو هَچین نسبتِ به خو برأر عصبانی بیبه محکوم بِه، و هر کی خو برأرَ "کؤدَن" دخَأنه وَأستی اونَ بوبورد دادگاه، و اگر "احمق" دخَأنه آتشِ جهنمِ مُستَحَقه. ²³ پس اگر تی قربانی یَ بوری قربانگاهْ و اویَ ترَه بخاطر اَیه کی تی برأرْ تی گردن حقی دَأره، ²⁴ تی قربانی یَ قربانگاه میَأن بنن و بوشون اول تی برأرِ مرَه صلح بوکون و بعد بیأ تی قربانی یَ تقدیم بوکون. ²⁵ هر کس تی جَه شاکیه، وختی هنوز راه میَأن ایسَأیی اونِ اَمرَه صُلح بوکون، نوکونه ترَه بوبوره قاضی ورجَه و اونم ترَه فَأده مأمورِ دس و مامور ترَه تَأوَأده زندان، ²⁶ یقین بدأن کی تا دینارِ آخرَ فأندی، هیچموقع اویَ جَه آزادَ نیبی.

شَهوت

²⁷ بیشتَأوسته اید کی بوگوفته بوبُسته "زِنا نوکون" ²⁸ ولی من شمرَه گویم هر وخت مردی از رویِ شهوتْ زنی یَ نظر تَأوَأده، هو لحظه خو دیلِ میَأن اونِ اَمره زِنا بوکوده. ²⁹ پس اگر تی راستِ چومْ تی گومراهی یَ باعث بِه، اونَ بیرون بأور و فیشَأن، تِرِه بهتره کی عضوی تی بدنِ جَه ناقصَ بِه تا اَنکی تی تمامِ بدنْ جهنمِ میَأن تَأوَأده بیبه. ³⁰ اگر تی راستِ دسْ ترَه گومراه کونه، اونَ وَأوین و تی جَه دورَ کون، چون تِرِه بهتره کی عضوی تی بدنِ جَه ناقص بیبه تا اَنکی کلِ تی بدنْ جهنمِ میَأن تَأوَأدَه بیبه.

طلاق

³¹ و بوگوفته بوبُسته "هر کسْ خو زنَ طلاق دِهه، وَأستی اونَ طلاق نامه ایی فَأده. ³² ولی من شمرَه گویم؛ هر کس به غیرِ زناکاری، خو زنِ جَه سیوایَ بِه باعث بوبُسته اون زِناکار بیبه، و هر کسم اونْ زنِ اَمرَه ازدواج بوکونه زِنا بوکوده.

قَسَم

³³ باز بیشتَأوسته اید کی قدیم مردمانَ بوگوفته بوبُسته "قسمِ دوروغ نوخور و هر قسمی کی به نامِ خدا بوخورده ایی عمل بوکون" ³⁴ ولی من گویم؛ هیچموقع قسم نوخور، نه آسمانَ چون خدا تختِ پادشاهیه، ³⁵ و نه زمینَ کی اون پا جیرِ کُرسیه، و نه اورشلیمَ، کی اون پیلدانه پادشاه شَهره. ³⁶ تی خودتِ سرَ هم قسم نوخور، چون نتَأنی ایتَه مویَ سیاهْ یا سفیدَ کونی. ³⁷ بلکی شیمی بله، بله، و شیمی نه، نه بیبه، ویشتر از اَن شیطانِ جَه یه.

انتقام

³⁸ بیشتأوسته اید کی بوگوفته بوبُسته "چوم عوضِ چومْ و دندان عوضِ دندان" ³⁹ ولی من شمرَه گویم کسی یَ کی ترَه بدی کونه، بدی نوکون، اگر کسی تی صورتِ راستِ طرفَ سیلی بزَه تی صورتِ اوطرفم اونِ طرف وَأگردَأن. ⁴⁰ و اگر کسی خَأیه تی مرَه دعوا بوکونه و تی قبایَ تی جَه فَأگیره، تی عَبایم اونَ فَأدن، ⁴¹ هر وخت کسی ترَه مجبور بوکود یک مایل اونِ اَمرَه بیشی تو دو مایل بوشون. ⁴² کسی کی تی جَه چیزی خَأیه اونَ ببخش، و کسی کی تی جَه قرض خَأیه تی رویَ وَأنگردَأن.

دوشمنانَ محبت کودَأن

⁴³ بیشتَأوسته اید کی بوگوفته بوبُسته "تی همساده یَ محبت بوکون و تی دوشمنِ مرَه دوشمن بوبون" ⁴⁴ ولی من شمرَه گویم خودتانِ دوشمنانَ محبت بوکونید و کسانی کی شمرَه لعنت کوندِ رِه برکت بخَأئید و اوشَأنی کی شیمی جَه نفرت دَأردَ خوبی بوکونید و هر کی شمرَه فُحش بدَه و آزار برسَأنهْ اونِ رِه دوعایِ خِیر بوکونید. ⁴⁵ تا اَطو شیمی پئرِ رِه کی آسمانِ میَأن ایسَه زَأی بیبید، چون اون خو آفتابَ بَدان و خوبانِ رو یکسان تابانه و خو بارانَ دوروستکاران و ظالمان رو وارانه. ⁴⁶ اگر فقط کسی یَ محبت بوکونید کی شمرَه محبت کونه چی اَجری دَأرید؟ آیا باجگیرانم هَ کارَه نوکوند؟ ⁴⁷ اگر فقط شیمی دوستانَ سلام بوگوئید، دیگرانِ جَه چی برتری ایی دَأرید؟ آیا باجگیرانم هَ کارَه نوکوند؟ ⁴⁸ پس شومَأنْ کامل بیبید، هوطویی کی شیمی پئرِ آسمانی کامله.