1

¹ جی پولس کی به خواستِ خدا، مسیحِ عیسی رسوله، و اَمی برأرْ تیموتائوسِ طرفِ جَه، ² به مُقدسین و برأرایِ وفاداری کی شهر کولُسی میَأن ایسَأد و مسیحِ مرَه مُتحدد. فیض و سلامتی اَمی پئر خدا طرفِ جَه، بر شومَأن.

³ اَمَأن همیشه دوعا موقع شیمی وَسی اَمی خدا و اَمی خداوند عیسی مسیحِ پئرَ شُکر کونیم. ⁴ چونکی شیمی ایمانِ وصفَ به مسیحِ عیسی، و اون مُحبتی کی همۀ مقدسینَ دَأریدَ بیشتَأوسته ایم. ⁵ اَشَأن همه جی اون اُمیدی سرچشمه گیره کی آسمانِ دورون شِمرِه مَحفوظه، و شومَأن پیشترانِ رِه کلامِ راستی جَه، یعنی اِنجیلِ جَه دربارۀ اونْ بیشتَأوسته اید، ⁶ اَ اِنجیلی کی شمرَه برسه، سراسرِ جهانَ برسه دَأره و کرَه رُشد کونه و ثمر دِهه، هوطویی کی جی هون روزی کی اونَ بیشتَأوستید و خدا فیضَ به معنایِ واقعی درک بوکودیدْ، شیمی میَأنم ثمر بدَه و عمل بوکود.7 ⁷ شومَأن اِنجیلِ پیغامَ جی «اِپافراس» بیشتَأوستید، اون اَمی همکارِ عزیز، و مسیحِ وفادارِه خادمه کی شیمی وَسی اوسه بوبُسته. ⁸ اون اَمرَه خبر بدَه کی روح القدس چی مُحبتِ عظیمی شیمی دیلِ میَأن بنَه دَأره. ⁹ هَنه وَسی، جی روزی کی اَنَ بیشتَأوستیم، یکسره شِمرِه دوعا کونیم، و خدا جَه خَأئیم کی شومَأن اونِ اِراده یَ بشناسید و هر جور حکمت و هر جور فهمِ روحانی جَه پورَه بید، ¹⁰ تا جوری رفتار بوکونید کی خداوندِ شایسته بیبه و بتَأنید جی هر جهت اونَ خوشحالَ کونید. یعنی هر عملِ دوروستی کی انجام دهید ثمر بأوره و بتَأنید خدا شناختِ دورون رُشد بوکونید. ¹¹ و دوعا کونم کی خدا قدرتِ عظیمِ جَه، قدرتمند بیبید تا هر چیزِ رِه صَبر و تَحمل بدَأرید، ¹² پئرَ شُکر بوکونید، کی اَمَرَه لایق بدَأنست تا مُقدسانِ میراثِ دورون شریک بیبیم، مقدسانی کی عالمِ نورِ دورون زندگی کوند. ¹³ چون اون اَمَرَه تاریکی قدرتِ جَه نجات بدَه، و مُنتقل بوکود به خو عزیزِ پسرِ مَلکوتْ، ¹⁴ هون پسری کی اَمرَه خو خونِ اَمرَه بِهِه دَأره، یعنی بواسطۀ اونْ اَمی گوناهانْ آمرزیده بوبُسته.

مسیحِ پیله تری

¹⁵ مسیحْ خدایِ نادیده صورته، و همۀ مخلوقاتِ ورجَه پیله زأی به حیساب اَیه، ¹⁶ چون همه چی بواسطۀ اون خلق بوبُست، اونچی آسمانِ میَأن نَهَه و اونچی زمینِ رو، چیزهایی کی دیده بؤد و چیزهایی کی دیده نوبُد، تَختان و سلطنتَأن، ریاستان و قدرتانْ، همه بواسطۀ اون و اونِ وَسی خلق بوبُستد. ¹⁷ پیشتر جی اَنکی چیزی بوجود بأیه اون وجود دَأشته، و اونِ قدرته کی عالمِ هستی یَ حفظ کونه. ¹⁸ اون بدنْ یعنی کلیسا رِه سَر حیساب بِه، اون اولین کسی ایسه کی مُرده یانِ جَه زنده بوبُست، تا همه چی میَأن اَول بیبه. ¹⁹ چون خدا اَطو اِراده بوکود تا خو همۀ الوهیتِ مرَه اونِ دورون ساکن بیبه ²⁰ و بواسطۀ اونْ، همه چیَه، چی زمینِ رو و چی آسمانِ میَأنْ خو مرَه آشتی بده، بله، مسیحِ خون صلیبِ رو فووَست، و اَمَأن اَطو خدا اَمرَه صُلح بوکودیم. ²¹ شومَأنم روزی خدا اَمرَه بیگانه بوئید، و خودتانِ اَفکارِ دورون اونِ اَمرَه دوشمن بوئید، و اَنْ شیمی اَعمالِ دورون آشکارَ بوسته. ²² ولی هَسَه مسیحْ، شمرَه بواسطۀ جسمِ انسانی و از طریقِ خو مرگْ، خدا مرَه آشتی بدَه، تا شمرَه مُقدس و بی عیب، و به دور جی هر مَحکومیت و اِتهامی بوبوره به خدا حضورْ، ²³ به شرطی کی ایمانِ میَأن قائِم بِئسید و اُستوار بمَأنید، و وَأنَألید اِنجیلِ اُمید جی میَأن بیشه، هون اِنجیلی کی بیشتَأوستید و آسمانِ زیر همۀ خلقتِ رِه موعظه بوبُسته، و من پولسْ، اونِ خادم بوبُستم.

پولسِ زَحمتَأن کلیسا رِه

²⁴ هَسَه زَحمتانی کی شیمی وَسی بِکشمِ رِه خوشحالم، چون اَطو رنج و زحمتی کی مسیحْ خو بدنِ رِه، یعنی کلیسا رِه بکشه یَ تکمیل کونم. ²⁵ من مُطابقِ اون مأموریتی کی خدا مرَه فَأدَه، کلیسا خادم بوبُستم، تا خدا کلامَ بی کم و کاست شمرَه برسَأنم، ²⁶ یعنی هون رازی یَ کی قرنها و نسلها مخفی بو، ولی هَسَه اونِ مُقدسینِ رِه آشکارَ بوسته. ²⁷ خدا اَطو اِراده بوکوده کی اَ رازِ پورجلال و عظیمَ، غیرِ یهودیانِ رِه آشکارَ کونه، و اون راز اَنه کی مسیحْ شیمی دورون ساکنه، و اَن شیمی اُمیده پورشکوهه. ²⁸ اَمَأنم هون مسیحَ موعظه کونیم و دربارۀ اون تعلیم دهیم، تا بتَأنیم هر کسَ ایتَه آدمِ بالغِ مَأنستَأنْ در مسیحِ عیسی، خدا حضورِ جَه آمادَه کونیم. ²⁹ هَنه وَسیه کی من در اَ راه زحمت کشم و اونِ قوّتِ اَمرَه کی می دورون عمل کونه، سعی و تَقلا کونم.