kpass-tmf_luk_text

Juan apquellauquescama iemmen angiapom aquieto iocjalhma metquelha temma

¹ 15 iantelhcapa lhnac nguaiacmoc aptema apuesque Tiberio iocjalhma Roma, Poncio Pilato lhnoca apuesque iocjalhma Judea, Herodes Antipas noca m'a apto apuesque iocjalhma Galilea, Filipo Herodes apialheng coca apuesque janet iocjalhma, acuesai'a Iturea, cacpota njan Traconitide. Lisanias coca apuesque iocjalhma Abilene. ² Anas cacpota njan Caifas apquellelto apquelanma apmania ie sacerdotes Judios ma'a. Apnenquec nac na Juan Zacarias apquetca m'a iocjalhma metquelha temma, ca apcapascamo lhnac Engiapom Neten cacpota epaiacsec ania'a actacmanma apiesecsec enenlhet'awoc. ³ Apmeiecjo lhnac Juan iocjalhma actacja nengaqtec aluata Jordan, apacmeteianca lhnac aquiennactema nquec ma'a, lhna aptemac: — ¡Ellanecja apualho'oc cacpota enmasquescasecjac Engiapom Neten apqueltemacja ngcollatsecama, cacpota ngcolhec allauquesancoc conne iemmen!—lhna aptemac ma'a. ⁴ Nguai'ac nac acnem ma'a actemacja lhnac na nec aptalhescama secamania'a ania'a nnenga Isaias, lhna aptemac: «Nnengquec nac alpalhemaianca iocjalhma metquelha temma: "¡Elpenescaso ta amai ma'a cacpota ewac apuesque enganco'oc, elpeiweso ta apquellanai'a amai, ⁵ ellapecja ta aliepuatecamoc cacpota metlapme', cacpota njan mangcoliacsec jata lhma'! ⁶ Netamen eliamwomjoc jata aplhamacjo enenlhet'awoc apqueluoncasemmap tep"» lhnac na nec aptemac. ⁷ Man na ntec enenlhet'awoc apquelmeiecja apnacja Juan cacpota ellauquesancoc iemmen ma'a, lhna ptemac apquellanemo: —¡Menasma quetlhengcap, apquellanenque mota eluoncasacpoc jata tep acuo'o ta aquientalhnema m'a, jawe coca njan ma'a! ⁸ ¡Eluatesamoc ngcollatsecama, etnamoc apquelpeiwomo, elleltacmelcasap! Motlhen apualho'oc quetlhengcap eluomoc tep aniem'o Abraham aptawana'ac neptamen, ncanec Engiapom Neten apuanquec etnescasecjac Abraham aptawana'ac neptamen metaimong anac apquelto la'a. ⁹ Mpenesalhquec tawa cacpota ngolhec aliaqtemeno aicapmen'oc iamet mangcoielhno la altacmanma aquielhna, ngcolhe ta njan aclho natelh— lhna aptemac Juan apquellanemo enenlhet'awoc ma'a. ¹⁰ Ca apquelelmalhneianca lhnac enenlhet'awoc ma'a, lhna aptaiancoc: — ¿Co la antancoc ennenco'o cacpota mannactewasalhque'? —lhna ptaiangcoc ¹¹ Ca apquellatemmoianca lhnac mocjom Juan, lhna aptemac: —Apietnec jata nquec apcanet apquelaclammap quetlhengcap, eniamoc jata lhema po'oc metca la apcaclammap, nietnec jata nquec aptecamoc quetlhengcap, eniamoc jata njan po'oc metco la aptoma —lhna ptemac apquellatemmoianca Juan ma'a. ¹² Ca apqueluaio'o lhnac na moclhem'a apquenmacmecama apquenmaicamoc pataccom impuesto ancoc, apquelleltemo lhnac ngcolhec allauqueso conne iemmen ma'a, ca apquelelmalhneianca lhnac Juan, lhna aptaiancoc: —Jengetlhecmoscama ¿Co la antancoc ennenco'o cacpota monnactewasalhquec?—lhna aptaiancoc ¹³ Apcatemmoicama lhnac Juan ma'a, lhna aptemac: —Meliecascamjo nquec apquenmaicamoc patacom—lhna aptemac ma'a ¹⁴ Ca apquelelmalhneianca lhnac na moclhem'a soldados ma'a, lhna aptaiancoc: —¿Co la antancoc ennenco'o cacpota monnactewasalhquec?— lhna aptaiancoc —¡ Meltemenguamjo lhma ellanjoc enenlhet apqueliaspecamo la pataccom, ntasec ma'a aquianmoma nac apquenmacmecama !—lhna ptemac Juan. ¹⁵ Apquelleljalhanmo lhnac enenlhet'awoc etnec jata Juan ma'a, apquellanemo lhnac Cristo m'a, Engiapom Neten apcapascama. ¹⁶ Coca lhnac aptemac Juan apquellanemo enenlhet: —Asquellaucasquec co niecje iemmen quetlhengcap, coca lhema enenlhet jata elhemac netamen co'o, neten apanquec acnema apmopuana, molhnoc co'o, nguannalhquec co'o ewalhoc atnec ascasennaicama, ca enenlhet anac ellanesoc jata Engiapom Neten Apualhoc quetlhengcap, cacpota njan talha. ¹⁷ Esantac jata iamet, etecponwatac jata trigo apactec apnaclhema apielhna apiemascama, elhpanquesec jata apactec cacpota njan apiempeioc, altacmanma apactec elhatmoc jata iama lhengajac, netamen apiempeioc eclho'oc jata natelh cacpota eluanlhecja metca acsepaneiacja lhnac talha ma'a—lhna aptemac Juan. ¹⁸ Coca jengca nlhanie' nac actemacja apietquescama Juan apquetlhecmoscama ania'a actacmanma enenlhet'awoc ma'a. ¹⁹ Apiamenaianca lhnac na Herodes Antipas ma'a, ncanec apmecjo lhnac apiamelhco nqueluana, apialheng Filipo aptawa, Herodias acuesai'a m'a. ²⁰ Coca Herodes apianwescaiacmec nac apquelanai'a ngcolatsecama, ca apcaclhenquescamo lhnac Juan nengaclhengcasemmalhquelha m'a.

Juan aplauquescama iemmen Jesus

²¹ Apquellauquesaianco lhnac iemmen Juan aplhamacjo enenlhet'awoc ma'a, ca apuaiacmo lhnac na Jesus, aplauqueso lhnac na iemmen ma'a. Necsa apacmetquescama lhnac Engiapom Neten Jesus, acmaijecjo lhnac neten, ²² apuaiwentamo lhnac Engiapom Neten Apualhoc tacjaplhet Jesus ma'a, malha conemmactec na ntemac, aclengammalhco lhnac nema aliatecama neten, lhna ntemac jeng: —Lheiap eietca ascamelaiam, apaiesacjec ewalhoc lheiap—lhna ntemac nema aliatecama

Apquelieijenca Jesus

²³ Ampaiacjasecja lhnac apquetlhecmoscama Jesus ma'a, malha treinta iantelhcapa apancoc quelhaja, Jose apquetca lhnac ma'a. Jose apiapom nac Eli ²⁴ Eli apiapom nac Matat Matat apiapom nac Levi Levi apiapom nac Melqui Melqui apiapom nac Janai Janai apiapom nac Jose ²⁵ Jose apiapom nac Matatias Matatias apiapom nac Amos Amos apiapom nac Nahum Nahum apiapom nac Esli Esli apiapom nac Nagai ²⁶ Nagai apiapom nac Mahat Mahat apiapom nac Matatias Matatias apiapom nac Semei Semei apiapom nac Josec Josec apiapom nac Joiada ²⁷ Joiada apiapom nac Johanan Johanan apiapom nac Resa Resa apiapom nac Zorobabel Zorobabel apiapom nac Salatiel Salatiel apiapom nac Neri ²⁸ Neri apiapom nac Melqui Melqui apiapom nac Adi Adi apiapom nac Cosam Cosam apiapom nac Elmadam Elmadan apiapom nac Er ²⁹ Er apiapom nac Josue. Josue apiapom nac Eliezer Eliezer apiapom nac Jorim Jorim apiapom nac Matat ³⁰ Matat apiapom nac Levi levi apiapom nac Simeon Simeon apiapom nac Juda Juda apiapom nac Jose Jose apiapom nac Jonam Jonam apiapom nac Eliaquim ³¹ Eliaquim apiapom nac Melea Melea apiapom nac Mena Mena apiapom nac Matata Matata apiapom nac Natan ³² Natan apiapom nac David David apiapom nac Jese Jese apiapom nac Obed Obed apiapom nac Booz Booz apiapom nac Selah Selah apiapom nac Nahason ³³ Nahason apiapom nac Aminadab Aminadab apiapom nac Admin Admin apiapom nac Arni Arni apiapom nac Herson Herson apiapom nac Fares Fares apiapom nac Juda ³⁴ Juda apiapom nac Jacob Jacob apiapom nac Isaac Isaac apiapom nac Abraham Abraham apiapom nac Terah Terah apiapom nac Nahor ³⁵ Nahor apiapom nac Serug Serug apiapom nac Ragau Ragau apiapom nac Peleg Peleg apiapom nac Eber Eber apiapom nac Selah ³⁶ Selah apiapom nac Cainan Cainan apiapom nac Arfaxad Arfaxad apiapom nac Sem Sem apiapom nac Noe Noe apiapom nac Lamec ³⁷ Lamec apiapom nac Matusalen Matusalen apiapom nac Henoc Henoc apiapom nac Jered Jered apiapom nac Mahalalel Mahalalel apiapom nac Cainan ³⁸ Cainan apiapom nac Enos Enos apiapom nac Set Set apiapom nac Adan Engiapom Neten coca apquelanai'a Adan. Lhnac apqueluesai'a Jesus apquelieijenca lhamacjo nac.