¹ جی پولس، سیلاس، و تیموتائوس، به کلیسایِ شهرِ تِسالونیکی کی خدایِ پئرُ و خداوند عیسایِ مسیحِه شیند. فیض و سلامتی بر شومَأن. ² اَمَأن همیشه خدایَ شیمی وجودِ وَسی شُکر کونیم و همیشه اَمی دوعایانِ دورون شیمی نامَ اَوریم. ³ و همیشه خدا و اَمی پئرِ حضورْ، شمرَه به یاد اَوریم، شیمی عملَ کی شیمی ایمانِ جَه اَیِه، و شیمی رنج و زحمتَ کی مُحبتِ جَه اَیِه، و شیمی اُستواری یَ کی اون اُمیدی جَه اَیه کی به اَمی خداوند عیسایِ مسیحْ وَأگردستَأن دأرید. ⁴ ای برأرایِ عزیز، دَأنیم کی خدا شمرَه دوس دَأره و انتخاب بوکوده. ⁵ چون اَمَأن انجیلَ فقط کلماتِ اَمرَه شیمی ورجَه نأوردیم، بلکی انجیلْ، روح القدسْ و اطمینانِ کاملْ و قوّتِ اَمرَه شمرَه برسه دَأره، و شومَأن خُب دَأنید کی وختی اویَ ایسَه بیم شیمی وَسی چوطو رفتار بوکودیم. ⁶ پس در نتیجه شومَأنم اَمی جَه سرمشق بیگیفتید و خداوندِ جَه پیروی بوکودید و رنج و زحمتِ زیادِ اَمرَه، و البته اون شادی ایی اَمرَه کی روح القدس بخشه، کلامَ قبول بوکودید. ⁷ و اَطو شومَأن همۀ ایماندارانِ مقدونیه و یونانِ رِه نمونه بوبُستید. ⁸ چون نه تنها خداوندِ کلام بواسطۀ شومَأن مقدونیه و یونانِ دورون مُنتشر بوبُست، بلکی همه دربارۀ اون ایمانی کی خدایَ دَأرید گب زند و دِ لازم نییه اَمَأن چیزی بوگوئیم. ⁹ چون اوشَأن وختی خَأید دربارۀ اَمَأن گب بزند، تعریف کوند کی شومَأن چوطو اَمرَه تحویل بیگیفته اید و چوطو بُت پرستی جَه دس بکشه اید و خدا طرف وَأگردسته اید، و هَسَه هم خدایِ زنده و حقیقی یَ خدمت کونید، ¹⁰ و چوطو اونِ پسرِ وَأگردستَأنِ رأفأ ایسَأئید تا جی آسمان بأیه، یعنی عیسی کی اونَ مُرده یانِ جَه ویریزَأنی و اَطو اَمرَه جی آینده غَضب نجات دِهِه.