4 ¹ ¿Co la aniem'acja apquennapommap anac ma'a cacpota njan apquellatemommap apiesecsec anac quetlhencap elialheng'a, je? Coca nqueniemai'ac ma'a annapommalhca aliasponcomacja na mota apualho'oc apancawec ellanancoc ncollatsecama. ² Acuacjo apquellaqjo po'oc ncanec awanje canque mota apquelleltemo ncoitec caselha apanco'oc. Nietne sonquec na apqueliasepquescama po'oc la'a apanco'oc apquelleltemo njan ncoitec actonac ma'a, ca mancoito la caselha apanco'oc ma'a, ncoiepleujoc jata apqueltengiai'o apiempeioc ncomajac ennactemoc, nlho ca la njan ennapacpoc ma'a. Meluetai'ac caselha apanco'oc quetlhencap ncanec mellelmalhnecama mota Engiapom Neten, ³ moclhem'a coca niecje apquelelmalhnecama m'a coca metlhewaiancoc na m'a ncanec mancolatsecama apquelelmalhnecama, wanlha sonque mota aptengiaicamoc nquescama pataccom cacpota ncotesquesec acpaiesecja la apualho'oc ma'a aniem'o apquellanai'a ncollatsecama. ⁴ ¡Apnaqtewascamawec quetlhencap apquellanei'o Engiapom Neten! Apquelianweianlha niecje quetlhencap apquellelto niecje apquellasecjai'o ncollatsecama nac, apquellammelhmec coca niecje njan Engiapom Neten, jawe ngiapac anquec ma'a. ⁵ Ca ncanec aquietnemo nac Engiapom Neten apaioma aclheianma, ntemac jenque'e: «Awanjec anquec apcamelaiam Engiapom Neten aquieplomo apquenmeiawecama engellualho'oc anac ennenco'o jengellaicamoc» ntemac ma'a ⁶ Awanjec anquec na jengelpasmoma aniem'o apiamolhma' panque', ca actemo nac waccajac Engiapom Neten apaioma jenque'e: «Apcammelhmacja Engiapom Neten ma'a anmalhco enwalhoc anac, coca apqueltacmelquescasquec apquellaniemjaicama apquellelto nac nalhep'awec apualho'oc» ⁷ Elleliejecjo' Engiapom Neten, eltacnewa coca m'a awesque queliaqjameio' nac, netamen ncongiec jata m'a. ⁸ ¡Eltetescacjo ta Engiapom Neten, netamen eltetescatac jata njan quetlhencap ma'a! ¡Eliengiesa mota njan apmeio'oc, malha alpaisenquescama ncolatsecama quetlhencap meliamolhma!¡Ellalhnasecja ta njan apualho'oc quetlhencap janet anac apualho'oc! ⁹ ¡Collaiosenwom coca apualho'oc aniem'o meliamolhma, elleclhanwama ta njan, enmasquescam jata njan alpaijecja apualho'oc anac, etnescasocja ta njan anmaiosac'a apualho'oc! ¹⁰ ¡Etnocja nalhep'awec apualho'oc napaqtec Apuesque, netamen etnescasocjac jata neten apancawec quetlhencap ma'a! ¹¹ Elialheng'a, meluannamanquec po'oc apiesecsec anac quetlhencap jam, meliecpelconquec najan. Ca aptanco la quetlhencap ma'a, malha njan aptancoc apqueluannaicama jenganemacja, apqueliecpelquec najan. Mancolatsema etnancoc quethencap ma'a ncanec jawe jengiecpelquemo ngiapom quetlhencap, wanlha enenlhet apancawec apuanca'ac elleliejecjoc ma'a. ¹² Wanlha coca m'a lhema apjapac apto jengiecpelquemo ngiapom, apto lhta njan jengellaicamoc jenganemacja nac ma'a, apuanquec na jenwonquesec tep nlho ca la njan eiaqmoncasecjac nentemacja ncollatsecama la nellanai'a, ca ncanec quetlhencap mancollapuanquec eliecpelcoc aptemacja la po'oc. ¹³ Moclhem'a quelha quetlhencap ncotlhenec apualho'oc apquenmac'acja la ellanancoc apmaniaie, quelha etnec lhema apjapac jeng: "Acnem anac nlho ca la sosecja angiacjac ma'a po'oc temma nac cacpota alhec lhema iantelhcapa m'a, anacsepoc na pataccom ma'a" quelha ncotnec aclhenaicama apualhoc ma'a. ¹⁴ Man coca eijo' acmac'acja ta ncotnec apcaniemjaicama apmanie' m'a, emasquenwomo ta m'a, malha acto nac teiam eten aquiacuatacjo nac nenwetai'a, mpelapcasque na acmasquenwacmo m'a. ¹⁵ Ntasec coca eiaqmoncasecjac mo'oc apqueliatecama, etnec jeng: "Apquelto la apuesque ncolhong ascaniemjaicama nalhepop anac, alanac jata njan lhamacjo caselhaja" ¹⁶ Coca apquelammacpo sonquec quetlhencap aptaianco na mota apquelpaqmeiasma m'a apquenmac'acja la etlhenec etnancoc apmaniaie, coca mancolatsema niecje etnancoc apquelpaqmeiasma m'a. ¹⁷ Apto la enenlhet apiamo niecje elanac caselha actacmelo, coca melanac ma'a, mangiamolhma actonac ma'a.