1 ¹ Teofilo, asqueltawec altennacsec ania'a actemacja lhta jengellanei'o Engiapom Neten nengiesecsa ennenco'o, mantec enenlhet apnactalhesaianco lhta actemacja ania'a nac ² apquellengai'a aniem'o apatno'oc apquellelto apmania'ie apquetlhelhma'ac alhta Jesus necsa apquempaiacjasecja lhta apmacmecama m'a, netamen ma'a apquellapascamo lhta elpaiacsec ania'a nac jalhmangquec jam. ³ Co'o lhta njan astacmelcasawec astengiaicama ania'a nac asquempai'o apteiaianlha lhta Jesus, asqueltawec colhua atalhacsec alanesquesec jata acnaianquelha actemacja acuetammalhca lhta m'a, ⁴ cacpota iejanwomjoc acto jawe ngiapac anque lhamacjo nemo nac aclhecmoscamo lheiap.

Aplheianma enenlhet neten etiemoc jata Juan apquellauquescama iemmen na niapom

⁵ Coca m'a lhennenga aptemo lhnac Herodes apuesque iocjalhma Judea, apnenquec nac na m'a sacerdote apuesai'a Zacarias, aptawa lhnoca acuesai'a Isabel, Aaron aptawen neptamen nac ma'a. Zacarias apto lhnac apmacmecama lhemec apquelpasmecja apuesque sacerdote Abias. ⁶ Alpeiwomo lhnac ma'a, alleliejecjo njan Engiapom Neten lhamacjo jengetlhecmoscama. ⁷ Mamma lhnac atca m'a Isabel, aquiennactema naie', aluaneiam anquec na ntaiangcoc ma'a. ⁸ Lhema cnem nac ntemac aquietecjo Abias apquetlhelhma'ac apquenmacmecamo lheme', cacpota enmacmama Engiapom Neten apnemacja, ⁹ ca apnactewaseianco lhnac lhema nennactewascama, apnacsepmec nac Zacarias cacpota eclhec anmalhquelha aquieto Engiapom Neten apnemacja, ewanlhec ¹ caselha acmases aimes acuesai'a incienso. ¹⁰ Ca apuanlhemo lhnac Zacarias ma'a, lhamacjo enenlhet nac apquelanmac aujac pa'at ma'a apquelpaqmetquescamo lhnac Engiapom Neten ma'a. ¹¹ Mpelapquescangquec nac apteiapuei'o Enenlhet apqueniem'o Engiapom Neten, aquieto aquiennacja aluanlhemmalhquelha caselha acmases aimes. ¹² Apquenmenai'ac nac Zacarias apuetai'o Enenlhet Neten ma'a, man nac eijamoc aptemacja m'a. ¹³ Coca Enenlhet Neten lhna aptemac apcanemo: —¡Meniaga' Zacarias! Apleng'ac Engiapom Neten apacmetquescama mota lheiap, ngcotac jata atca Isabel aptawa nac lheiap, etnesques jata apuesai'a Juan. ¹⁴ Epaiescasecjac jata apualhoc lheiap cacpota njan aplhamacjo enenlhet'awoc nematca nac. ¹⁵ Neten anquec jata ngcotnec apiaspommap napaqtec Engiapom Neten, meinec jata iama anmen cacpota njan iaujan anmen, elanoc jata apualhoc Engiapom Neten Apualhoc amanie apmajai'a etiemoc ma'a. ¹⁶ Coca m'a nematca nac, acuacmo ta aquiennactemacja apualhoc, elpasmoc jata apaiomalhema co Israel cacpota eclhecjac caselha ngcollatsecama, elleliejecjoc jata njan Engiapom Neten ma'a. ¹⁷ Ewac jata apmanie cacpota njan alhaie Cristo, ngcolhoc jata apualhoc actemo lhnac na nec apualhoc Elias secama ania'a annenga, cacpota njan acnema apmopuana. Ca nematca nac ellasecjasquesecjoc jata apiapma'ac apquetcac, etlhecmosancoc jata apquellelto melleliejecjo nac cacpota elleliejecjojo, elpenescasoc jata njan enenlhet'awoc cacpota enmoc tacja Cristo—lhna aptemac apcanemo enenlhet neten. ¹⁸ Ca apcatemmoianca lhnac Zacarias Enenlhet Neten: —Motnescasac co'o iocjalhmec acmac'acja nac ngcotnejec, neluaneiam ennenco'o, ngcaimelhque nac jetesquesec lhema caselha mongwetai'o cacpota moiascamec—lhna aptemac ¹⁹ Ca apcatemmoianca lhnac mocjom Enenlhet Neten: —¡Jeiascacme nac lheiap, Gabriel co'o Engiapom Neten jennengcasecama, asne co mota napaqtec ma'a, apto jeiapascama cacpota altennascata ania'a actacmanma nac. ²⁰ Coca jei'ascacmec lheiap, metca apaioma ta etnec acuacmo apteiacmo apquetca!—lhna aptemac ma'a ²¹ Apquellailhenquec nac aujac pa'at enenlhet'awoc Zacarias cacpota etiapuetac iocjalhma, apquelpacmetquesammacpec nac mocapancawe ma'a apquetlheianmo metiapma colhuawawec conne Engiapom Neten apnemacja. ^{22 23} Lhennenga lhna ntemac apiepjonwectamo Zacarias ma'a, mamma lhnoca ntemac apaioma, moc apopjec nac aptemac ma'a, ca atlheianmo lhnac apualho'oc enenlhet'awoc apuetai'a caselhaja conne Engiapom Neten apnemacja. Ca acuaiacmo lhna nnelha apmacmecama Zacarias Engiapom Neten apnemacja m'a, apiacmoiecjo lhnac po'oc, ca aptaqjecjo lhnac Zacarias, ngjeclhec noca mangcotiapma apaioma. ²⁴ Nguenactengquec nac atquetsec acnem ma'a, actemo lhna nlosec aptawa Zacarias, nguaiacmec nac 5 pelten acnema conne acnemacja, nlhenaicama lhnoca au'alhoc ma'a, lhna ntemac: ²⁵ —Engiapom Neten jetacmelcasac cacpota mangjeltacneuquec mocjom enenlhet'awoc! —lhna ntemac Isabel.

Enenlhet neten aplheianma etiemoc Jesus

²⁶ Nguaiacmec nac 6 pelten actema nlosec Isabel ma'a, apcapascamo lhnac Engiapom Neten Gabriel enenlhet neten natemma Nazaret aquieto Galilea, ²⁷ apsacjescamo lhnac ania'a lhema nqueluana atcoc acuesai'a Maria, acpoccanma lhnac Jose cacpota ngcotnec atawa'. Apuesque David aptawen neptamen nac ma'a Jose. ²⁸ Aptalhnenwaiacmec nac Enenlhet Neten acnacja Maria, lhna aptemac apcanemo: —¡Lheia nac Maria, apnenquec lhemec lheia' Engiapom Neten, apqueltawec na enquesec ngquescama actacmanma ngquec aniemjaicama!—lhna aptemac ma'a. ²⁹ Niemascangquec nac au'alhoc aclengai'o apaioma apaiwescama Enenlhet Neten Maria, mannoca ngcoijamoc ma'a. ³⁰ Lhna aptemac mocjom apcanemo Enenlhet neten: —Monguaga' Maria, Engiapom Neten apqueltawec enquesec ngquescama actacmanma aniemjaicama, ³¹ nlosec jata ngcotnec lheia', ncotac jata atca, cotnesques jata njan apuesai'a Jesus. ³² Ngcowac jata acnem neten apanquec apiaspommap nematca nac, elleltancoc jata enenlhet'awoc Engiapom Neten apquetca, Engiapom Neten etnesquesec jata njan apuesque nematca nac aptemo lhnac na nec apiata nnenga David. ³³ Etnec jata njan apuesque Israel mangcotnengueianlha nnelha, jawe ngiapac anquec ma'a—lhna aptemac enenlhet neten. ³⁴ Ca atemoianca lhnac Maria Enenlhet Neten ma'a: —¿Nieje ngcotnec atac eietca, mamma etawa co'o?— lhna ntemac. ³⁵ Lhta aptemac mocjom apcatemmoianca Enenlhet Neten: —Ewaiwentac jata tacjalhet Engiapom neten Apualhoc lheia', ngcapuetac jata apmopuana Engiapom Neten, ca ncanec nematca nac ngcolhec jata altanco Engiapom Neten apquetca, wanlha ta njan emacmesama lhamacjo cnem lhemec Engiapom Neten. ³⁶ Ca actema mo'oc anac lheia Isabel actacjo acuaneiam, ngcotac jata njan atca m'a. Apquetlheianme mota enenlhet'awoc aquiennactena naie' m'a, coca nguacmec ma'a 6 pelten actema nlose.' ³⁷ Apuanquec Engiapom Neten elanac lhamacjo caselha apmac'acja la etnejec—lhna aptemac ma'a ³⁸ Ca atemmoianca lhnac mocjom Maria m'a, lhna ntemac: —Jai', ntase nac, jata ngcotnec aptacja nac lheiap, co'o nac jeiasennaicama Engiapom Neten—lhna ntemac Netamen ma'a, aptaqjemo lhnac Enenlhet Neten.

Actema amaica'a Maria Isabel

³⁹ Ngcacjetaicama lhnac acmeiecjo Maria natemma acjaiam lhepop aquieto Judea, ⁴⁰ ca actalhnenwecjo lhnac Zacarias apnemacja m'a, acpaiwesquecjo aptawa acuesai'a Isabel. ⁴¹ Necsa aclengai'a lhnac Isabel acpaiwescama Maria, ca apcactemmacpo lhnac atca au'alhoc ma'a, aplanei'awec nac au'alhoc Engiapom Neten Apualhoc, ⁴² lhna ntemac aquiennactescamo acpaioma: —¡Maria, Engiapom Neten apuetascasac aquiawai'a actacmanma aquiaijecama lheia', cacpota njan atca nac, mangcolhnoc altemo lhemec ngqueluana'ac! ⁴³ Jawe co'o asto neten anquec asiaspommalhca jetno nac amaica'a lheia', lheia ta etnec ngquen apuesque ejencoc. ⁴⁴ Necsa aslengai'a lhquec jepaiwascama lheia, apcactecpec lhec eietca ewalhoc, apquetsewasawec lhec. ⁴⁵ Acmaseiwe lheia' ncanec mancoiascacmoc ngcowac jata aptacja alhta aplheianma Engiapom Neten —lhna ntemac Isabel ⁴⁶ Coca lhna ntemac Maria: —Jai, atacnescasancoc jata Engiapom Neten ncanec nietnec aquiawai'a apmopuana, ⁴⁷ mpaijacjec ewalhoc aniem'o jeguongquescama tep, ⁴⁸ jeiangquec na aquiawai'a actacmanma ascaniemjaicama, niecje astema coneng anquec jennengcasecama. Colhua jetlhenama ta aplhamacjo enenlhet'awoc jelleltangcoc jata asmapseiwe, ⁴⁹ ncanec Engiapom Neten jeiangquec aquiawai'a actacmanma ascaniemjaicama. Engiapom Neten apto apeiwomo, ⁵⁰ apquellamelaiacme mota enenlhet'awoc apquelelto apqueleliejecjo. ⁵¹ Ntewasquec apmopuana alietnaicama apaqto'oc apquellammacpo nac, ⁵² apqueljatsoscasocjec na aptaicamoc apqueluescaie enenlhet apquelientalhnemo, enenlhet metca apquelletsecama coca apquellancocja apquenmopuanca'a. ⁵³ Mec ato'oc anac apquellancocjec caselha actacmanma, moc apmeioc coca aptocjac nema nac apqueletsecama. ⁵⁴ Apquelpasmec apquellanemmacpo israelitas apquellelto apquellennencasecama, apquelietnawe mota napaqta'ac ma'a. ⁵⁵ Apenescamawec nac na nec apqueltennascama Engiapom Neten elpasmoc nengelieijengca Abraham, cacpota njan aplhamacjo aptawana'ac neptamen—lhna ntemac Maria m'a. ⁵⁶ Nnaiacmec nac lheme Maria m'a apcanetolhem'a pelten Isabel acnemacja, netamen actaqjemo lhnac ma'a.

Apteiam Juan apquellauquescama iemmen na niapom

⁵⁷ Nguaiacmec na acnem acmajai'a etiemoc atca Isabel ma'a, ⁵⁸ apqueluaiacmec nac annemolhema cacpota njan actema aclhamacja ncanec apquellengai'ac nac ania'a apcaicamoc Engiapom Neten aquiawai'a actacmanma aniemjaicama m'a ⁵⁹ Netamen, nguaiacmec nac 8 acnem acteiam nematca nac, aquiantemecjo lhnac cacpota ngcolhec aquiactemencaso necjatcoc aiempec apcammelhacja, coca enenlhet apquellelto apqueluetaianco m'a, lhna aptaiancoc: —Coltemesques jata apuesai'a Zacarias, ca ctonac apuesai'a apiapom anac—lhna aptaiancoc ma'a ⁶⁰ —¡Mma! Juan jata apuesai'a —lhna ntemac Isabel. ⁶¹ Coca enenlhet lhna aptaiancoc mocjom: —Mamma acnemolhema apuesai'a Juan —lhnac aptaiancoc ma'a ⁶² Moc apopjeio'oc na aptaiancoc apquelpaqmetquescamo Zacarias apmac'acja etnesquesec apuesai'a apquetca. ⁶³ Coca Zacarias apqueltemawec nac ngcolhec acmeso iamet acpaijema cacpota etalhacsec apuesai'a Juan. Mpelapquescanquec nac apqueluetai'a enenlhet'awoc ma'a. ⁶⁴ Ca acpelapquescamo lhnac na mocjom actepecjo apaioma Zacarias ma'a, ca aptacnescaseianco lhnac na Engiapom Neten ma'a. ⁶⁵ Ngquelpelapquescanquec nac aplhamacjo enenlhet'awoc ma'a, ngquetcaicama lhnac ania'a aclhamacjo acjaiam metaimong aquieto iocjalhma Judea. ⁶⁶ Coca apquellelto lhnac apquellengai'a ania'a nac ma'a, apqueluetai'o lhnac Engiapom Neten apto aptacmelquescama nematca nac, ca apquelpacmetquesammacpo lhnac moc apancawec ma'a, lhna aptaiancoc: —¿Co la ta etnec apuanemo ta nematca nac?—lhna aptaiancoc ma'a. ⁶⁷ Aplanei'awec nac apualhoc Zacarias Engiapom Neten Apualhoc, apenescamawec nac aplheianma apmanie apmac'acja ta ngcotnec, lhna aptemac ma'a: ⁶⁸ —Angelletsewasquesec Engiapom Neten co Israel, ncanec apua'ac cacpota jengeluongquesec tep, ⁶⁹ apcapasquec acnema apmopuana jenguongquescama tep, apuesque David aptawen neptamen apquennencasecama. ⁷⁰ Apquetlheianmec nac nanec apquellelto apquetsecama ania'a annenga apqueliequiescama Engiapom Neten ngcotnec jata m'a. ⁷¹ Jengeluongquesec jata tep napaqtawec apquellelto jengellammelhmacja, cacpota njan jengeltacnongcomacja nac. ⁷² Elietnajoc jata njan napaqta'ac nellieijengcaja, etnesquesec jata jawe ngiapac anquec actacja lhta apaioma. ⁷³ Ca aptemo lhnac nanec Engiapom Neten apquelanei'o nengelieijengca Abraham, ⁷⁴ jengeluongquesec jata tep napaqtawec apquellelto jengellammelhma cacpota jengellasennama metca nengellai'a, ⁷⁵ angenmacmesama wanlha apanquec Engiapom Neten, angellanancoc caselha acpeiwomo lhamacjo acnem—lhnac nanec aptemac Engiapom Neten apcanemo nellieijengca Abraham. ⁷⁶ Netamen Zacarias apquelanei'o lhnac apquetca, lhna aptemac apcano: —Lheiap eietca ngcolhec jata actemescaso secama ania'a apancoc Engiapom Neten, lheiap jata aplhengama apmanie' apuesque engancoc cacpota epenscasoc amai apancoc ma'a. ⁷⁷ Eleltennasama ta enenlhet'awoc co Israel Engiapom Neten enmasquesquesec meliamolhma cacpota eluonquesec tep. ⁷⁸ Awanjec anquec jengellamelaiam Engiapom Neten, jengellangcoc jata acnem ² alhnancoc mo'oc acnem ⁷⁹ cacpota ngcaponmetec apquellelto apquelloma aquiawai'a ienactesacja lhma', jengenmama njan cacpota angelloca metquelha acmasca—lhna aptemac Zacarias. ⁸⁰ Apuanecaniec nac nematca nac, niennactengquec nac apualhoc ma'a, aplomaca lhnac na m'a iocjalhma metquelha temma acuacmo acnem ampaiacjasecja apquetlhecmoscama napaqtawec enenlhet'awoc ma'a.