5
Allanecamoc caselha ncolatsecama Ananias ca njan aptawa' Safira
1
Apnenquec nac na lhema enenlhet apuesai'a Ananias cacpota njan aptawa Safira, apiamasmec nac lhepop apancoc ma'a,
2
nquetlheianmec nac au'alhoc ncolielhalhcoc nconmocjac necja pataccom, cacpota ncollanconwacjac na alaimommalhca apostoles ma'a.
3
Coca lhnac ptemac Pedro apcanemo Ananias ma'a:
— !Se lha ntac apcanco nac acmanca lheiap Satanas, apiennencasquec Espiritu Santo lheiap, apqueljatsosacjec na necja pataccom aquiaqmoiecja alhta lhepop apancoc apiamasma!
4
Lheiap apmajai'a apanquec eiengio'oc lhepop apancoc, lheiap na apmajai'a jengellancoc pataccom cacpota angennasquecjac. ¿Se lha acto jengelliennencaso nac que? Coca jawe ennenco'o jengelliennenquescama, Engiapom Neten coca apiennencasac lheiap—lhna ptemac apcanemo Pedro.
5
Necsa aplengai'a lhnac Ananias ma'a, apiaqnanmo lhnac, apquetsepmo njan ma'a. Apquennelhtenganquec nac neten enenlhet'awoc apquellengai'o ania'a nac.
6
Netamen ma'a apqueluai'o lhnac apquetco'oc, apquelpelhquetenco itamopai'a apquetsepma apjapac ma'a, ca apquetsomo lhnac apquelcatonnemo njan ma'a.
7
Malha tres hora lhnac nwaiacmoc ma'a, acuai'o njan aptawa acuesai'a Safira, mang nac ncoijamoc actacja apcaniemjaicama atawa m'a,
8
ca apquenmalhneianca lhnac Pedro m'a, lhna aptemac:
—¿Jawe nlho ngiapac aplheno lhquec atawa actenwanlha aquianmomacja lhepop anco'oc quetlhengca'
?—lhna aptemac ma'a.
—Jai, jawe ngiapac —lhna ntema atemmoianca m'a.
9
Coca lhna aptema mocjom Pedro:
— Mancolatsema allanecamoc quetlhenca', nquelliepconquec Espiritu Santo. Apquelelhiacmec apquelcatonnema lhquec atawa' apquetsepma, lheia ta njan elcatonnec ma'a colhuawe nac— lhna ptac Pedro.
10
Mpelapquescanquec nac na aquiaqnanmo m'a atsepmo njan Safira. Ca apqueleltalhnemo lhnac conne pa'at apquetco'oc, apquelletsecjo lhnac na apac cacpota elcatonnanwacja aquieto necja apietnacja atawa.
11
Awanjec anquec nac apquellai'a apquellelto apquelieplecama Jesus cacpota njan po'oc enenlhet'awoc ma'a actemacja acuetammalhca.
Aclhamacma caselha jempelapquescama apquellanai'a apostoles
12
Apquellaianco lhnac apquenmopuanca'a Engiapom Neten apostoles cacpota ellanancoc caselha monwetai'o aniem'o neten, caselha jempelapquesama apiesecsec enenlhet'awoc. Lhamacjo acnem nac ma'a apcaqnecja apquelieplecama lhta Jesus aquieto malamong pa'at acuesai'a Salomon.
13
Apquelleliejecjawec na mota enenlhet'awoc ma'a, coca mang na ncoliaquaiacmoc eltetescamoc ma'a aniem'o apquellai'a apquelemjama apmaniaie.
14
Aplhameianquec nac apquellennawa'ac, cacpota njan nqueluana'ac apquellelto meliasqueiam Jesus ma'a.
15
Apquelpetcanwecjo lhnac anmasca apiempeioc aquieplomo apqueltanema aquieto amai apmac'acja eiecac Pedro, apquelleltemo ncapuatac pesquesca apancoc cacpota eltacmelecjac ma'a.
16
Apquelletsecjo lhanc na anmasca apiempeioc cacpota njan queliacjameioc acmaicama apquelleniem'o apquellawacja actacja nengaqtec Jerusalen, apqueltaqmelecjec nac na m'a.
Apquelemjama apmaniaie judios apquenmajai'a etselhnanac apostoles
17
Awanjec anquec nac apqueliasepquescama apquemjama apmanie sacerdotes cacpota njan saduceos apqueluetai'o apquellanecamoc caselha jempelapquescama apostoles ma'a,
18
ca apquelpatjetmo lhnac ma'a apquellaqlhenquescamo njan nengaclhencasemmalhquelha m'a.
19
Ca aptemo lhnac pelhasep ma'a apuai'o lhema Enenlhet Neten, apmaiesecjo lhnac atong nengaclhencasemmalhquelha m'a, apquelentepquescamo njan ma'a, lhnac aptemac apquellanemo:
20
— Enmeiacja Engiapom Neten apnemacja, eleltennasama ta m'a ania'a actacmanma jengaicamoc nenganniemjaicama aquiennactema— lhnac aptemac apquellanemo Enenlhet Neten.
21
Mo'oc acnem na ntemac ma'a, sosecje anquec apquenmeiecjo lhnac Engiapom Neten apnemacja, apquetlhecmosquecjo lhnac ma'a ania'a actacmanma.
Coca apquemjama apmanie sacerdotes cacpota njan apquetlhelhma'ac apquellawei'o lhnac aplhamacjo metno apquetcoc co israel elpasenwa lhema apcaqnecja apquelientalhnacja apquelemjama apmaniaie. Netamen ma'a apquellapascamo lhnac guardias cacpota eliantementac apostoles aquieto m'a nengaqlhencasemmalhquelha
22
Ca apqueluecjo lhnac ma'a, man nac eluetanwecjac ma'a, colhuawec
anquec nac apqueltaqjemo neptapna'ac, apqueleltennasquecjo lhnac apquelemjama apmaniaie, lhna aptaiancoc:
23
—Neluetanwacje lhec ennenco nema apecja niecje atong, apcacjanque na guardias m'a aquieto atong, coca nemmaieso ennenco'o atong, mamma lhquec enenlhet alhta conne m'a— lhnac aptaiancoc.
24
Ca apquelengai'o lhnac apquemjama apmanie guardia Engiapom Neten apnemacja cacpota njan apquelemjama apmaniaie sacerdotes, apquennelhtenganquec nac neten ma'a, apquelpacmetquessammacpo lhnac moc apancawec ma'a acmac'acja ta ncotnec apcacjaicamoc.
25
Colhuawec anquec nac na apuai'ac lhema enenlhet ma'a, lhnac aptemac:
— Ca apquelaclhencaso lhta quetlhencap nengaqlhencasemmalhquelha, asqueluet'ac lhec apquetlhecmoso Engiapom Neten apnemaja m'a —lhnac ptemac.
26
Colhuawec anquec nac apmeiecjac apquemjama apmanie guardia cacpota njan apquetlhelhma'ac, apquelpatjetuecjo mocjom apostoles, apqueltacmelquescanquec noca m'a ncanec apquellai'ac nac enenlhet nconnatjacsec cacpota ncolhec aliaqnenco metaimong.
27
Ca apqueliantemacjo napactawe apqueliau'acja apquelemjama apmaniaie judios, lhna aptemac apquellanemo apquemjama apmanie sacerdotes:
28
—Nelleltennasque lhta niecje quetlhencap secje lhta metlhecmosanquec mocjom ania'a aplhenammap Jesus, coca manjengeleliejecjoc ma'a, apquelleltennasema coca mocjom ania'a nac lhamacjo apnacja temma necjau'ac anac aquieto Jerusalen, jengetlhenquec na nennapma Jesus
—lhna aptemac.
29
Coca apcatemmoianca lhnac Pedro cacpota njan aptemolhemec apostoles, lhna aptaiancoc:
— Ntasec ennenco'o angelleliejecjoc Engiapom Neten, jawe angelleliejecjoc enenlhet.
30
Apquennapque lhta quetlhencap Jesus neten iamet actennescama, coca Engiapom Neten apto apuesque apanco'oc nellieijenca'a, aptemesquesecjac apjalhnancoc mocjom apiesecsec apquenmasquenwaiacmo m'a.
31
Ca njan aptemesquescamo apto neten apanquec ma'a, apnesquecjo njan aquieto aquiennacja apoctong, cacpota njan etnesquesec aplaqclecama eluonquesec na tep enenlhet'awoc co Israel, cacpota elietasquesecjoc apualho'oc Engiapom Neten, cacpota njan enmasquesquesec apqueltemacja ncollatsecama.
32
Ennenco'o njan negellelto neluetaianco m'a lhamacjo caselha nac, ca njan apcacjanquec engellualhoc Espiritu Santo apquellaianco lhta njan Engiapom Neten aplhamacjo enenlhet apquelelliejecjo la'a— lhnac aptaiancoc apostoles ma'a.
33
Nquennatjescanquec nac apquellemjama apmaniaie apquellengai'o m'a, apquenmajai'ac nac ennapoc ma'a.
34
Coca apquenmecjo lhnac neten lhema fariseo apuesai'a Gamaliel, apto lhnac na jengetlhecmoscama jenganemacja Moises, awanjec anquec nac na apquelleliejecjo enenlhet'awoc ma'a, apqueltemo lhnac ncolhec alentepcaso secje conne iaquatacjo apostoles
35
lhnac aptemac apquellanemo apquellemjama apmaniaie:
— Quetlhencap enenlhet'awoc co israel, eltaqmelcaso ta atlheianma apualho'oc apmac'acja ta etnancoc apquellanei'o enenlhet anac.
36
Cotlheianwacjo no apualho'oc lhema enenlhet nac lhennenga tep apuesai'a Teudas, apmajai'a etnec apuesque neten apanquec, apuaiacmec nac 400 enenlhet apcanquesaicama cacpota etnancoc apquelieplecama m'a, coca apmatnamo lhnac Teudas ma'a, ca apquelhpanmo njan apquelieplecama, mmasquenwacmec na apmopuana Teudas ma'a.
37
Ca netamen ma'a nema actemo censo co Israel, apuai'o lhnac lhema enenlhet apuesai'a Judas apqueniem'o Galilea, apmajai'o njan etnec apquemjama apmanie neten apanquec, apentelhec nac na apquelieplecama m'a, ca apmatnamo njan ma'a, apquelhpanmo njan apquelieplecama.
38
Ca astac asquellano colhuawe nac meliasamonquelhma enenlhet anac apquellelto nac apquelieplecama Jesus, ca acto la aniem'o apquetlhecmosecamoc apanco'oc apancawe, ncomasquenwomoc jata m'a.
39
Coca aniem'o la apquetlhecmosecamoc Engiapom Neten, netamen ellamelhec jata Engiapom Neten quetlhencap ma'a—lhna ptemac Gamaliel.
40
Nquelleclemawec nac apualho'oc apqueluescai'e actemacja apqueltennaicama Gamaliel, ca apquellapascamo lhnac lhema enenlhet eliantementa apostoles napaqtawec ma'a cacpota eliaqpelhquetancoc, melleltemo njan etlhenec mocjom apuesai'a Jesus, ca apquelpacnemecjo njan ma'a.
41
Ca apquellentepo apostoles napaqtawe apquellemjama apmaniaie, nquelpaijecjec nac apualho'oc ncanec apquellengaianquec nac acmasca aniem'o apquetlhecmoscama apuesai'a Jesus.
42
Lhamacjo acnem nac apquetlhecmosecamoc ania'a actacmanma aplhenammap Jesus apto Mesias aquieto m'a Engiapom neten apnemacja cacpota njan lhamacjo apcacjaiancolha enenlhet ma'a.