22 ¹ Jetescasque lhta mocjom Enenlhet Neten aluata alhnai'o nquec iemmen acto njan aquiennactescama ennengiec, malha lhta acto nac ieiam appoc nengwetangweiacmo taiep, ntepque lhta aluata aquieto actanema Engiapom Neten cacpota njan Nepquesec Apquetcoc. ² Apualhoc temma amai alhtoca ngquenmac iamet acto aquiennactescama ennengiec, cacpota njan janet necja'a aluata ngquelanmac iamet anac ma'a, moclhem'a pelten alhtoca alielhnemacja m'a, acuacmo njan 12 ³ mangcolhec jata njan caselha ngcolatsecama m'a, ngcoitec jata mota Apuesque aptanema m'a cacpota njan Nepquesec Apquetcoc, eltacnescasancoc jata mota apquellasennaicama m'a. ⁴ Napaqtawec jata njan eluetac Engiapom Neten ma'a apquellelto alelqasemmalhca alpaijacja napaqta'a Apuesai'a apanquec ma'a. ⁵ Melhec jata pelhasep ma'a, coca mangcaimalhquec jata njan talha alhancoc ma'a cacpota njan acnem aponmatema la'a, ncanec Engiapom Neten apto apuesque jata engiaponmetec ma'a, etnancoc jata njan apqueluescai'e enenlhet'awoc mangcotnengwaiam annelha m'a. ⁶ Lhta ptac jeiano Enenlhet Neten: —Ntasec meiascamec astacja lhquec aspaioma, jawengiapac anquec ma'a. Engiapom Neten apto apquellaicamoc apcamnoma alenteiapuecta apatno'oc (INSpIRA) apquetsecama ania'a nac, apcapasquec na apcasennaicama Enenlhet Neten cacpota eluetasquesec apquellasennaicama acmac'acja ta ngcotnec colhuawe nac—lhta ptac jeiano Enenlhet Neten ⁷ Lhta ptac Jesus: —Colhawec jata awatamoc mocjom jam, apquellenniemawec apquellelto apquenmama tacja ania'a nac actemacja acmac'acja ta ngcotnec, aquietno nac actalhesammalhca waccajac anac ma'a—lhta ptac. ⁸ Jai', co'o Juan asuet'a lhta, asleng'a lhta njan lhamacjo caselha nac jetesquescama lhta Enenlhet Neten, netamen asquelteclhei'o etapno'oc napaqtec cacpota atacnescasancoc ma'a, ⁹ coca lhta ptac jeiano Enenlhet Neten: —Metne jam, mangjetacnescasamoc lheiap, coca ntasec etacnescasancoc ma'a Engiapom Neten, co'o njan asto jeiasennaicama Engiapom Neten, asnawec co lheiap cacpota njan apquelialheng'a nac apquetsecama ania'a, cacpota njan apquellelto apquenmaicamoc ania'a actacja actalhesammalhca waccajac anac—lhta ptac jeiano. ¹⁰ Lhta ptac mocjom jeiano: —Meilhasqueso ngquec ania'a nac acmac'acja ta ngcotnec aquietno nac actalhesammalhca waccajac anac, ngcanquetwa'ac acnem ngcowac jata m'a. ¹¹ Enenlhet meijamolhma la'a elhenquesec jata apanquec aptemacja m'a, enenlhet apto la apiamolhma, elhenquesec jata njan apanquec apiamolhma m'a (Aqui repite lo mismo para enfatizar)—lhta ptac jeiano Enenlhet Neten. ¹² Lhta aptac Jesus. —Jai', awatac jata colhuawec jam, atsantenquesec jata alianmoma cacpota allanconwatac moclhem'a enenlhet actacja la njan apquellanai'a. ¹³ Co'o asto nac alfa cacpota njan omega, ampacjasecja cacpota njan actacja nnelha. ¹⁴ Apquellenniemawec enenlhet apquellelto apqueliengiecja ngcolatsecama, ngquellietawec anque jata njan ellentelhec atong apiau'acja temma cacpota etawancoc aquielhna iamet aquiennactema ennengiec ma'a. ¹⁵ Coca mellentelhec jata m'a apquellelto nac meliamolhma, apquellelto nac apqueliatnecama brujeria, apquenmensanweiam alhma', ntecquioma ngiapma'ac, apqueltacnescasecamoc caselha aquiocja alanemmalhca, apquellienlhanmecamoc ellanancoc apqueliennenquescama po'oc. ¹⁶ Co'o Jesus ascapasquec lhema Enenlhet Neten cacpota eleltennacsec ania'a nac aplhamacjo Engiapom Neten apquennemolhema, co'o asto aptawen neptamen apuesque David annenga, asto njan iau'a apiawai'a apcaponmatema nac atsai'a. ¹⁷ Engiapom Neten Apualhoc cacpota njan Nepquesec Apquetcoc aptawa', lhta ntac: —¡Elheng apuesque Jesus!— lhta ntac ma'a. Lhamacjo apquellelto ta apquelengai'a ania'a nac, ntasec etlhenec: —¡Elheng apuesque Jesus!— Coca enenlhet apquellelto la aliemai'a apiaspo'oc ntase einec iemmen acto aquiennactema ennengiec metca aquianmoma. ¹⁸ Coca asquellasquec lhema caselha apquellelto nac apquellengai'a ania'a nac actalhesammalhca waccajac anac, enenlhet apianwescaiacmo la aptalhescama ania'a nac, Engiapom neten jata engiapasquesec tacjaplhet ma'a caselha ngcolatsecama ngquec aquietno nac actalhesammalhca jengque'e waccajac anac. ¹⁹ Cacpota njan Enenlhet apquellelto la apqueljatsoscama ania'a conne waccajac anac, Engiapom Neten jata njan etepquescacjac apiau'acja temma nac ma'a, mengianquejec jata njan etuoc iamet aquielhna aquiennactema ennengiec ma'a. ²⁰ Enenlhet apto la aplheianma ania'a lhquec jata etnec colhuawe nac: —¡Jai', colhuawec jata awatac jam! Jata ngcotnec ngcatemmoma: —¡Amen, ntase', elheng apuesque Jesus!— ²¹ Jai', asqueltawec co'o apuesque Jesus ellamelemma' aplhamacjo quetlhengcap ma'a.