1 ¹ Lhennenga lhnac nanec Engiapom Neten apqueltacjenwesquecjo mota apquelleltennascamo nellieijenca'a lhamacjo actemacja aniem'o njan apquenmaicama apquetsecama ania'a cacpota etlhenec ma'a. ² Coca colhuawe nac quetse ncaimelhcac actemonwaianlha nnelha acnem aplheianmo njan ma'a aniem'o Apquetca apanque', apto lhnac nanec na apmaicama apquelanei'o lhamacjo caselha lhmanquec jam, apquellaicocjo aptemesquescamo njan apanco'oc lhamacjo caselha lhmanquec jam. ³ Ca Apquetca acnemo mo'oc apiocja napa'at alienmomo, acnemo njan apmopuana apiapom Engiapom Neten, apnemo panquec nan ma'a, apqueliennactescai'o njan lhamacjo caselha aniem'o acnema acmowana apqueliatecama. ⁴ Apto njan neten apanquec apientalhenmo metlhojoc enenlhet neten ncanec nietnec na apuesai'a neten anquec aquiaspommalhca metlhoc ma'a enenlhet neten. ⁵ Mang nac nanec na etnemac engianac lhema apjapac la enenlhet neten Engiapon Neten jenque'e: «Lheiap apto eietca, astepquescama lheiap acnem anac» mang nac nanec etnemac ma'a. Mang nac nanec na etnemac Engiapom Neten: «Atnec jata apiapom ja'e, atnec jata eietca ja'e» man nac etnemac ma'a. ⁶ Coca apcapascamo Engiapom Neten apquetca apuetai'a apmanie nalhepop anac, lhna aptemac: «Ntasec eltacnescasancoc Apuesai'a m'a aplhamacjo enenlhet neten apquellelto apquellapascama Engiapom Neten» ⁷ Lhnac na nema actemo allanemo enenlhet neten jenque'e: «Ncolhec jata altemesqueso enenlhet neten apanco'oc ma'a malha alhcaiam, ncolhec jata njan altemesqueso apquellasennaicama apanco'oc malha talha aleiwoma» lhna nnema actemo m'a. ⁸ Coca lhna aptemac Engiapom Neten apcanemo apquetca jenque'e: «Lheiap etnec jata apuesque mancotnenwaianlha nnelha, elanac jata mota acto acpeiwomo. ⁹ Lheiap apcamelaiam caselha altacmelo, aptacnoncoma coca caselha ncollatsecama nac, ca nqueniemai'ac apqueliequiescamo Engiapom Neten apto apuesque apancoc lheiap apiesecsec apqueltemo lhemec la'a, apiancanmo njan apietsecsec aceite acto aicamoc acpaijecja apualhoc, coneng ancawec ma'a apqueltemo lheme nac» ¹⁰ Lhnac nanec na nnemac actemo: «Lheiap apto apuesque, apmanie panquec najan tep nac nanec apiennactescamo njan nalhepop anac lhmanquec jam, apquellanei'o njan neten, apmeioc apancoie'. ¹¹ Coca lhamacjo caselha nac ma'a ncomasquenwomoc jata, memasquenwomec jatoca lheiap ma'a, ncomasquenwomoc jata njan lhamacjo caselha lhmanquec jam malha aptonac ietamopai'a la aptema nac apjapac, ¹² netamen ma'a eliacsasecjac jata lheiap ma'a malha actonac nengaqlammalhca nac, ieacmoncasecjac jata po'oc apjalhnancoc. Lheiap coca mamma aquiacmoiecja mo'oc aptemacja, mamma njan acmasquenwaianlha apcaniemjaicama» ¹³ Mang nac nanec na etnemac engianac lhema apjapac la enenlhet neten Engiapon Neten jenque'e: «Elhnata ta nejecja aquiennacja nac ejectong acuacmo ta asqueltemescasacjo coneng apquellammelhmacja lheiap, elteianmecjac jata njan lheiap ma'a» ¹⁴ Ncanec enenlhet neten apquellelto malha engiempejec apquellasennaicama Engiapom Neten cacpota ellapacsec elpasmoc apquellelto nac apqueluoncasemmap tep.