5
Apquetlhecmoscama Jesus neten acjema metaimong
1
Apuetai'ac nac Jesus apentalhnema enenlhet apcacnecjo m'a, ca apcanantemo lhnac neten lhienep acjaiam, ca apnemo lhnac na ma'a. Apqueltetesquectaniec nac apqueltamesaicamoc apnacja m'a,
2
ca apquempai'o lhnac apquetlhecmoscamo Jesus, lhna aptemac apquellanemo:
3
—Apquellenniemawec apquellelto nac atlhenaicama moc apualho'oc apcaimommap Engiapom Neten, ncanec etnesquesancoc jata apquennemolhema m'a—
4
—Apquellenniemawec apquellengaianco nac aquientalhnema colhuawe nac, ncanec ncolhec jata altacmelquesquescacmo apualho'oc—
5
—Apquellenniemawec apquellelto nac metca apquellammacpo, ncanec etlhewancoc jata lhepop apquelpenesquescamo lhnac nanec aplheianma Engiapom Neten—
6
—Apquellenniemawec apquellelto nac apquenmajai'o apancawe ellanancoc caselha acpeiwomo, ncanec Engiapom Neten jata ellancoc aquianmoma ma'a—
7
—Apquellenniemawec apquellelto nac apquelietnai'o napaqta'a po'oc, ncanec Engiapom Neten jata njan elietnajoc napaqta'a m'a enenlhet'awoc anac—
8
—Apquellenniemawec apquellelto nac alalhnai'o apualho'oc, ncanec eltoc jata eluetacpoc Engiapom Neten enenlhet'awoc anac ma'a—
9
—Apquellenniemawec apquellelto nac aptengiaicamo mota metca acmasca apquellawacja, ncanec ncolhec jata alleltanco Engiapom Neten apquetcac—
10
—Apquellenniemawec apquellelto nac nema acmenlhenaicama aniem'o apquellanai'a acpeiwomo, ncanec etnancoc jata Engiapom Neten apquennemolhema—
11
—Apquellenniemawec quetlhencap necsa metca ncolhec altacmelcaso, cacpota njan acjemo ncolhec aleltancoc apquenmopuanca'a ania'a aniem'o jelieplecama co'o.
12
¡Eletsewasojo! Etlhewancoc jata aquiawai'a aquiaqmecja m'a neten. Lhnac na ne ntemac na nemo allanei'o apquetsecama ania'a nnenga metca ncolhec altacmelcaso—
13
— Quetlhengcap apquellelto malha acto nac iasec tacjalhet lhepop, coca acmasco la acmasca m'a iasec lhec, mmasquec na cno manca m'a, nquelhalhquec najan, ncolhec jata njan alteiammacjo m'a.
14
Quetlhencap apquelelto malha aponmatma altetquescama alhma nquec jam. Malha njan apiau'acja la temma apietnema aietsecsec anque acjema metaimong cacpota eluetac lhamacjo enenlhet'awoc ma'a.
15
Nnec jata nquec aponmatqueso lhema talha alhancoc, mancolhec acpecqueno m'a coneng anac asota, neten coca nempeccanmac ma'a cacpota ncotsasqueso lhma' aplhamacjo apquellelto la apcacjaicamoc conne pa'at.
16
Etnamoc jata quetlhencap malha aponmatema napaqtawec enenlhet'awoc cacpota eluetac apquellanecamoc caselha altacmelo m'a, eltacnescasancoc jata njan Apqueliapom apno m'a neten—
Apquetlhecmoscama Jesus actemacja jenganemacja Moises
17
—Motlheng apquelualho'oc quetlhengcap asuai'a asmajai'a amasquecsec jenganemacja nac Moises cacpota njan apquelletlhecmoscama secama ania'a annenga. Asua'a co'o asqueltemo asaujoc asieplauquescama.
18
Mancomasquenwomec jenganemacja nac necsa aquietnema mocjom neten cacpota njan nalhepop anac, lhamacjo alqama ta ncolhec alieplauqueso, metca aimommalhca lhema'.
19
Apnec jata nque meliejecjo la jenganemacja nac quetsec anquec la'a, etlhecmocsec na po'oc metca coca apqueleliejecjo, ca jeng enenlhet anac etnesquesacpoc jata acmaselhtec apiaspommap ma'a napaqtec Engiapom Neten. Apnec jata nquec apqueliejecjo jenganemacja nac, apquetlhecmoscama la po'oc eliejecjoc najan, ca enenlhet anac etnescasacpoc jata neten apanquec apiaspommap ma'a napaqtec Engiapom Neten.
20
Jawe niapac anquec astacja nac asquellano quetlhencap, apmac'acja ta nquec etnancoc Engiapom Neten apquennemolhema, ncaimelhquec coca etnancoc apquelpeiwomo panquec napaqtec Engiapom Neten, coneng eltemesquesec ma'a fariseos cacpota njan jengetlhecmoscama jenganemacja Moises anac—
Apquetlhecmoscama Jesus actemacja metca nengaqjema emmo'oc
21
—Cotlhen no apualho'oc Moises annenga aplheianmo lhnac na nec:
«Mengiaqja po'oc, ncolhec jata acpeiwesacjo apselhnanemmap lheiap»
lhnac na nec aptemac ma'a.
22
Coca astac co'o asquellano colhuawe nac quetlhencap, apquellauquec jata nque apquellan'o po'oc enenlhet, coca m'a etselhnanacpoc jata. Enenlhet ncolatsecama la njan apaioma elanjoc po'oc, ncolhec jata aquiantemacjo apcacjaianquelha apquelanma apmaniaie' cacpota eselhnanacpoc ma'a. Enenlhet apuannaicama la po'oc, ncolhec jata aquiengiacjo ncospaneiacja talha'.
23
Ca ncanec apmeiacjo la lheiap aquieto aluanlhenmalhquelha caselha cacpota engianconwacjac apcaicamoc Engiapom Neten, ncolheianwacjoc secjec apualhoc aptacnoncoma lhta po'oc ma'a,
24
epecquenec jata secje ma'a, amanie m'a engiacja emasquescacjac aptacnoncoma lhta po'oc cacpota njan epaiwescacjac ma'a, cacpota alhaiec anquec etaqjoc aquieto aluanlhenmalhquelha caselha engiancoc apcaicamoc Engiapom Neten ma'a.
25
Apnec jata nquec enenlhet apmajai'a eliantemoc lheiap napaqtawec jengiecpelquemo ngiapom, ntasec secjec apmaniaie ellanecja apancawec quetlhencap ma'a cacpota melhquenwomec lheiap apquelanecama nemammalhquelha, netamen engiaqlhenquesec jata m'a,
26
coca m'a elhnemoc jata acuacmo apsaujo apianmonquescama apqueliaqmoma, jawe ngiapac anquec astacja nac—
Apquetlhecmoscama Jesus metca nentewascamo entawa'
27
—Apquelliawec na quetlhencap aplheianmo lhnac nanec Moises annenga, lhna na nec aptemac:
«Menactewes apnaqteianca'a»
lhna aptemac.
28
Coca colhuawe nac alheianma co'o, lhema apquenno acnema aptawa, nlhenquec jata nquec apualhoc elanactescamoc mo'oc nqueluana, coca m'a aptewascamo aptawa' apanque'.
29
Lheiap apaqtec aquiennacja nac ntemescasquec jata nquec mancoliejescasecjo Engiapom Neten, elec jata, eiengiau mocje. Ntasec mancolhec necja apaqtec melto la eiengiocpoc mancospaneiacja talha apiocjo panque.
30
Lheiap apmec aquiennacja nac ntemescasquec jata nquec mangcoliejescasecjo Engiapom Neten, eiaqtemen jata, eiengioc mocje. Ntasec etnec acpensema apmec, melto la eiengiocpoc ncospaneiacja talha apiocjo panque—
Apquetlhecmoscama Jesus metca nengiamasma entawa'
31
— Aplheianmec nac na nec Moises annenga:
«Apquelto la eiengioc aptawa' lhema enenlhet, ncaimelhquec secjec elanac lhema certificado actemacja apiamasma aptawa'»
lhna nanec aptemac ma'a.
32
Coca sta co'o asquellano colhuawe nac quetlhencap, wanlha apuanque eiengioc enenlhet aptawa apuetaianco la alanactescaiam po'oc enenlhet, coca metco la'a, ntasec meiengiewe' ncanec awanquec quelha ncomecjac po'oc enenlhet, jawe allanemmalhquelha ncotnancoc ma'a, nconactewasalhcoc quelha ncoie'—
Apquetlhecmoscama Jesus actemacja metca nentema juramento
33
— Aplheianmo lhnac nanec na Moises annenga:
«Aptec jata nquec juramento napaqtec Engiapom Neten, eieplauques jata apaioma aptacja»
34
Coca sta co'o asquellano colhuawe nac quetlhencap, metnamo nquec juramento, metnamo nquec na juramento neten anac, ncanec Engiapom Neten aquietnemacja aptanema m'a.
35
Metnamo nquec na juramento acuesai'a nalhepop anac, ncanec Engiapom Neten aptac apuesque tacjalhet lhepop. Metnamo nquec na juramento acuesai'a apiau'acja temma Jerusalen, ncanec apancoc apanque' apuesque aquietnema neten anquec apmopuana.
36
Metnamo nquec na juramento quetlhencap apquelliocja apanque nac, mancollapuanquec eltemecjac mocjom apquetco'oc quetlhencap, mancollapuanquec na eltemecjac apqueluaneiam, ncanec jawe apanco'oc apqueliocja nac.
37
Apquetlhenquec jata nquec apquenmac'acja ellana, ellanamoc jata, apquetlhenquec jata nque manconmajai'a ellana', mellana ncoie', jawe acuenque paicamoc na apquetlheianma, mancolatsecama m'a—
Apquetlhecmoscama Jesus metca nengiaqmoncasecja
38
— Ca aplheianmo lhnac nanec na Moises annenga:
«Nnec jata nquec acleccaso lhema apaqtec, elec jata njan lheiap apaqtec po'oc. Nnec jata nquec antasqueso lhema apmo'oc, enientasques jata njan lheiap apmo'oc po'oc»
lhnac nanec aptemac.
39
Coca stac asquellano colhuawe nac quetlhencap, nnec jata nquec actecpongo apatong lheiap, meiacmoncasecja nque'.
40
Nnec jata nquec apmac'o ncolhec aquiantemacjo apnacja jengiecpelquemo ngiapom nema acmajai'a ncolhec annactemo aptalhnema apuenactema, engianco ta njan esacjac apcaclammap.
41
Apqueltacpo la'a epatmoc lhema caselha acuacmo lhema kilometro, epatenques jata acuacmo janet kilometros.
42
Nnec jata nquec anmalhnenca caselhaja apancoc, engiamoc jata. Nnec jata nquec anmalhnenca caselha nema acmajai'a ncolhec apmanca secje', engiamoc jata—
Apquetlhecmoscama Jesus actemacja nengamelaiam jengammelhmacja la'a
43
—Apquelliawec na quetlhencap aplheianmec nac nanec Moises lhennenga:
«Eniamelemma ta po'oc, coca etacnewa' m'a apto apcammelhmacja' la'a»
lhna aptemac ma'a
44
Coca sta co'o asquellano colhuawe nac quetlhencap, ellamelemma apquellammelhmacja, ellelpacmetques coca Engiapom Neten cacpota elpasmoc ma'a apquenmenlhenaicama nac quetlhencap.
45
Netamen jata m'a eluetacpoc jata quetlhencap actacmanma apquellanei'o po'oc, ca aptemac Engiapom Neten ma'a, apto apiamolhma alhma nquec jam, aptepcasque mota acnem tacjaplhet'oc enenlhet'awoc apqueliamolhma cacpota njan meliamolhma, apcapasquec acmamai'a cacpota ncoltacmelquesec enenlhet apquelpeiwomo cacpota njan melpeiwomo.
46
Coca apquellelto la quetlhencap wanlha ellammelama apquellamelaianlha la'a, coca apqueltacnewacquec apquellammelhmacja la'a, mancolatsema m'a, metlhewanquec jata aquianmoma, ca aptaiancolha nac ma'a apquenmaicamoc pataccom impuesto ancoc Roma.
47
Apquelpaiwesanque jata nque wanlha po'oc apqueluetai'acja la'a, coca melpaiwesancoc apquellammelhmacja la'a, mancolatsema m'a, ca aptaiancolha nac ma'a enenlhet'awoc anac apqueliasqueiam Engiapom Neten.
48
Quetlhencap coca etnamoc jata apquelpeiwomo, ca ptonac Engiapom Neten apeiwomo m'a—