7 ¹ Aquenmalhnecama lhnac apquemjama apmanie' sacerdotes Esteban ma'a, lhnac ptemac: —¿Jawe nlho ngiapac apquetlheno nac ja'e, je?—lhna aptemac. ² Ca apcatemmoianca lhnac Esteban ma'a, lhna ptemac: —Jellailhonojo quetlhencap, Engiapom Neten acnema apmopuana panque' apuetasquesammacpo lhnac nanec nelieijenca Abraham aquieto Mesopotamia, amanie lhnac apmajai'a elhnemoc iocjalhma Haran, ³ lhnac nanec aptemac Engiapom Neten: "Eiengiecja ta apcawacja' ca njan apaiomo lhema lheiap, co'o ta atesquesec lhema iocjalhma cacpota elhnemoc ma'a" lhnac nanec aptemac Engiapom Neten. ⁴ Apteiapmec nac Abraham ma'a iocjalhma Caldea, apnaiacmo lhnac ma'a iocjalhma Haran. Ca apquetsepmo lhnac apiapom Abraham ma'a, netamen apiantementamo lhnac Engiapom Neten apiesecsec enenlhet anac jenque'e. ⁵ Aplomaca lhna apanque Abraham jenque'e, mang noca eltemoc etnec apancoc lhepop Engiapom Neten ma'a. Coca apqueltennascanquec nac lhema apaioma, netamen apquetsepma ta Abraham lhnoca aplheianmac Engiapom neten ellancoc lhepop jenque'e aptawana'ac neptamen, coca mamma lhnoca apquetca mocjom ma'a. ⁶ Aplheianmec nac na Engiapom Neten Abraham elloca mo'oc lhepop aptawana'ac neptamen, cacpota njan etnancoc esclavos acuacmo 400 iantelhcapa apquellengaianco apquenmacmecama m'a. ⁷ Apqueltennascanquec nac nanec Engiapom Neten Abraham, lhna aptemac: "Co'o jatoca aiaqmoncasecja' apqueltemacja enenlhet apqueltemesquescama esclavos quetlhencap, netamen elentepoc jata m'a cacpota jellasennama jenque'e, iocjalhma nac» lhnac nanec aptemac Engiapom Neten apcanemo Abraham. ⁸ Apqueltennascanquec nac lhema apaioma Engiapom Neten Abraham, apcanemacja etnec lhema caselha acuesai'a circunsicion cacpota ncotnec mongenatquescama apto apnemolhema apanque, ca apuetai'o lhnac apquetca Abraham ma'a apuesai'a Isaac, nwaiacmec nac 8 acnem apteiam ma'a, ca aptemesquescamo njan circunsicion ma'a. Aptemenquec nac na m'a Isaac apquelanei'o apquetca Jacob, netamen aptemo lhnac na Jacob ma'a apquellanei'o 12 apquetcac ma'a. ⁹ Jose lhnac apuesai'a lhema apquetca apiesecsec 12 nac ma'a, aquietnemo lhnac apqueliasepquescama apquelpetma'ac ma'a, ca apquelhacjamo lhnac pataccom aquianmoma cacpota ncolhec aquiantemacjo iocjalhma Egipto. Coca Engiapom Neten noca mota aplhelhma Jose m'a, ¹⁰ aptacmelquescanquec nac na necsa aquientalhnema apnema m'a cacpota njan aptemesquescamo lhnac na acnema apiamo. Nleclemawec nac apualhoc apiau'acja apuesque co Egipto apuetai'o m'a Jose, ca aptemesquescamo lhnac na gobernador apquellawacja nac ma'a cacpota njan apquemjama apmanie lhnac na lhamacjo caselha apanco'oc ma'a. ¹¹ Netamen acsaujommalhco lhnac aptecamoc ma'a iocjalhma Egipto cacpota njan Canaan, nwai'ac nac acnem aquientalhnema apcacjaicamoc ma'a, metca aptecamoc na aptaiancoc nellieijenca m'a aquiet'o m'a Canaan. ¹² Aplengai'ac nac Jacob ania'a aquietnema nentoma alena apaqtec aquieto Egipto, ca apquellapascamo lhnac apquetcac ma'a cacpota eltengianwomoc aptecamoc, lhema lhna ntemac apqueltengianweiam aptecamoc ma'a. ¹³ Netamen ma'a apquenmeiecjolhnac mocjom janet apqueltaqjemo aquieto Egipto apqueltengianwecja aptecamoc, ca apqueltemo lhnac Jose eliecpelquecjoc mocjom apquelpetma'ac ma'a, apqueliantemecjo njan napaqtec apiau'acja apuesque co Egipto cacpota eliecpelcoc na m'a. ¹⁴ Ca apqueltemo lhnac Jose eliantementac na apiapom Jacob cacpota njan aplhamacjo aptema aplhamacja aquieto Egipto, malha 75 enenlhet nac ma'a. ¹⁵ Apcacjenweiacmec nac ma'a acuacmo apquetsepmo Jacobo cacpota njan lhamacjo nellieijenca m'a. ¹⁶ Ca acnemo lhnac acsecjo apjapac Jacob aquieto m'a Siquem, nemo njan aplhenquesquecjo metaimong alhua, Abraham lhnac nanec apmama apanco'oc Hamor apquetcac neptamen. ¹⁷ Ncanquetuaiacmec nac acnem ncotnec jata apqueltennascamo lhnac nanec lhema apaioma Engiapom Neten ncotnec jata Abraham, apentalhneianquec nac co Israelitas aquieto iocjalhma Egipto. ¹⁸ Coca aptemo lhnac na mocjom po'oc apiau'acja apuesque co Egipto, mancotno apiecpelquemelha Jose m'a, ¹⁹ coca m'a apquelliennencaseianca lhna mota nellieijenca, apqueltecpoianca njan, cacpota njan apqueliennai'o apquellanei'o cacpota mancolhec allan'o apquetcac colhua la apalleiam cacpota eletsepo pancawec ma'a, cacpota melhamanque'. ²⁰ Ca apteiaiacmo lhnac Moises ma'a, aptacmelo panquec nac nematca apquetcoc, 3 pelten nac nwaiacmoc altacmelquescama ncana'ac ma'a, ²¹ netamen aliamasenwaiacmo lhna nquec ncana'ac Moises apquetcoc ma'a, coca acuetecjo lhnac na apuesque Faraon apquetca, acuanenquescamo lhnac malha atca nquec na ntemac ma'a. ²² Ca acnemo lhnac atlhecmoscamo m'a lhamacjo aptaiancolha cacpota njan actemacja apquelianweiacmo co Egipto, nwaiacmec nac acnem aptema neten apanquec apiaspommap Moises ma'a, cacpota nja apmopuana apaioma ca njan apmopuana elanac caselhaja. ²³ Ca acuaiacmo lhnac 40 iantelhcapa pancoc Moises ma'a, apqueltemo lhnac etnec amaica'a apaiomolhema co Israelitas, ²⁴ apuetanwecjo lhnac aptecpoianca lhema enenlhet Egipcio enenlhet Israelita, apmasueiacmec nac Moises enenlhet co Israelita, ca apcaqjemo enenlhet Egipcio. ²⁵ Nlheianmec nac apualhoc Moises apaiomolhema co Israelitas ncotlhenec apualho'oc emama Engiapom Neten Moises cacpota eljatsoscacjac apaiomolhema m'a aquieto Egipto, mang noca niecje ncotlheianma apualho'oc ma'a. ²⁶ Mo'oc acnem nac ntemac ma'a apuetanwecjo lhnac mocjom Moises apquennapommap po'oc apanquec co israelitas, ca apmajai'o lhnac elhpanquescamoc ma'a, lhna aptemac: "Apaiomo lhema panquec apquennapecpoc, se lha cto ie, je" lhnac ptemac. ²⁷ Coca apto lhnac aptecpoicama po'oc apanque', apienganquec nac Moises ma'a, lhnac ptemac: "Manjengennawesca, jawe apuesque engancoc lheiap, jawe njan jengielpelquemo ngiapom, ²⁸ apmac'ac quelha jeiaqjec lheiap ca aptacja lhta cnem alhta apcaqjo enenlhet Egipcio" lhna ptemac. ²⁹ Necsa aplengai'a lhnac apaioma po'oc Moises ma'a, apquengiemo apmaianco mo'oc apquellawacja acuesai'a Madian, apcanet nac aptemonweiacmoc apquetcac ma'a apuaianlha'. ³⁰ 40 iantelhcapa lhnac nwaiacmoc ma'a, apteiapuei'o lhnac lhema Enenlhet Neten aquieto metquelha temma, nengaqtec nac lhienep acjaiam Sinai, apquenenwai'o lhnac aisecsec awa' panactema m'a necsa aleiwoma talha. ³¹ Mpelapquescanquec nac apuetai'a Moises ma'a, aptetesaianquec nac cacpota elanjoc nengaqte', ca aplengai'o lhnac apqueliatecama Engiapom Neten ma'a, lhnac ptemac: ³² "Co'o asto nac Engiapom Neten apanco'oc apquelieijenca'a lheiap, Abraham, Isaac, cacpota nja Jacob" lhna aptemac. Apquelpelhiennonquec nac apcai'a Moises ma'a, man na ncomajai'ac elhenquesec apquelanei'o m'a. ³³ Ca aptemo lhnac mocjom Engiapom Neten apcanemo Moises: "Eljatsos apnacteto apmancoc lheiap ncanec apquenenwawec nejaqtec co'o. ³⁴ Asuet'ac co'o apquellengaianco enenlhet ejenco'oc aquieto m'a Egipto, asleng'ac na apquelleclhanwecama, ca asuaiwantamo nac cacpota aluonquesec tep ¡Epeneso ta Moises! Anwapacsec jata lheiap iocjalhma Egipto" lhnac aptema apcanemo Engiapom Neten Moises. ³⁵ Niecje apqueltacnonwecja secje anquec ma'a aploma Moises ma'a Egipto apquennemolhema apancawec israelitas, lhna aptaiancoc ma'a: "Manjengennawesca, jawe apuesque engancoc lheiap, jawe njan jengiecpelquemo ngiapom" lhna ptaiancoc ma'a. Coca nwaiacmec nac acnem apteiapuei'o Enenlhet Neten ma'a aisecsec panactema, apuetai'ac nac Moises ma'a, netamen ma'a apcapascamo njan Engiapom Neten Moises cacpota eluonquesec jata tep apaiomo lhema co israelitas cacpota njan etnec apquemjama apmanie apiesecsec ma'a. ³⁶ Ca apqueljatsosquecjo lhnac apaiomolhema Moises ma'a iocjalhma Egipto, apquelanei'o lhnac na nquescama caselha monwetai'o m'a cacpota njan aluata' iemmen aquielhuasema ca njan ma'a aquieto iocjalhma metquelha temma acuacmo 40 iantelhcapa. ³⁷ Lhnac na aptemac Moises apquellanemo Israelitas: "Eliequiecsec jata lhema enenlhet Engiapom Neten apiesecsec quetlhencap cacpota etnec secama ania'a apancoc, ca stonac co'o" lhnac ptemac. ³⁸ Apacmetquescanquec nac Enenlhet Neten Moises aquieto lhienep acjaiam Sinai, ca apquelletsantenquescamo lhnac ania'a actacmelquescama apquellaniemjaicama apquellelto apcacnaicama m'a aquieto iocjalhma metquelha temma. ³⁹ Coca nellieijenca mang nac elleliejecjoc cacpota njan apqueltacnonquec nac ma'a ania'a, apquelmajai'o lhnac eltaqjoc mocjom aquieto Egipto. ⁴⁰ Lhnac aptaiancoc enenlhet apquellanemo Aaron: "Jengellanesques no caselha aquiocja alanemmalhca cacpota jenlaqlomaja nenmancolha la'a, mangeliojoc actemacja apcaniemjaicama Moises alhta, apto lhta njan jengeljastsosquecja iocjalhma Egipto" lhnac aptaiancoc enenlhet'awoc ma'a. ⁴¹ Apquellaneianquec nac apquelietquescamo toro apquetcoc, ca apquennapeianco lhnac apnactoscama cacpota eltacnescasancoc ma'a toro apquellanecamoc , ca apquellaneianco lhnac na actacmelaicama lhma m'a, awanjec anque nac apqueletsewasquescama apquellanecamoc toro apquetcoc apquelietquescama. ⁴² Apqueliengiecjec nac Engiapom Neten enenlhet'awoc ma'a aniem'o apquellenniemai'a apancawec, ca apqueltacnescaseianco lhnac iau'a m'a. Lhnac na ntemac apnactalhesaicamoc apquetsecama ania'a nnenga: «Enenlhet'awoc co Israel, nwaiacmec niecje 40 iantelhcapa apquelloma iocjalhma metquelha temma, mamma coca jellaicamoc caselha apanco'oc cacpota njan caselha apqueluanlhecamoc ma'a cacpota jeltacnescasancoc co'o, ⁴³ coca apquelletsawema njan neplatan'a quetlhencap pa'at atcoc acnaicamoc conne caselha apquellanecamoc Moloc cacpota njan iau'a apiocja apquelietquescama apqueniem'o m'a Refan, apquellanecamoc apancawe quetlhencap cacpota eltacnescasancoc ma'a, ca ncanec alapacsec jata mocjec anquec quetlhencap ma'a tep Babilonia» lhnac ntemac aptalhescama wacajac secama ania'a nnenga. ⁴⁴ Ca m'a iocjalhma metquelha temma nellieijenca nietnenquec nac pa'at apnectanlha mota Engiapom Neten, apquelanai'a lhnac na nec Moises, Engiapom Neten nac apuetasquescama panquec ma'a apqueltacja la etnejec. ⁴⁵ Netamen apquellaianco njan aptawana'ac neptamna'ac pa'at anac, Josue lhnac nanec apuesai'a apquemjama apmanie m'a, apquelletsomawec nac na m'a apquenmaianco mo'oc iocjalhma apqueljatsoscasecja po'oc enenlhet aniem'o apquelpasmoma Engiapom Neten. Nietnaiacmec nac pa'at ma'a acuacmo acnem aptaiecjo apuesque David. ⁴⁶ Mpaijecjec nac apualhoc Engiapom Neten aniem'o David actacmanma aptemacja, apquenmalhneianca lhnac elanesquesec apnemacja Engiapom Neten cacpota aplhamacjo Israelitas eltacnescasancoc apuesai'a m'a, ⁴⁷ coca apquetca neptamen David apuesai'a Salomon apquelanei'o m'a pa'at anac. ⁴⁸ Coca nelliawec ennenco'o melhec Engiapom Neten aquieto conne' pa'at apto enenlhet apquellanai'a, lhnac nanec na aptemac secama ania'a nnenga: ⁴⁹ «Asnec co'o aquieto neten, nalhepop coca asquelteioiam emancoc, mancapuanquec enenlhet jelanesquesec asnemacja' cacpota aiamposalhcac ma'a, ⁵⁰ co'o asquelanai'a lhamacjo caselha jam» ¹ lhnac aptemac ma'a. ⁵¹ Coca lhna aptemac mocjom Esteban apquellanemo apquelemjama apmaniaie m'a: —!Mamma apqatco'oc quetlhencap, mang na ncomac'ac ellailhojo' mancollatsema njan apualho'oc! Apquelnawec apquelieijenca nnenga, apqueltacnewacque mota Espiritu Santo. ⁵² Ma lhta njan eltacmelquescamac apquetsecama ania'a nnenga apquelieijenca'a quetlhencap, cacpota njan apquennapeianquec enenlhet aplheianma la ania'a apuai'a ta apto apeiwomo. Netamen apuai'o jenque'e nenwanlha nac apto apeiwomo, apqueltacnonwecjec na m'a, apquellaqjemo njan quetlhencap. ⁵³ Apcapascanquec nac nanec Engiapom Neten Enenlhet Neten cacpota ellanconwac jenganemacja apquellieijenca, coca melleliejecjoc na quetlhencap nenwanlha nac—lhnac ptemac Esteban. ⁵⁴ Man na nquescama apquelloma apquelemjama apmaniaie apquellengai'o m'a, apquellelpelhiennonquec nac ma'a, ⁵⁵ coca Esteban aplanei'awec nac apualhoc Espiritu Santo m'a, ca apcammelhmo lhnac neten, apuetai'o Engiapom Neten ma'a cacpota nja Jesus nac apquenmaianca napocja aquieto iennacja', ⁵⁶ lhnac ptemac Esteban: — Asuet'ac anmaijacjo neten, asuet'ac na Enenlhet Apquetca apquenmanca aquieto napocja aquiennacja Engiapom Neten —lhnac ptemac ma'a. ⁵⁷ Apquellapeianquec nac apaico'oc ma'a cacpota njan nquelpaijecama lhnac apatno'oc, apquelquetameianco apquelpatjetmo njan Esteban ma'a. ⁵⁸ Apquellentepquescamo lhnac ma'a apiau'acja temma m'a, ca apquellelto lhnac apqueltema apquenmopuanca'a ania'a apquellammelhma Esteban apqueljatsosaianco lhnac na apquelaqlammap ma'a, apquellanconwaiacmoc lhema apquetcoc apuesai'a Saulo, ca apquellempai'o lhnac apqueliaqnecamoc metaimong Esteban ma'a. ⁵⁹ Coca Esteban apcammelhmo lhnac neten, lhnac ptemac: — Apuesque Jesus, ema ta tacja eiempejec —lhnac ptemac. ⁶⁰ Ca apquelteclheclhemo lhnac aptapno'oc nalhepop Esteban ma'a, lhna ptemac apiennactescamo apaioma: — Apuesque, ncotnama ta nquec ma'a, meiaqmoncasecja nquec apqueltemacja ncolatsecama aptancolha nac jelanei'o enenlhet anac —lhnac ptemac. Ca apquetsepmo lhnac ma'a.