1
خاتمه رِه بوگویم کی ای برأرأن، خواهش کونم اَمرِم دعا بوکونید تا خداوندِ کلام سرعتِ اَمرَه پیش بیشه و عزّت پیدا کونه، هوطو کی شیمی میَأن بوبُست.
2
و دعا بوکونید مردمِ شرور و خبیثِ دسِ جَه خلاصَ بیم، چون همۀ مردم ایمان نَئرد.
3
ولی خداوند اَمینه، اون شمرَه تقویت کونه و اون شریرِ جَه محافظت کونه.
4
خداوند اَمرَه مطمئن بوکوده و اَمَأنم شمرَه اعتماد دَأریم کی هر چی شمرَه یاد بدَأئیمَ هَسَه بعمل اَورید و همیشه رِه هم انجام دهید.
5
خداوند شیمی دیلانَ خدا محبتِ طرف و مسیحِ صبرِ طرف هدایت بوکونه.
هشدار تنبلانَ
6
و هَسَه ای برأرأن، حُکمی کی به نامِ خداوند عیسی مسیح و اونِ قدرتِ اَمرَه صادر کونمَه توجه بدَأرید؛ هر مسیحی ایی جَه کی تنبلی بوکونه و مُطابقِ اون تعلیمی کی اَمی جَه بیگیفته اید رفتار نوکونه دوری بوکونید.
7
چون شومَأن خوب دَأنید کی چوطو وَأستی اَمی جَه سرمشق بیگیرید، اَمَأن وختی شیمی ورجَه ایسَه بیم هیچموقع بیکار نوبوئیم.
8
هیچکسِ نانَ مُفت نوخوردیم، بلکی شب و روز کار بوکودیمُ عَرق فوکودیم تا بتَأنیم ایتَه لقمه نان بدس بأوردیم و کسی سربار نیبیم.
9
نه اَنِ وَسی کی حق نَأشتیم شیمی جَه خوراک بخَأئیم، بلکی خَأستیم شمرَه نمونه فَأدیم تا اَمی جَه پیروی بوکونید.
10
چون حتی اون زمان کی شیمی ورجَه ایسَه بیم هم اَ حُکمَ شمرَه فَأدَئیم کی«هر کی نخَأیه کار بوکونه نانم نوخوره!»
11
بیشتَأوسته ایم شیمی میَأن بعضیان تنبلی کوند و کار نوکوند، بلکی فقط اَی تَه اوی تَه کارِ دورون فضولی کوند.
12
پس در نامِ عیسای مسیحِ خداوند اَجور آدمانَ نصیحت کونیم و دستور دهیم کی آرام بیگیرد و خوشَأنِ سرَ بیجیر تَأوأدد و کار بوکوند تا ایته لقمه نان بدس بأورد و بوخورد.
13
ولی شومَأن ای برأرأن، هیچموقع کارِ دوروستِ انجام دَئَنِ جَه خستَه نیبید.
14
اما اگر کسی اویَ ایسَه کی حاضر نییه اَ دستوراتی کی اَ نامه دورون بینیویشتیمِ جَه اِطاعت بوکونه اونِ مراقب بیبید و اونِ مرَه رفت و آمد نوکونید تا خودش شرمنده بیبه.
15
ولی شیمی حواس بمَأنه اونَ دوشمن ندَأنید، بلکی ایتَه برأرِ مَأنستَأن کی نصیحتَ احتیاج دَأره اونَ هشدار بدید.
خاتمه
16
هَسَه، خداوندی کی آرامشِ سرچشمه یه، همیشه شمرَه در هر وضعی کی ایسَأئید سلامتی عَطا بوکونه، خداوند شیمی اَمرَه بیبه.
17
من پولس خودمِ خطِ اَمرَه اَ سلامَ نیویسم کی می علامت و می اِمضایه همۀ نامه یانِ دورون، تا بدَأنید اَ نامه می طرفِ جَه یه، اَنم می خط:
18
اَمی خداوند عیسی مسیحِ فیض شیمی اَمرَه بیبه، آمین