12 ¹ Apuacjenwai'awec nac enenlhet'awoc apentalhnema Jesus apquenmanquelha' m'a, apqueliengemmacpec nac na m'a, lhnac aptemac Jesus apquellanemo apqueltamesaicamoc: —¡Ellajo ta quetlhengcap aptaianquelha ncolatsecama ellancocjac ¹ fariseos! Moc apquetlheianma mota aptaiancoc ma'a, acjemo coca ² Lhamacjo caselha apquellanecamoc apquelposcama m'a, coca alhnacjo toca ncoietnatac ma'a, lhamacjo caselha apquellanecamoc iennactesa lhma, ngoliepjonguetac jata m'a. ³ Ca ncanec ellajo quetlhengcap, lhamacjo apquelpaqmeiasma nac ienactesalhma, ngcolhec jata aluet'o acnem anque, lhamacjo apquelpaqmeiasma nac alposemmalhca, ngoliejonguetac jata napaqtawec enenlhet'awoc—

Mellaga nquec enenlhet

⁴ —Ca stac co'o asquellano quetlhengcap asquetlhelhma'ac, mellaga nquec enenlhet apmopuana nac ellaqjec, ncanec mangcollapuanquec ellaqjec apquelluanmoncoma nac ma'a. ⁵ Ellajoc coca Engiapom Neten, apmopuana nac ellaqjec enenlhet'awoc cacpota njan eclho'oc ma'a ncospanei'acja talha, jawe ngiapac anquec ma'a. ⁶ Ellanjono ctonac anatatco'oc cinco, alianmoma coca janet pataccom aliaquiema, mangquennawe ca ngcoie', Engiapom neten coca apqueltacmelquescamac ma'a. ⁷ Coca neten apancawec quetlhengcap, jawe aptanco nac anatatco'oc ¡Mangcolieta nquec apquellai'a, Engiapom Neten jata eltacmelquesec lhamacjo apqueliocja! Apqueliecpelcawec Engiapom Neten lhamacjo apqueliocja nac quetlhengcap. ⁸ Apqueleltennasquec jata nquec quetlhengcap apquellelto co'o jelieplecama metca apquenmancasecama, co'o ta njan asto nac enenlhet asqueniem'o neten astaiecjo enenlhet apanque, alleltennacsec jata njan napaqtawec Enenlhet Neten ma'a, jawe niapac anquec apquelleleto asqueltamesaicamoc quetlhengcap. ⁹ Coca apquelleltennaso la quetlhengcap manjeliecpelquema co'o, co'o ta njan alleltennacsec Enenlhet Neten jawe apquellelto jelieplecama quetlhengcap. ¹⁰ Engiapom Neten jata ellasecjecjo apmac'acja la enenlhet apquetlheianma jellamelhma co'o, asto asqueniem'o neten astaiecjo enenlhet apanque', coca mellasecjecjec enenlhet apquellelto apqueluannaicama Engiapom Neten Apualhoc. ¹¹ Nnec jata nquec aliantemacjo apcaqnecjelha la enenlhet'awoc, nlhoca la napactawec jengeliecpelquemo apqueluescaie', coca moltama nquec apquelualhoc apquenmajai'a la eltejec apquellatemmoicama quetlhengcap ma'a, ¹² Engiapom Neten Apualhoc jata ellancoc apqueliamo apquellatemmoicama quetlhengcap ma'a— ¹³ Apnenquec nac lhema enenlhet apiesecsec ma'a, lhna aptemac apcanemo Jesus: —Jengetlhecmoscama, eltennes no eiepma eniana ta jeiangcocjac necjatcoc caselha apanco'oc alhta tata nnenga — ¹⁴ Ca apcatemmoianca lhnac Jesus ma'a: —Mangjeieto co'o alpacmetquesalhca lheiap apetma cacpota alhpanquescasecjac caselha apanco'oc ma'a— ¹⁵ Ca apquellan'o lhnac Jesus enenlhet'awoc ma'a, lhnac aptemac: —Ellajo ta, metengiamo nque mota nquescama apquelletsecama quetlhengcap ncanec mangcollanquec acuenactema apqueliaijecama cacpota njan mangcollangquec alpaijecja mota apualho'oc—lhnac aptemac Jesus ma'a. ¹⁶ Ca apqueleltennaseianca lhnac Jesus lhema apietquescama m'a, lhna aptemac: —Lhema lhnac enenlhet nema apquetsecama nietnengquec nac aquiawai'a lhepop apancoc ma'a, nietnengquec nac na aquiawai'a apnaclhema aquielhna m'a. ¹⁷ Mang nac eijamoc apcacjesqueianlha aquielhna apnaclhema m'a, ¹⁸ lhna ntemac aclheianmo apualhoc: "Jai, atuasecjac jata co'o pa'at apac acnaianquelha' actec ejencoc, allanecjac jata alhnancoc pa'at aquiawai'a nque', cacpota altacmelquesec lhamacjo actec asnaclhema m'a, cacpota njan lhamacjo caselha ejenco'oc conne. ¹⁹ Netamen ncopaijecjac jata co'o ewalhoc, ncanec ncacsec jata asquetsecama cacpota njan nentoma, ncotnec jata acuenactema aquietnema caselha ejenco'oc, cacpota njan ajolhec jata ngcotnec asiamposammalhca" lhna ntemac aclhenaicama apualhoc enenlhet anac ma'a. ²⁰ Coca lhna aptemac Engiapom Neten: "Metca apqatec, enietsepoc jata pelhasep anac, po'oc enenlhet jata etnecjac apancoc apqueltacmelquescama lhquec caselha apanco'oc" ²¹ Jata ncotnec ma'a enenlhet apcanquesaicamo mota apquetsecama caselha apanco'oc, coca m'a metca aclhenaicama apualho'oc Engiapom Neten. ²² Ellailhono quetlhengcap apquellelto asqueltamesaicamoc: —Moltama nquec apualho'oc selha etawancoc que cacpota ngcoliennactecsec, cacpota njan se lha elentalhnecjac ietamopai'a ie', ²³ ncanec apqueltema nac apjalhnanco'oc acto neten anquec aquiaspommalhca, mangco lhno nentoma nac, ca apqueliocja nac neten anquec aquiaspommalhca, mangcolhnoc ma'a apquelentalhnema nac. ²⁴ Ellanjo no mama', mamma apnaclhecamoc aquielhna apquenaicamoc, mamma njan apnencanuecjelha la'a aquielhna apanco'oc, Engiapom Neten coca apquellaianque mota aptecamoc ma'a. Tep anquec jatoca ellancoc caselha Engiapom Neten quetlhengcap, ncanec tep anquec apquellelto apqueliaspommap, metlhoc mama'. ^{25 26} Acjemo ngcoltama apualho'oc ncanec mancawangque ngcowenque pancoc tep atquetsec anque apqueliaijecama, mangcawangquec na ngcolanengwomoc apqueliaijecama caselha aquiawai'a nquec la'a. ²⁷ Moltama apualho'oc se lha ellentalhnecjac ietamopai'a ie', ellanjo no elhnemoc alanamo nac iocjalhma, mamma anmacmecama la'a cacpota ngcoteniangcoc alentalhnema ietamopai'a, coca ngqueltase elhnemoc ma'a. Salomon annenga ngquescama lhnac nanec niecje pataccom apancoc, apqueltase lhta njan apquelentalhnema ietamopai'a, coca elhnemoc anac ma'a allelto neten anquec altacmanma malha alentalhnema ietamopai'a, melho Salomon annenga apquelentalhnema. ²⁸ Engiapom neten apquellaicamoc elhnemoc anac malha apqueltacmanma alentalhnema, wanlha coca aquiacuatacjo allenteiapma m'a, cacpota ngcolhec aluanlhacjo m'a. Tep anquec jatoca ngcotnec quetlhengcap apquellaicamoc Engiapom Neten apquelentalhnema ietamopai'a ¡Mocjom coca apqueliasqueiam Engiapom Neten quetlhengcap! ²⁹ Ca sta asquellano mocjom quetlhengcap, moltama nquec apualho'oc selha etawancoc que, cacpota njan einancoc, apquelentalhnema njan. ³⁰ Ca apqueltemacja nac meliecpelquemo Engiapom Neten, ngqueltama mota apualho'oc caselha aimommalhca. Coca quetlhengcap apnec apqueliapom ma'a neten, apiawec aimommalhquelha la'a. ³¹ Ntasec ellelienlhanmojo' apquelleliejecjo Engiapom Neten apto apuesque apancoc, cacpota ellancoc lhamacjo caselha alaimommalhquelha nac. ³² Mangcoieta nquec apquellai'a quetlhengcap apquellelto nac jelieplecama, apcanet apanque niecje quetlhengcap, coca Engiapom Neten jata eltemesquesec apqueluescai'e apquelpasmecja m'a, aniem'o apiamolhma m'a. ³³ Eclhamoc jata aquietnacja la caselha apanco'oc, eltengia ta aquianmoma patacom cacpota ennasquecjac apiesecsec enenlhet metca nac apqueletsecama, cacpota ncoitec quetlhengcap nquescama apqueletsecama m'a aquieto neten mangcotnengwaianlha nnelha', mamma enenlhet apmenielhma m'a cacpota njan mamma ascoc weneng aptewascama la caselha m'a. ³⁴ Ca aquietno la caselha acmennawe apanco'oc enenlhet nalhepop anac, nietnec na apualho'oc jengque'e, coca aquietno caselha acmennawe apanco'oc neten, nietnec na apualho'oc ma'a—

Nenganemmalhca ampenesojo cacpota anmoc tacja Jesus

^{35 36} 35–38 Lhnac aptemac apquellanemo Jesus apqueltamesaicamoc: —Meliojo quetlhengcap acnem asuectanlha ta mocjom, coca elpeneso ta, malha apto nac enenlhet nema annencasecama nac apenescamo talha alhancoc apancoc apcaponmatquescama la'a, ewac apuesque apancoc ma'a aquieto aquietnacja actacmelaicama lhma aliemjapma, mancoca eijamoc acnem ewa, pelhasep apanque' nlhoca la atsac'o. Ca apuai'o lhnac apuesque m'a, apueneianca lhnac ma'a, aplengai'o lhnac nema anencasecama m'a apmaiesquescamo lhnac atong. Mpaijecjec nac apualhoc ma'a apuesque aniem'o apenescamo apquennencasecama, ca apcaianco lhnac aptoma m'a, mpaijecjec nac apualhoc ma'a apquennencasecama—lhna aptemac apietquescama Jesus ma'a ³⁹ Lhna aptemac mocjom apietquescama Jesus: — Apiojo la'a enenlhet se lha hora ewac apmenielhma apnemacja, eljalhnamaja cacpota meniangquejec emenielhec caselha apanco'oc apnemacja ⁴⁰ Jata etnancoc na quetlhengcap, melwatesamoc anquec apqueleljalhnecama cacpota njan apquelpenescamo, ncanec co'o asto nac enenlhet asqueniem'o neten astaiecjo enenlhet apanquec, ngcotlapquesec jata awatac mocjom necsa aselhtecja apqueleljalhnecama quetlhengcap— ⁴¹ Lhnac aptemac Pedro apcanemo m'a: —Apuesque ¿nlho jengellietcasac apietquescama lhquec ennenco'o nengelto nac apqueltamesaicamoc, nlhoca la aplhamacjo enenlhet anac?— ⁴² Ca apcatemmoicama lhnac Jesus ma'a: —Ca asietquescama lhquec aplhamacjo apquellelto nac malha nema annencasecama la apiamolhma apqueliejecjo aptacja apcanemacja apuesque apancoc apqueltemo ellancoc aptecamoc apquetcac neptamen. ^{43 44} Ca apuacjo la mocjom apuesque apancoc ma'a, etanwetac apqueliejecjo aptacja lhquec apaioma apqueltemo ellana, cacpota etnesquesec apquemjama apmanie apqueltacmelquesquescama caselha apanco'oc ma'a, awanjec jata ngcotnec acpaijecja apualho'oc ma'a apquennencasecama. ⁴⁵ Coca nema annencasecama aclheianma la apualhoc alhaiec apuecta apuesque apancoc, meltacmelquesquesec jata njan aplhamacjo apquenmacmesaicama cacpota njan apquenmacmesaicama nquelwana'ac, cacpota eniempoc aptawecja, einec najan acuacmo nqueso aquieijamalhma'. ⁴⁶ Ncotlapquesec jata ewatac apuesque apanco'oc, eiaqmoncasecjac jata aquientalhnema nquec aptaiancolha enenlhet meliamonalhma. ⁴⁷ Nema annencasecama la'a apiawec aptemacja apecquencasecja apaioma apuesque apancoc, coca meliejecjo la'a, ngcolhec jata aquiaqmoncasacjo neten anquec aquientalhnema. ⁴⁸ Nema annencasecama la'a meijo la apecquencasecja apaioma apuesque apancoc, aptemenwacjo la lhma, ngcolhec jata aquiaqmoncasacjo alhiewai'a ngquec. Apquellelto la enenlhet aquiawai'a aquietnema apianweiacmo, ngcolhec jata aquiatenco m'a, apquellelto la enenlhet aquiawai'a aquietnema apientalhnemo, ngcolhet jata aquiatenco m'a—

Nelhpanquesammalhca aniem'o jengetlhecmoscama Jesus

⁴⁹ Lhnac aptemac Jesus apquellanemo m'a: —Asua'ac co'o cacpota aluetec talha canque'e nalhepop anac, asqueltawe niecje ncalaio' colhuawe' nac. ⁵⁰ Ngcowac jata aquiawai'a aquientalhnema asiaijecama, awanjec aslengai'anco colhuawe nac acuacmo actacja nnelha. ⁵¹ Ngquetlhenquec apquelualho'oc quetlhengcap ngcoitec metca acmasca ncanec asuai'o jengque'e, coca mangcotnec m'a, ennapacpoc jata. ^{52 53} Apnemolhema apquetcac apanque enielhpanquesacpoc jata. Apiapom eniammelhecjac jata apquetca, apquetca eniammelhacjac jata apiapom apanque, ngquen ngcammelhecjac jata atca nquec, atca ngcammelhecjac jata ngquen anque', niepiamong ngcammelhecjac jata atawen anquen, atawen anquen ncammelhecjac jata niepiamong— lhna aptemac Jesus

Caselha mongenatquescama

⁵⁴ Lhnac aptemac Jesus apquellanemo enenlhet: —Necsa apqueluetai'a quetlhengcap iepjopai'a acteiapma aquieto actalhnenwanlha acnem, etlhenec jata acmajai'a ncomma', jata ncotnec ma'a. ⁵⁵ Ca apquelhcacmo la njan pieiam, etlhenec jata quetlhengcap apmajai'a ncapsemangecja', ncotnec jata m'a. ⁵⁶ Ellammelhoc secjec neten quetlhengcap cacpota njan nalhepop, apquelliawec acmac'acja ncotnec, coca necsa apqueluetai'a quetlhengcap lhamacjo actemacja caselha asquellanai'a, mangcotlhenac mocjom apquelualhoc co'o asqueniem'o Engiapom Neten. ¡Metca alietnaicama apaqto'oc quetlhengcap!—

Nengasecjecjo mocjom jengammelhaicama

⁵⁷ —¡Eliequies ellanac acpeiwomo quetlhengcap¡ ⁵⁸ Aplhenacpec jata nquec lheiap apquellanai'a caselha ncolatsecama, ellanecja coca apancawec secjec ma'a amanie apmajai'a ngcolhec aquiantemacjo napaqtawec apquelemjama apmaniaie', cacpota elhcanwomoc lheiap apquellelto apqueltacmelquescama atong ma'a, cacpota ellaclhenquesec conne nengaclhencasemmalhquelha lheiap ma'a. ⁵⁹ Eniaqlhencasacpoc jata m'a acuacmo aptangienwacmoc apqueliaqmoma m'a cacpota etepecjac lheiap ma'a—