kpass-tmf_luk_text

Nellienlhaneiacmo nempacmetquescama Engiapom Neten

¹ Apquetlhecmoscanquec nac Jesus apqueltamesaicamoc actemacja nempacmetquescama nellienlhaneiacmo Engiapom Neten, lhna aptema Jesus lhema apietquescama: ² — Apnenquec nac lhema enenlhet jengiecpelquemo, mengiailhemo lhnac Engiapom Neten cacpota njan enenlhet'awoc ma'a, ³ nlomaca lhnac na m'a lhema nqueluana lhentampe, metca nnelha lhna ntemac aquiawecja apnacja jengiecpelquemo, altemo epasmoc emasquecsec alammelhammalhca acjaicamoc. ⁴ ⁵ Amanie nquec nac aquiawecja m'a, mang nac eniasecjai'ac ma'a, coca netamen jengiecpelquemo alquetamieanca lhnac apualhoc ma'a cacpota eniasecjamwomjoc lhentampe, ncanec alienlhaneiacmo metca nnelha acuecja m'a, nleclaiacmec nac jengiecpelquemo acuecja mota nqueluana nac. Mengiailhemo niecje Engiapom Neten cacpota njan enenlhet'awoc, apasmonque coca apanque nqueluana nac aniem'o alienlhaneiacmo m'a—lhna aptemac. ⁶ Ca apenescamo lhnac Jesus apqueleltennasecama apietquescama, lhna aptemac apquellanemo apqueltamesaicamoc: — Ca enenlhet anac jengiecpelquemo meijamolhma, apasmonquec coca apanquec nqueluana lhentampe aniem'o alienlhaneiacmo. ⁷ ⁸ Engiapom Neten coca epasmoc colhuawec apto enenlhet apqueliequiescama apquelienlhaneiacmo la'a apacmetquescama, colhuawec anquec jata eliejecjoc, jawengiapac anque' jata ngcotnec ma'a. Necsa asuecta ta mocjom asto enenlhet asqueniem'o neten astaiecjo enenlhet apanque', malha nac moluetangwetec enenlhet mangeliasqueiam la'a—lhna aptemac Jesus.

Enenlhet apcanmacpo cacpota njan enenlhet meientalhnecamaja

⁹ Apquelpaqmetquesaicama lhnac Jesus enenlhet'awoc apquelleltammacpo apancawec apquelpeiwomo, apquelluannaicama mota po'oc, lhna aptemac Jesus apietquescama: ¹⁰ — Apcanet nac enenlhet apquenmeiecja Engiapom Neten apnemacjac cacpota elpaqmetquesec Engiapom Neten ma'a. Lhema lhnac Fariseo, po'oc nac na apquenmama tacja pataccom impuesto ancoc ¹¹ Apquenmecjec nac neten fariseo, apacmetquescamo Engiapom Neten ma'a, lhna aptemac: "Awanjec astema gracias lheiap ncanec jawe stonac co'o po'oc enenlhet meliamolhma nac, mamma asmenielhma, moiennengquescamac etawa', motnema aptemacja nac jengque'e, apquenmama nac pataccom impuesto ancoc. ¹² Janet acnem lhema semana ancoc ascaqjasquesammalhco mec aniem'o lheiap, ascaianquec na diezmo aquianmoma asmacmecama " lhna aptema apacmetquescama Engiapom Neten fariseo. ¹³ Coca enenlhet apquenmama tacja pataccom impuesto ancoc, taiepec nac apquenmaiancolha m'a fariseo, apcapiosemmacpawec nac apjalhentamo njan ma'a, aptecpoianca apnengiec apanque' aniem'o aquietnecjo apaqtec meijamolhma, lhna aptemac: "Jeiasecjecjo nojo Engiapom Neten, emasques ngcolatsecama astemacja, eietno no neja'at" lhna aptemac apacmetquescamo Engiapom Neten— ¹⁴ Ca apenescamo lhnac apietquescama Jesus ma'a, lhna aptemac apquellanemo enelhet'awoc: —Jawe ngiapac anquec Engiapom Neten apmecjo tacja mocjom apquenmama tacja pataccom impuesto ancoc, coca m'a meniasecjecjoc fariseo lhquec. Enenlhet apqueltammacpo neten apancawec, ngcolhec jata actemesquesacjo coneng. Enenlhet apqueltaicamoc coneng anque, neten apancawec jata ngcolhec altemesquesacjo—lhna aptemac Jesus.

Apquenmama tacja Jesus nematcac

¹⁵ Mmajai'ac nac niecje ngcolhec aliantemo nematcac apnacja Jesus ma'a cacpota enenquenec apmeio'oc aietsecso'oc, cacpota ngcotlhewangcoc altacmanma allaniemjaicama m'a. Man nac elleltemoc apqueltamesaicamoc ma'a, apqueliamenaicama lhnoca ngcana'ac ma'a. ¹⁶ Ca apquellaweianca lhnac Jesus mematcac, lhna aptema apquellanemo apqueltamesaicamoc: —Meliasamolhma nematcac anac, ellanco jelliawa', ngcaimelhquec na quetlhengcap etnancocjac malha nematcac anac cacpota etnancoc Engiapom Neten apquennemolhema. ¹⁷ Engiapom Neten jata etnocjac apuesque apancoc wanlha apquellelto nac meliasqueiam, malha actaiancolha nac nematcac—lhna aptemac apquellanemo m'a.

Apquetcoc ngquescama apquetsecama

¹⁸ Lhema apquemjama apmanie' lhnac apacmetquescai'ac Jesus, lhna aptemac: —Jengetlhecmoscama apiamolhma' ¿Co la atnec co'o cacpota ngcoitec aquiennactema enengiec mancotnenguaianlha nnelha?—lhna aptemac ¹⁹ Ca apcatemmoianca lhnac Jesus ma'a, lhna aptemac: —¿Se lha ntac jeltangco nac asiamolhma lheiap que? Wanlha Engiapom Neten apto apiamolhma. ²⁰ Apiawec lheiap jenganemacja nac, meiennengques aptawa' etuascamoc mo'oc nqueluana, meniaqja po'oc, memenielhangco ie', metnama ngquec apmopuana ania'a apmajai'a etselhnanac po'oc, eliejecjo ta cacpota njan eltacmelquesec ngcana'ac —lhna aptemac Jesus. ²¹ Ca apcatemmoianca lhnac apquemjama apmanie, lhna aptemac: —Jai, astemacja eietcoc asqueliejecjo co'o m'a— ²² Coca lhna aptemac Jesus apcanemo: — Lhema caselha ngcaimelhcac lheiap etnejec, etlhac lhamacjo apquetsecama apancoc, etengia aquianmoma pataccom cacpota ellanconwomoc pataccom metca nac apquelletsecama, cacpota jeieplomaja. Netamen ngcoitec jata lheiap ngquescama apquetsecama m'a neten —lhna ptemac ma'a. ²³ Aiosec na ntemac apualhoc aplengai'o enenlhet ma'a aniem'o ngquescama apquetsecama. ²⁴ Netamen Jesus lhna aptemac apquellanemo enenlhet'awoc ma'a: —¡Nientelhec anquec eclhec enenlhet nquescama apquetsecama Engiapom Neten apcawacja! ²⁵ Mangcaniemec etalhnenwacja ietapecjang sei'e nac alhancoc —lhna aptemac Jesus ma'a. ²⁶ Ngquelpelapquescangquec nac enelhet'awoc apquellengai'o m'a, lhna aptaiancoc: —Mamma jatelha apqueluaiam la tep, jela— ²⁷ Ca apcatemmoianca lhnac Jesus ma'a: — Enenlhet mangcapuanquec etnec acto nac jeng, coca Engiapom Neten apuanque etnejec apmac'acja la etnejec—lhna aptemac ²⁸ Coca lhna aptemac Pedro: —Apuesque, nennengquenacje lhta caselha engancoc ennenco'o ca nelieplawengca lheiap—lhna aptemac ²⁹ Ca apcatemmoianca lhnac Jesus, lhna aptemac: —Jai', jawe ngiapac anquec apquelto la enenlhet eingiecja secje' apnemacja, aptawa', apquelialheng'a, ngcana'ac, apquetcac, aniem'o Engiapom Neten, ³⁰ elhcac jata caselha tep anquec mocjom jengque'e, netamen elhnacjac jata lhemec Engiapom Neten aquieto m'a neten mangcotnenguaianlha nnelha' aquiennactema apnengiec ma'a—

Aplheianma mocjom Jesus ematong jata

³¹ Apcanquesecjec nac Jesus 12 apqueltamesaicamoc moc apancawec ma'a, lhna aptemac apquellanemo: —Nenmeiacjec colhua Jerusalen, jata ngcotnec ma'a aquientalhnema apquetlheianmo lhnac nanec apquetsecama ania'a nnenga actemacja apiaijecama enenlhet apqueniem'o neten aptaiecjo enenlhet apanque. ³² Apquelemjama apmaniaie nac judios jellangconguomoc jata metnangco nac judios, jeluannama ta m'a, jeltacnewa ta njan, jellelhpaqjac jata njan apqueliemanong neja'at, ³³ jelleliaqpelhquetama ta, cacpota jellaqjec jata njan, coca janet'olhema acnem jata ngotnec asquetsepma, atnecjac jata mocjom ejalhnancoc apiesecsec apquenmasquenwaiacmo— lhna aptemac Jesus ma'a. ³⁴ Coca mang nac eliamoc apqueltamesaicamoc ma'a actemacja aplheianma Jesus, malha lhna ntemac melleltammap eliojoc ma'a.

Aptaqmelcasecja Jesus enenlhet metca apaqto'oc

³⁵ Nengaqtec nac apuecja Jesus natemma Jerico m'a, apnenquec nac enenlhet metca apaqto'oc ma'a necja amai, apquellanjecama lhna mota enenlhet pataccom ma'a. ³⁶ Aplengai'ac nac nema alpacmetenta amai, ca apquelelmalhneianca lhnac ma'a, lhna aptemac: —¿Se lha acto ie? ³⁷ —Apieca Jesus co Nazaret jengque'e —lhna aptaiancoc enenlhet ma'a. ³⁸ Ca apueneianca lhnac metca apaqto'oc ma'a, lhna aptemac: — Jesus, David aptawen neptamen, eietno neja'at— ³⁹ Coca enenlhet apquetlhengama apmanie Jesus apqueliamenaicama lhnac apquelleltemo ewanmac metca apaqto'oc ma'a, coca apianwescaiacmec nac apuenecama aquiennactema anque, lhna aptemac mocjom: —David aptawen neptamen, eietno no neja'at—lhna aptemac ⁴⁰ Ca apquenenwaiacmo lhnac Jesus ma'a, apqueltemo lhnac ngcolhec aquiantemacmo enenlhet anac, lhna aptemac ma'a: ⁴¹ —¿Sec la apquelto alanac que? —lhna aptemac — Apuesque, asqueltawec atecja lhma' mocjom—lhna aptemac ⁴² — Jai', ntase, etacmelecjac jata ncanec manjeiascacmoc lheiap —lhna aptemac Jesus m'a. ⁴³ Colhuawec anquec nac aptacmelecjac, apieplecjo lhnac Jesus ma'a, apquetsewascamawec nac ma'a aniem'o Engiapom Neten apmopuana, cacpota njan enenlhet'awoc apquelletsewascamawec nac na m'a.