7 ¹ Coca Melquisedec nac nanec apto apiau'acja apuesque aquieto m'a Salem, apto njan sacerdote apcasennaicama Engiapom Neten, apteiapmo apquelanielhaianco lhnac Abraham cacpota emoc tacja m'a, apcaianco lhnac na lhema apaioma actacmanma apqueltemo ncotiepoc apcaniemjaicama Abraham ncanec apqueltemesquesecjo coneng apquennapommap apqueliau'acja apqueluescai'e. ² Apcaianco lhnac na Abraham Melquisedec lhema necja atcoc acuesai'a diezmo aniem'o m'a apqueljatsoscasecja caselha apanco'oc apquennapommacpelha. Melquisedec coca nema altema apiau'acja apuesque apeiwomo, cacpota njan apuesai'a apiau'acja apuesque iocjalhma Salem, canjan apuesai'a apuiau'acja apuesque metca acmasca ngiapom. ³ Mang nac nanec na aquiamo apiapom ma'a, canjan nquen, mang na aquiamo apquelieiejenca'a. Mang na aquiamo aquieto aquietemelha apteiaianlha m'a, mang na aquiamo apquetsepmec quelhaja nlho ca la mma'. Ca nqueniema'iac aptemo sacerdote mancotnenwaiam annelha malha niecje aptonac Engiapom Neten apquetca. ⁴ Jawe ngiapac anquec Melquisedec aptemo lhnac nanec neten apanquec apiaspommap ma'a, ca nqueniemai'ac apquellaianco lhnac nanec na nengelieijenca Moisés necja atco'oc acuesai'a diezmo apqueljatsoscaseicocjac apanco'oc apqueliau'acja apqueluescai'e apquennapommacpelha. ⁵ Coca jenganemacja Moisés nlheianmec aquietemo nquec ntasec enmoc tacja mota acuesai'a diezmo aptanco la sacerdotes aptawana'ac neptamen Leví apiesecsec lhnac nanec apquennemolhema apancoie', aplhamacjo njan aptanco la aptawana'ac neptamen Abraham, ncaqjoc coca apquellaianquec acuesai'a diezmo m'a. ⁶ Coca Melquisedec jawe aptawen neptamen Levi, ncaqjoc coca apquenmalhnecama lhema necja atco'oc caselha Abraham acuesai'a diezmo, apto niecje njan neten apanquec apiaspommap Abraham aniem'o njan Engiapom Neten apqueltennascamo lhnac nanec na lhema apaioma ncotnec jata m'a, ncacjoc coca apcaianquec acuesaia'a diezmo m'a Melquisedec, netamen nac na m'a apcaianco lhnac nanec lhema apaioma ncotiepoc jata actacmanma apcaniemjaicama Abraham ma'a. ⁷ Nengelliawec ennenco'o m'a apto la apcaicamoc apaioma actacmanma po'oc, apto njan neten apanquec ma'a, melhnoc ma'a apto la aplhewai'a nema acpaioma actacmanma. ^{8 9} Apquellelto nac sacerdotes aptawana'ac neptamen Leví nenwanlha nac, apquenmaicamo mota necjatco'oc caselha apanco'oc enenlhet acuesai'a nac diezmo, eletsepoc jatoca m'a, coca aplhenammacpec aptema mocjom apjalhnancoc ma'a Melquisedec. Ca sacerdotes nenwanlha nac malha apquellaicamoc na diezmo m'a Melquisedec annenga ncanec aniem'o m'a apqueliatau'a annenga Abraham apcaianquec nac nanec diezmo m'a ¹⁰ Melquisedec necsa apquelanielhaicamoc lhnac nanec ma'a, coca mepalleianlha lhnac nanec nan ma'a sacerdotes anac nenwanlha nac. ¹¹ Apquellelto israelitas apquetlhewaianquec nac nanec jenganemacja, apquellelto sacerdotes apquelleniem'o Leví apquelleltemo lhnoca eliepluaquesec jenganemacja nac, mang noca ncomowanac ncoltemesquesec apquelpeiwomo enenlhet'awoc ma'a ca nqueniemai'ac aimommalhco apuai'a po'oc aptemacja sacerdote, jawe aptemo lhnac nanec Aaron annenga, coca m'a aptemo lhnac nanec malha Melquisedec. ¹² Apcaimecpo la apiaqmoiecja po'oc sacerdote, ncaimelhquec na ncoiaqmecjac mo'oc jenganemacja. ¹³ Coca sacerdote alheno nac apto m'a Apuesque engancoc anac, jawe apqueniem'o m'a aptawana'ac neptamen Levi, apteiacmo coca m'a po'oc enenlhet aptawana'ac neptamen metnaianco mota sacerdote. ¹⁴ Jai, nenlhamacjo nengelliawec Apuesque engancoc apqueniem'o m'a aptawana'ac neptamen Juda, mang nac nanec elheianmac Moises annenga etiepoc jata m'a lhema sacerdote apqueniem'o m'a Juda. ¹⁵ Colhua coca nelpeiwesecjec ma'a nietemawec ma'a apuai'o nac apjalhnancoc sacerdote malha aptemo lhnac nanec ma'a Melquisedec, ¹⁶ ca sacerdote apjalhnancoc anac jawe apqueniemacja m'a nema atawana'ac anac, coca aptemenwai'ac sacerdote aniem'o m'a menietsepma'. ¹⁷ Lhnac nanec aptemac aplheianmo Engiapom Neten ma'a: «Lheiap apto sacerdote apnemo njan lheiap ma'a Melquisedec» ^{+ ft Salmos 110:4 18} Coca jenganemacja lhennenga mmasquenwaiacmec ma'a ncanec mancoiennac aiempec canjan manquec ma'. ¹⁹ Ca jenganemacja nac Moisés mancawanquec ncotnesquesec lhema apjapac la apeiwomo enenlhet, colhua coca ennenco'o enwanca'a angeltetescacjac Engiapom Neten ma'a, nietnec na alleljalhnecama engellualho'oc jengellancoc jata caselha neten anquec actacmanma mancolhoc ma'a jenganemacja nac. lhennenga. ^{20 21} Apquellelto sacerdotes lhennenga nema aliequiescama la'a metca nema actema juramento, coca Apuesque nnenquec aliequiescamo aquieplomo njan nema actema juramento, ca actemo nac na actalhesammalhca Engiapom Neten apaioma jenque'e: «Aptemenquec nac juramento Apuesque m'a, metca apaiqmoncasecja mo'oc apaioma, lhna aptemac: “Lheiap apto sacerdote mancotnenwaiam annelha” lhna aptemac ma'a ²² Jai, coca alhnancoc apqueltemacja antancoc Engiapom Neten nellanei'o canjan jengellanei'o, acto neten anquec actacmanma aniem'o m'a Jesús, mancolhnoc ma'a nengellanemmalhquelha antancoc lhennenga. ²³ Nema aquiaqmoncasecja mota po'oc sacerdotes aniem'o apqueletsepaiam, ²⁴ coca Jesús mancaimommalhca nema aquiaqmoncasecja po'oc la'a ncanec mengietsepma, apto njan sacerdote mancotnenwaiam annelha. ²⁵ Apuanque na eluonquesec tep lhema actema metca mocjom taiep apquellelto la apquelquetansema cacpota eltetescacjac Engiapom Neten, wanlha nja mota apqueltennasquecja apqueluesai'a enenlhet napaqtec Engiapom Neten. ²⁶ Nietawec anquec ma'a Jesús apto apiau'acja sacerdote apcaimommacpo mota ennenco'o, apto apocquenammap, metca aptemenweiacmo lhma, apcalhnai'o njan napaqtec Engiapom Neten, niecje apalhcaicama enenlhet'awoc meliamolhma man coca elanai'ac ncolatsecama, ca nqueniemai'ac na ncolhec actemescaso neten apanquec apiaspommap ma'a. ²⁷ Ca aplhamacjo sacerdotes nac ncaimelhquec engiaqjec nentoscama lhamacjo acnem cacpota engianconwacjac Engiapom Neten aquiaqmoiecja meliamolhma apancoie, netamen ma'a apuanca'ac ellancoc na aquiacmoiecja meliamolhma apquennemolhema. Coca mo'oc actemacja m'a Jesús, mancaimommalhcac ellancoc aluanlhenmalhca la'a nentoscama lhamacjo acnem, ncanec apcaiancawe lhta apmatnamo m'a malha nenmescama la aluanlhemmalhca nentoscama, lhema actema coca m'a mancaimelhcac engietsepoc mocjom. ²⁸ Ca jenganemacja nac wanlha mota aliequiescama enenlhet metno apeiwomo cacpota etnec apiau'acja sacerdote, coca netamen jenganemacja nac acuai'o m'a lhema apaioma apenescamo aplheianma Engiapom Neten, apqueliequiescamo m'a etnesquesec apiau'acja sacerdote Apquetca apanque, nemo njan actemesquescamo apeiwomo m'a lhema actema metca mocjom taiep.