1
اَن اسرائیلِ پسرَأنِ نامِ کی هر کودام خوشَأنِ خانواده یَأنِ اَمرَه یعقوبَ همراه بوبُستد و بأمود به مصر.
2
رِئوبین و شمعون و لاوی و یهودا،
3
و یِساکار و زِبولون و بِنیامین،
4
و دان و نَفتالی و جاد و اَشیر.
5
همۀ کسانی کی یعقوبِ نسلِ جَه بُد و بأمود به مصر هفتاد نفر بود، و یوسف هم کی جی پیشترَأن مصر دورون ایسَه بو.
6
سالیانِ سال بوگوذشت و یوسف و اونِ برَأرأن، و همۀ او نسلِ آدمأن بِمِردد.
7
ولی بنی اسرائیلِ قؤم اَقدر زَأی بأوردد و زیادَ بوستد کی مصرِ همه جا سامان بیگیفتد و خوشَأنِ رِه ایتَه پیلِه قؤمِ قوی بوبُستد.
8
بازن ایتَه فرعونی مصرِ دورون حکومت بوکود کی یوسفَ نشناخته و اونِ جَه چیزی نیشتاوسته بو.
9
اون خو مردمَ بوگوفت:«بنی اسرائیلِ قؤم خیلی زیادَه بوستد و اَمی جَم قویتر بوبُسته دَأرد،
10
بائید اَمی عقلِ اَمرَه کار بوکونیم، وگرنه اَشَأن زیادَه بود و ایموقعی ایتِه جنگ بیبِه اَشَأن اَمی دوشمنانِ مرَه همدس بُد و اَمی اَمرَه جنگ کوند، بازن اَمی سرزمینِ جَه فرار کوند و شُد بیرون.»
11
پس مصریانم اوشأنَ برده چَأکودد و اوشَأنِ سرِ جُر سرکارگر بِنَد تا کارایِ سختِ اَمرَه اوشَأنَ ذلیل و ناتوان بوکوند. اسرائیلیان شهرایِ «فیتوم» و «رَعمسیسَ» فرعونِ رِه چَأکودد، تا آذوقه انبارِ رِه جی اون شهرَأن ایستفاده بوکونه.
12
ولی مصریان هر چی کی ویشتر بنی اسرائیلَ اَذیت کودد، اوشَأن ویشتَر بوستد و همه جا پخشَ بوستد، و جوری بوبُسته بو کی مصریان اوشَأنِ جَه ترسِده.
13
و هَنه وَسی ویشتر اوشَأنَ ظُلم کودد،
14
و اوشَأنَ به بردگی بیگیفته بود و مجبور کودد کی گیلکاری بوکوند و خِشت چَأکوند و بیابانِ میَأن سخته کارانَ انجام بدد و هَجو کارانِ وَسی اوشَأنِ جانَ به لب فَأرِسَأنِه بود. هر کاری کی مصریان اوشَأنِ جَه خَأستِد کی بوکوند ظالمانه بو
15
فرعون اسرائیلیانِ قابله یانَ کی ایتَه نام «شِفرَه» و اوی تَه نام «فُوعَه» بویَ دستور بدَه
16
و بوگوفت:«وختی عبرانیانِ زنَأکانِ رِه قابله گری کونید، فَأندرید اگر زَأی پسر بوبوُست، زایَ بوکوشید، و اگر دختر بوبُست اونَ زنده بدَأرید»
17
ولی قابله یان خدا جَه ترسِئِد، و اون کاری کی فرعون دستور بدَه بویَ انجام ندَأده و پسر زَأکانم زِنده دَأشتِد.
18
پس فرعونم قابله یانَ دِخَأد و اوشَأنَ بوگوفت:«چره اَ کارَه بوکودید و پسر زَأکانَ زنده بدَأشتید؟»
19
قابله یان فرعونَ بوگوفتد:«چون عبرانیانِ زناکان مصریانِ زناکانِ مَأنستَأن ضعیف و ناتوان نییِد و اوشَأن قوت دَأرد، و تا اَمَأن فَأرسیم خودشَأن بزَء دَأرد و زَأی بودونیا بأمو دَأره»
20
و خدا هم قابله یانَ احسان بوکود و اَطو بنی اسرائیلِ قؤم روز به روز پیله تر و قویترَه بوسته.
21
و چون اون قابله یان خدا جَه ترسِده، خدا هم اوشَأنَ لُطف بوکود و اوشَأنم خوشَأنِ رِه خانواده تشکیل بدَأد، و خدا اوشَأنِ خانواده یَ برکت بدَه.
22
پس فرعون خو قؤمَ دستور بدَه و بوگوفت:«هر پسر زَأیی کی بودونیا اَیِه یَ نیلِ رودخانه میَأن تَأوَأدید، ولی دختر زَأکأنَ زنده بدَأرید.»