28
Pablo aquiaquienweiam lhepop Malta
1
Nwaiwenque lhta loma nemmen aquiawai'a m'a, ennenco'o lhtoca nenmangcoc iemmen nelwacmo m'a neiawa' aluata', nelwet'o lhepop aquiaquienweiam, natemma Malta m'a.
2
Ntase
lhta jengellanei'o enenlhet'awoc ma'a, jengelwatnescasengco talha m'a, semange lhta, iemmen atco'oc alhta njan.
3
Apcanquesacje lhta ientapa Pablo m'a, ca apquelho natelh ientapa', colhuawec anque lhta ntepac aisecsec talha menasma, ca actaclho apmec.
4
Apqueluet'a lhta enenlhet'awoc ma'a actaclho apmec aquielhneianca menasma, ca atlheno apualho'oc Pablo apto ntequioma niapom, apqueltemacja lhta m'a ncanec nquelienlhaneiacmec lhta nengetsepma Pablo apmaiancolha la'a aquiocjo iemmpec, apuacme lhta tep apquetsepma niecje acuaiwecamo loma nemmen, netamen colhuawe nac mocjom actaclho menasma m'a.
5
Apmacjesque lhta apmec Pablo menasma m'a ca actenwacmo natelh menasma m'a.
6
Apquellanecama lhta enenlhet ma'a apqueleljalhno colhuawec jata enietsepoc Pablo m'a, coca mamma lhta actacja m'a. Colhuawe lhta niaqmocjac actacja atlheianma apualho'oc, ca apquetlheno Pablo apto malha dios.
7
Nengacte lhta m'a lhepop apanco'oc lhema enenlhet apto neten apiaspommap ma'a apuesai'a Publio, jengenme lhta tacja, ntase lhta njan nellanei'o m'a, acuacmo janetolhem'a acnem.
8
Apiapom Publio apietnenque lhta apietnemacja m'a nemmasquema acmelhanma eniempejec alhta ncaqjemac, cacpota njan nenianma, ca aptetescacmo Pablo m'a apacmetqueso Engiapom Neten, apnenqueno apmeioc tacjaplhet, ca aptacmelacjo m'a apiapom lhec.
9
Ca apquelleng'o anmasca apiempeioc natemma nac ma'a, apquenmeiacjo njan apnacja Pablo, ca apqueltaqmelquescaiacmo njan ma'a.
10
11
10–11 Apcanetolhem'a pelten alhta nengacjaicamoc ma'a, ntasec anque lhta jengellanei'o m'a, lhamacjo caselha lhta jengellaiangcoc ma'a. Coca nietne lhta njan lhema loma nemmen aquiawai'a m'a aniem'o Alejandria, nietnengque lhta alanemmalhca napaqta'a apqueliocja' dioses Castor cacpota njan Polux aquieto awajec loma nemmen anac. Alailhemo lhta ncowomoc nnelha' ieiam apualhoc, alena apactec alhta atsecama m'a. Nquetlhenque lhta engellualhoc ntasec angellempecjo mocjom netlhengama angelcanantec loma nemmen anac. Necsa nelcanantema lhta, jengellangco lhamacjo caselha nenlhengama ancoc.
12
Ca netlhengo m'a nelwacjo natemma Siracusa, nengacjengwacjo m'a janetolhem'a acnem,
13
netamen ma'a nellempocjo netlhengama, ca nellwacjo natemma Regio, mo'oc acnem lhta ntac apquelhcacmo pieiam, ca netlhengwacmo mocjom nellwacjo natemma Pozzuoli, lhema cnem alhta netlhengama m'a.
14
Ca nelwetangwacjo apquellelto apquelieplecama Jesus ma'a, apquellelto angacjancoc na secjec lheme' lhema semana. Ca nellempocjo mocjom netlhengama, lhennenga ntemac nelluecjo m'a natemma apiawai'a Roma.
15
Aquellengai'ac nac ania'a apquellelto apquelieplecama Jesus ma'a actemacja ennenco'o nenmajai'a angelluomoc ma'a, ca jengellanielhacmo jengenmo njan tacja' iocjalhma' Foro Apio cacpota njan Tres Tabernas. Mpaijacjec lhta apualhoc Pablo apuet'o enenlhet'awoc ma'a, ca apto gracias Engiapom Nenten, ca apiennacjojo'.
16
Coca apquellelto apquelemjama apmaniaie' natemma nac ma'a, ma lhta ellaclhenquescamac nengaqlhencasemmalhquelha Pablo m'a, apquellaianquec lhema pa'at Pablo cacpota elhec ma'a, lhema quempocjacme lhta apquelanecama m'a.
17
Janetolhem'a acnem alhta ntac apiecai'a, ca apquelto Pablo ngcolhec allau'o apquelemjama apmaniaie' judios, ca apcacnacjo m'a, lhta ptac apquellano:
—Mamma co'o ascammelhaicama nennemolhema cacpota njan apqueltemacja nelieijengca, coca moclhema apquelemjama apmaniaie' judios aquieto m'a na temma Jerusalen, jellanconguacmo apquelemjama apmaniaie' romanos,
18
ma lhta ntec apquenmajai'a jelpeiwesecja astemacja, apqueluetai'o metca astemenweiacmo lhma', ca apquellelto niecje jelpacnemecja',
19
coca ma lhta elleltoc apquelemjama apmaniaie' judios, ca ngqueniem'ac asqueltemo ngcolhec jeiantemantamo jengque'e napaqtec apuesque Roma cacpota jeliecpelcojo. Jawe asmajai'a alhenec ngcolatsecama asquennemolhema napaqtec apuesque Roma.
20
Ca ncanec allawama quetlhengcap cacpota alleltennacsec, asmalhquec co'o ncanec mio'ascacmoc apqueltemacja judios — lhta aptac Pablo apquellano.
21
Apquellatemmoma lhta m'a:
— Mangetlhewai'ac ennenco'o lhema waccajac ania'a aplhenammap lheiap, mamma lhema pjapac judios apuai'a na mota jengque'e elhenec lheiap ncolatsecama apuesai'a.
22
Nengeltawec jengeltennasama ania'a alhnancoc apqueniectanlha nac apquellelto nac apquelieplecama Jesus — lhta ptangcoc ma'a.
23
Ca apquelpecqueno lhema acnem eniaqnecja. Ma lhta ntec enenlhet'awoc apquenmeiecja' apnacja Pablo apquenmajai'a ellailhoc ma'a. Sosecje lhta apquempac apqueltennaicama Pablo m'a acuacjo ienacteso, actemacja ania'a apmopuana Engiapom Neten, ca apquelietsato njan ania'a jenganemacja Moises cacpota njan waccajac apnactalhescama apquetsecama ania'a nnenga, cacpota nconmoc apualho'oc enmoc tacja apuesai'a Jesus.
24
Moclhem'a lhta apquellasecjai'ac, napocja lhtoca njan mellasecjai'ac ma'a,
25
malhta ncolhnemoc mo'oc apualho'oc ma'a ca apquelieniacjo napocja', coca lhta ptac Pablo apquellano:
—Engiapom Neten Apualhoc apmaicama Isaias secama ania'a nnenga cacpota elhenec elleltennacsec ania'a apquelieijencaja quetlhengcap, lhnac nanec aptemac:
26
« Ncacjoc jata ellengac quetlhengcap meliejec jatoca, ellammelhama ta niecje', melwetiec jatoca.
27
Ncolleijac apualho'oc quetlhengcap, mamma apaica'awoc, mamma njan apacta'awoc, ca ncanec meliangwomje', melwetie', melleniec najan. Mangcomajai'ac jeliota' cacpota altaqmelcasecja'» lhnac nanec aptemac Engiapom Neten Apualhoc apquellanemo.
28
29
Jaweniapac canque' Engiapom Neten eluonquesec jata tep enenlhet metno judios, ncanec apquellasecjai'awec ania'a aplhenammap Jesus.
30
Ca apnacjo Pablo m'a janet iantelhcapa aquieto Roma, lhema pa'at apnema secje', apmanque mota tacja enenlhet aptaicama la amaica'a apnacja,
31
metca apcai'a lhta Pablo apqueltennanca la Engiapom Neten apmopuana m'a cacpota njan apquetlhecmoscamo ania'a apuesque Jesus apto Mesias, mamma lhta alaptencaseianca apqueltennaianca Pablo m'a.