2 ^{2 3} 1–3 Nietnenquec nac nec aquientalhnema jenganemacja Engiapom Neten apquellaianco enenlhet neten cacpota ellanconwomoc ma'a enenlhet'awoc, allelietasquesecjo njan aliaqmoncasquesecja apqueltemacja apquellelto la melleliejecjo, canjan apquellanecamoc la caselha ncollatsecama. Ca nqueniemai'ac ncaimelhquec angeltacmelcaso nellailhemo ania'a nac nengeluoncasemmalhca tep ncanec Engiapom Neten apanquec aplheianma m'a, antacmelquesec najan cacpota mangeljaiwec malha amai'a la actacmanma ncanec na ennenco'o angetlhewancoc jatelha njan nema aquiaqmoncasecja' mangelliajacjo la'a. Jai', apmanie panque lhta aplheianma Apuesque ania'a nengelluoncasemmalhca tep, apquellelto lhta njan apmaniaie apquellengai'a m'a ania'a nac, jengelleltennasacjo njan ennenco'o nenwanlha nac actema iocjalhmec anquec ma'a ania'a nac. ⁴ Apquelan'a lhta njan Engiapom Neten caselha monwetai'o aniem'o neten, caselha jempelapquescama, caselha njan monwetai'o cacpota njan apquellaianco lhta Espiritu Santo apmac'acja la ellancoc, cacpota ncotnec iocjalhmec ma'a ania'a apquetlheianma. ⁵ Meltemoc Engiapom Neten etnancoc jata apquelientalhenmo enenlhet neten ma'a alhnancoc nengawacja ta, ⁶ coca m'a etnecjac jata po'oc apuesque. Nietnenquec na nema aclheianma waccajac Engiapom Neten apaioma, ca nnema actemo m'a: «¿Neten apanque nlho apientalhnemo aptema enenlhet ja'e cacpota ncolhene mota apualhoc epasmoc lheiap ja'e, je? ⁷ Apquelan'a lhta njan lheiap enenlhet quetsec coneng apientalhnemo melhnoc enenlhet neten, coca apcaianque lhta njan apientalhenmo m'a, acnemo ai'o njan, ⁸ apcaianque lhta njan acnema apmopuana cacpota enmama lhamacjo caselha lhmanquec jam» Jai, apcanquec Engiapom Neten apmopuana enenlhet cacpota enmama lhamacjo caselha lhmanquec jam, apto njan apuesque aisecsec ma'a, coca mancowacmoc mocjom apsaujemelha apquenmaicama. ⁹ Nne lhta njan actepqueso Jesús jenque'e quetse lhtoca njan coneng apientalhnemo melhnemoc enenlhet neten, iacuatacjo lhtoca m'a. Colhua coca m'a nlaneiawec apientalhnemo canjan nemo ai'o aniem'o lhta apquetsepma cacpota jengeltacmelquesquescamoc nellaniemjaicama ennenco'o aniem'o jengellamelaiam Engiapom Neten. ¹⁰ Coca lhamacjo caselha neluetai'o nac allomaja, nietnec aliennactema aniem'o Engiapom Neten apquellentepquescama, apanco'oc apancawec najan, apqueltemawec na aplhamacjo apquetcac elpasmacpo lhamacjo caselha apanco'oc altacmelo, apqueltemawe lhta njan jenwonquescam tep etac aquientalhnema cacpota esaujoc apeiwomo. ¹¹ Jai, aplhamacjo apquellelto nac apquelpocquenammap, canjan apto lhta njan apquelanai'a apquelpoccanma, wanlha njan lhema apqueliapom apquelpasmecja, ca ncanec Engiapom Neten Apquetca memanquec elleltancoc apquelialheng'a. ¹² Ca actemo nac na actalhesammalhca waccajac Engiapom Neten apaioma jenque'e: «Alhenec jata apuesai'a lheiap napaqtawec ma'a elialheng'a, annecmacsec jata njan nennecmascama apiesecsec apcacnecjelha la m'a cacpota eltacnescasancoc puesai'a lheiap ma'a» ^{1 13} Ca ntemac na mocjom actalhesammalhca Engiapom Neten apaioma jenque'e: «Mangiascamec jata ja'e» Canja ntemac mo'oc actalhesammalhca: «Asnec co'o jenque'e asquetlhelhma'ac eietcac Engiapom Neten jellaicamoc» ¹⁴ Ca Engiapom Neten apquetcac anac enenlhet apancawec ma'a, nietnec apjapetec canjan ema apanco'oc ca nqueniemai'ac na aptaiecjo lhta enenlhet apanquec Jesús ma'a, ca apquetsepmo njan ma'a, aptemesquesecjo lhta njan coneng awesque netsepma acuesai'a nac queliacjameio'. ¹⁵ Apqueluonquescamo lhta njan taiep apquellelto lhta malha altemesquescama esclavos netsepma nac, ncanec naianque lhta mota m'a apquellai'a. ¹⁶ Coca jawe apuai'a jenque'e apmajai'a elpasmoc ma'a enenlhet neten anac, wanlha coca apuai'o cacpota elpasmoc aptawana'ac neptamen Abraham annenga. ¹⁷ Ncaimommalhque lhtoca etnecjac secjec enenlhet apanquec elhnesacpoc na apquelialheng'a, ncaimommalhque lhta njan engietsepoc apqueliaqmoiecja la m'a cacpota etnec sacerdote apto neten apanquec apiaspommap, apietnai'o napaqta'a enenlhet'awoc, nengaqtec na Engiapom Neten necsa apcasennaianca cacpota eiepjonwomjoc ncapuanac enmasquesquesec meliamolhma enenlhet'awoc lhmanquec jam. ¹⁸ Jai', aplengaianque lhta njan aquientalhnema jenque'e, apuetai'a lhta njan aquiepconma ca nqueniemai'ac apmopuanco nac elpasmoc apquellelto nac apqueluetai'a aliepconma la'a.